Tamara Liberá

Pará na punta di silensio,
ora memoria koba rais bou di piedra,
kaminda airu ta pisá ku kuentanan skondí.
Mi a tuma un desishon:

Kita man fo’i boka. 

Den mi mente mi a bai bèk na e kas,
kaminda parti di mi alma a keda atras.
Energia, presensia, resonansia den tempu,
ainda ta konektá ku mi.
Bisa bo bèrdat, ta hopi kas
mi a bishitá di nobo den mi bida,
kada un ta un kapítulo,
kada un ta parti di mi,
for di mi promé gritu te na sosiegu. 

E último kas kaminda mi a biba
ta yená ku kaha, papel i diario,
ku m’a kuminsá for di ocho aña.
Mi a sali den purá, sin karga nada,
ma den mi hansha mi a lubidá…
mi a lubidá mi mes.

Mi ta bolbe awe,
no ku kaha, ni ku karga,
ma ku man habrí,
kla pa mi kolektá loke a sobra di mi.
Mi ta yama bèk e mucha ku ta skibi kuchi kuchi,
mi ta yama e teenager ku a skonde su bos,
mi ta yama e muhé ku a faya su mes.
Mi ta yama nan tur bèk serka di mi. 

Kada un pida,
mi ta kose bèk na otro,
no mané mi tabata,
ma mané mi mes a skohe:
Un muhé ankrá! 

E kas a pèrdè tur poder,
su muraya n’ por wanta mi mas.
Mi a sera kamber den mi pechu,
karga diario den mi ardu,
i e silensio a bira un ritmo, ritmo di tambú.
Mi ta reklamá mi forsa.
Mi ta saka loke a keda atras,
transformá memoria den poder.
Mi ta para aki kompleto,
konsistente, soberano. 

Mi ta pordoná mi mes
mi a purba sana otro,
lubidá loke ta sagrado.
mi a duna tur loke mi tin,
sin wak pa mi mes.
Awor mi ta komprondé:
kon mi a sigui e stapnan mi dilanti,
kon mi a karga hopi lès di bida.
Mi ke primintí ku nunka mas, 

lo mi bandoná mi mes. 

Asina mi a bisa
e reflekshon mi dilanti,
bira lomba, kana sali, sera e porta,
i laga un rosea skapa…
No pasó mi a entregá

Mi a liberá mi mes. 

Tamara Liberá, Curacao, Feb.8th, 2026