tutu halá 

na chikí
grandinan di bon kurason
a mira pan di dios den mi
sin ku mi por a kòrda
kome ni sombra di su wirwiri

despues den mi rebeldia
kontra misa
kontra outoridat
fòrtinan ku bal’e kañon a kue
a splikami ku lo mi kome
pan ku diabel a mansa

pa interesante ku el a zona
parse no tabatin trùk’i pan na port’e fièrnu
ku por a trese maske ta un snechi

rosea di hende
a keda purba changami
pa mi keda laba
entre lus gulí sin konsenshi
i spoki di pèrdishon pegá den tráfiko

anto di mi mes
m’a siña tolerá punda
pero konfia mondi
bati kabes mi so
ku bida shimaron
siña hala mi mes tutu
di kuminda pipitá di mi tera
mará den kurason mulá na ariña

t’esei mi ta kome
ora mi no ta yuna den mondi
papia ku zumbi
ku ta keda siñami
ta mi mes
ku mi lele den man
pa sigui kushiná
mas mañan

Richenel Ansano