Popol Vuh IV, 8

Despues ku nan a sali di aya, nan a bini aki na e siudat di Gumaracaah, nòmber ku Kichénan a duna e lugá tempu e reinan Cotuhá i Gucumatz i tur e Señornan a yega. Nan a drenta e ora ei den e di sinku generashon di hende for di e prinsipio di sivilisashon i di e poblashon, prinsipio di eksistensia di e nashon.
Ei, pues, hopi hende a traha hopi di nan kasnan i tambe nan a konstruí e tèmpel di dios: den sentro di e parti haltu di e siudat i esei nan a hasi ora nan a yega i nan e establesé na e siudat ei.
Despues a sigui kresementu di nan imperio. Nan tabata hopi i na gran kantidat ora nan a reuní den nan Kas grandinan. Nan a reuní i nan a dividí, pasobra a surgi desakuerdo i a bin eksistí yalurs entre nan pa e preis di nan ruman muhénan i nan yu muhénan i p’esei no tabatin reunion ku bibida mas entre nan.
Esaki tabata pues, e kousa ku tabatin divishon entre nan, ku nan a bai kontra otro i nan tabata tira otro ku kadaver di esnan morto, i nan tabata hasi esei entre nan.
E ora ei nan a dividí, forma nuebe famia, i únabes e pleitu pa motibu di e ruman muhénan i e yu muhénan a terminá, nan a ehekutá e disposishon di parti e reino na bintikuater Kas grandi, manera efektivamente a sosodé. Ta hopi tempu pasá ku nan tur a bini na e siudat akí, ora a forma e bintikuater Kas grandinan, ei na e siudat di Gumaracaah, ku Señor Obispo a bendishoná. Finalmente nan tur a bandoná e siudat.
Ei nan grandesa a oumentá, ei nan a bai instalá ku splendor nan trono i asiento pa hende importante sinta, i nan a distribuí e honornan entre tur e Señornan. A forma nuebe famia ku e nuebe Señornan di Cavec, nuebe ku e Señornan di Nihaib, kuater di e Señornan di Ahau-Kiché i dos di e señornan di Zaquic.
Nan kantidat a oumentá mashá i na gran kantidat tabata tambe esnan ku ta sigui kada un di e Señornan; esakinan tabata e proménan entre nan sirbidónan i masha hopi mes tabata e famianan di kada un di e Señornan.
Nos ta bai menshoná awor nòmber di kada un di e Señornan di kada un di e Kas grandinan. Ata nan antó. Nòmber di e Señornan di Cavec. E promé di e Señornan tabata e Ahpop, kaba ta bini Ahpop-Camhá, Ah-Tohil, Ah-Gucumatz, Nim-Chocoh-Cavec, Popol-Vinac-Chituy, Lolmet-Quehnay, Popol-Vinac, Pa Hom Tzalatz i Uchuch-Camhá.
(Na sekuensia: rei; e persona destiná pa sigui reina despues di rei; e saserdote Tohil; e saserdote Gucumatz; e gran persona elegí di Cavec; e minister tesorero; e kobradó di impuesto; e konsehero di e wega di bala i e mayordomo.)

Pues, e Señornan di Cavec tabata nuebe Señor. Kada un tabatin su Kas grandi. Mas adilanti nan lo aparesé di nobo.
Ata akí e Señornan di esnan di Nihaib. E promé tabata Ahau-Galel, despues ta sigui Ahau-Ahtzic-Vinac, Galel-Camhá, Nimá-Camhá, Uchuch-Camhá, Nim-Chocoh-Nihaib, Avilix, Yacolatam, Utzam-pop-Zaclatol i Nimá-Lolmet-Ycoltux, e nuebe Señornan di esnan di Nihaib.
I referente na esnan di Ahau-Kiché, esakinan ta nòmber di e Señornan: Ahtzic-Vinac, Ahau-Lolmet, Ahau-Nim-Chocoh-Ahau i Ahau-Hacavitz, kuater Señor di esnan di Ahau-Kiché, den sekuensia di nan Kas grandinan.
I dos tabata di e famianan Zaquic, Señornan Tzutuhá i Galel-Zaquic. E dos Señornan akí tabatin un Kas grandi so.

(tradusí pa Lucille Berry-Haseth)