Popol Vuh na papiamentu, nota di traduktor

Nota di Lucille Berry-Haseth, traduktor

E tradukshon akí di Popol Vuh na papiamentu no ta solamente un akto di fidelidat kultural, sino tambe un homenahe na e raisnan indígena di nos kontinente, na kua nos islanan ta pertenesé. Papiamentu, ku su historia di resistensia, mestisahe i ekspreshon popular, meresé dialogá ku e obranan grandi originario di Amérika. Hasiendo e teksto sagrado akí di e mayanan kiché aksesibel na nos lenga, nos ta afirmá ku papiamentu tin kapasidat di transmití profundidat spiritual, rikesa poétiko i sabiduria ansestral. E vershon akí ke fortalesé nos identidat lingwístiko i kultural, komo un brùg pa konektá pasado i presente, entre e diverso pueblonan ku ta kompartí un memoria bibu. 

E tradukshon akí ta basá riba e edishon di Gabriel Silva Rincón, Popol Vuh, Panamericana Editorial Ltda., colección Letras Latinoamericanas, 1.ª ed. 1994, 13.ª reimp. 2005 (ISBN 958-30-0129-5).

Nota lingwístiko di traduktor

Na papiamentu nos no ta praktiká konkordansia gramatikal di tempu manera ta sosodé den hopi otro lenga. Ta nifiká ku, no semper ta marka si algu a pasa, ta pasa o lo pasa (pasado, presente o futuro) pa medio di kambio na e verbo. P’esei, lektor por nota un meskla di tempu verbal ku ta rospondé na ritmo natural di papiamentu i na memoria, sin ku esaki ta nifiká konfushon òf eror. 

Opservashon tokante e kuater ansestronan 

Den algun pasashi di Popol Vuh ta menshoná e promé kuater ansestronan —Balam-Quitzé, Balam-Acab, Mahucutah i Iqui-Balam— komo un grupo kompleto. Sin embargo, den sierto esena ritual o akshonnan spesífiko, e teksto ta laga Iqui Balam afó i ta nombra tres di nan so. E variashon akí ta bini di e manuskrito mes i di su tradishon tekstual, kaminda loke ta menshoná ta varia entre listanan kompleto i menshonnan funshonal. Pa fidelidat na e teksto original, e tradukshon akí ta mantené e diferensianan akí.