Popol Vuh IV, 9

Di e manera akí a kompletá e bintikuater Señornan i asina a eksistí e bintikuater Kas grandinan. Asina grandesa i poder i gran dominio di Kichénan a krese. E ora ei e dominio i superioridat di e yunan di Kiché a krese, ora nan a konstruí di kalki i semènt machiká e siudat di baranka.
E pueblonan chikí, e pueblonan grandi a presentá dilanti di e rei gabá.
Kichénan a engrandesé ora nan gloria i mahestat a surgi, ora a traha kas di nan dios i kas di e Señornan. Pero no ta esakinan a traha e kasnan, ni e kas di dios, ke men ku ta nan siguidó- i nan sirbidónan ku a multipliká a hasi esei.
I no a engañá nan, ni a roba nan, ni a poderá di nan violentamente, pasobra den realidat kada un tabata pertenesé na e Señornan, i nan rumannan i nan miembronan di famia tabata na kantidat i nan a bini huntu i nan a reuní pa skucha òrdu di kada un di e Señornan.
Nan tabata realmente stimá i gloria di e Señornan tabata grandi; anto ora e habitantenan di área rural i di área urbano a multipliká, nan yu- i sirbidónan a respetá dia di hasimentu di aña di e Señornan di área rural i di área urbano.
Pero no ta asina ku tur e tribunan a yega na entregá, ni ku e habitantenan di área rural i di área urbano a bai bataya, sino ku nan grandesa a oumentá debí na e Señornan maravioso, rei Gucumatz i rei Cotuhá.
Gucumatz tabata realmente un rei atmirabel. Durante shete dia e ta subi bai shelu i shete dia e ta tuma pa e kana baha den Xibalbá; durante shete dia e ta kolebra i di bèrdè e ta bira serpiente; durante shete dia e ta águila, shete dia e ta tiger; di bèrdat su aparensia tabata di águila i di tiger. Otro shete dia el a kambia den un pos yená ku sanger, el a kambia bira sanger kuahá asina ei.
Di bèrdè mes naturalesa di e rei akí tabata atmirabel, i spantu tabata yena tur e otro Señornan den su presensia. Notisia di naturalesa maravioso di e rei a plama i tur e Señornan di e pueblonan a tende esei. I esaki tabata prinsipio di e grandesa di Kichénan, ora rei Gucumatz a duna e pruebanan akí di su poder. Den esensia, e tabata un berdadero maestro di nágual. Su yu- ku su ñetunan nunka a pèrdè su imágen fo’i nan memoria. I no ta pa e broma ku e ta un rei maravioso, el a aktua manera el a hasi, sino solamente pa trese un medio pa dominá tur pueblo, komo demostrashon di ku ta ún hende so ta yamá pa ta hefe di pueblonan.
Tabata e di kuater generashon di rei, esun di e rei maravioso yamá Gucumatz, ku tambe tabata Ahpop i Ahpop-Camhá.
A keda susesor- i desendientenan kendenan a reina i dominá, i kendenan a engendrá nan yunan, i a realisá hopi kos. A engendrá Tepepul i Iztayul, di kendenan nan reinado tabata e di sinku generashon di rei, i kada un di e generashonnan di e Señornan akí igualmente a haña desendiente.

(tradusí pa Lucille Berry-Haseth)