Rais Rebelde

Planta simia den bo kurason. 
Mensahe demonstrá ku emoshon. 
Kuenta pa siglonan den sirkulashon. 
Arte ta lanta den revolushon. 

Wak bo kaya yave, 
promé ku bo krusa
bin insultá mi herensia. 

Aki, despresio di identidat,
dòrná ku dignidat, 
djariba ordená 
ta para.

Purba di aktua relahá 
ora historia di mi ansestronan 
kap kadushi di bo arogansia
Lorá den ignoransia.

E moral di mi famia ta grita!
Bon ankrá!
Bon plantá!
Bon fundá!

Muchu konsiente di balor kultural 
pa lastra den e menospresio 
ku ta sali for di bo boka. 

E moral di mi famia ta sali kologá den siguransa.

E sabi ku pafó di e frontera di tempu, 
un alfarero a moldia e núkleo di nos eksistensia.

E moral di mi famia ta grita!
Bon ankrá!
Bon plantá!
Bon fundá!

Niun por determiná bo balor duná pa kreador.

Planta simia den bo kurason. 
Mensahe demonstrá ku emoshon. 
Kuenta pa siglonan den sirkulashon. 
Arte ta lanta den revolushon. 

Ralph Winedt