Popol Vuh IV, 7

Chi-Izmachí ta nòmber di e promé lugá di nan siudat, kaminda nan a yega i nan a establesé. Ei nan a desaroyá nan poder i nan a konstruí edifisio di kalki i kanto (semènt machiká) bou di e di kuater generashon di reinan.
I ei a goberná Conaché i Beleheb-Queh, Galel-Ahau. Despues a reina rei Cotuhá i Iztayul, manera ta nan nòmber, Ahpop i Ahpop-Camhá, kendenan a reina ei na Izmachí, ku ta e bunita siudat ku nan a konstruí.
Solamente tres famia grandi a eksistí ei na Izmachí. E tempu ei no tabatin e bintikuater Kas grandinan, tres Kas grandi so, unu di Cavecnan, unu di Nihaibnan i unu so di Ahau-Kiché. Tabatin dos palasio di serpiente so na Izmachí, e dos ramanan di famia, esta Kichénan i Tamubnan.
I nan tabata ei na Izmachí ku un solo pensamentu, sin resentimentu ni difikultat, e reino tabata trankil, no tabatin pleitu ni pelea, ta pas i felisidat so tabatin den nan kurason. No tabatin envidia ni yalurs. Nan grandesa tabata limitá, nan no a pensa di engrandesé nan mes ni di  oumentá. Ora nan a trata na hasi esei, nan a mustra nan eskudo ei na Izmachí i nan a hasi esei djis pa duna muestra di nan imperio, komo  señal  di nan poder i señal di nan grandesa.
Mirando esaki, esnan di Ilocab a start guera, ta esnan  di Ilocab, kendenan ker a bai mata rei Cotuhá, deseando di tabatin un hefe di nan mes. I pa loke ta Señor Iztayul, nan ker a kastig’é, i nan tabata ke pa esnan di Ilocab kastig’é i mat’é. Pero nan no a gana nada ku nan envidia kontra rei Cotuhá, kende a baha riba nan promé ku esnan di Ilocab por a mata e rei.
Asina prinsipio di e rebelion i e konfliktonan di guera tabata. Promé nan a ataká e siudat i e guereronan a yega. I loke nan tabata ke ta ruina di e rasa kiché, deseando pa nan so reina. Pero nan a kaba na muri, a kapturá nan i nan a kai prezu i no ta masha di nan a logra skapa.
Mesora a kuminsá sakrifiká nan; den e tempu a kuminsá e kustumber di sakrifiká esnan di Ilocab dilanti di e estatua di dios, i esaki tabata e pago di nan pikánan pa òrdu di rei Cotuhá. Masha di nan a kai tambe den sklabitut i den servidumbre; nan a bai entregá i a vense nan pa motibu ku nan a drenta guera kontra e Señornan i kontra e siudat. Loke tabata deseo di nan kurason, ta destrukshon i ruina di e rasa i e rei di Kichénan; pero esei nan no a logra.
Di e manera akí a nase e sakrifisionan di hende dilanti di e estatuanan di e diosnan, ora a hasi e guera di eskudo, ku tabata kousa ku a kuminsá traha e fortifikashonnan di e siudat Izmachí.
Ei nan poder a kuminsá i originá, pasobra imperio di e rei di Kichénan tabata realmente grandi. Den tur sentido tabata trata di reinan maravioso; no tabatin hende ku lo por a dominá nan, ni niun hende ku  por a humiá nan. I nan tabata ademas kreadó di grandesa di e reino ku a funda ei na Izmachí.
Ei temor pa nan dios a oumentá, nan tabata sinti temor i tur e tribunan grandi i chikí a yena di spantu ora nan a mira yegada di e prizoneronan, sakrifiká i matá pa obra di e poder i distinshon di rei Cotuhá, rei Iztayul i esnan di Nihaib i di Ahau-Kiché.
Solamente tres rama di famia kiché tabata ei na Izmachí, ta esei ta nòmber di e siudat, i ei tambe a kuminsá ku e festin- i orgianan ku motibu di e yu muhénan, ora a yònkumannan a yega bin pidi pa kasa ku nan. I asina e tres Kas grandinan, manera a yama nan, a uni i ei nan a bebe nan bibida, ei tambe nan a kome nan kuminda, ku tabata preis di nan ruman muhénan, preis di nan yu muhénan, i nan kurason tabata kontentu ku e komementu i e bebementu na e Kas grandinan.
‘Esakinan ta nos gradisimentu i asina nos ta habri kaminda pa nos posteridat i nos desendensia, esaki ta nos demostrashon di nos konsentimentu pa nos yunan ta esposa i esposo,’ asina nan a bisa.
Ei nan a presentá, ei nan a risibí nan nòmber, i a separá nan den grupo:  promé den shete tribu grandi i despues den divishonnan mas chikí.
‘Laga nos uni, nos di famia Cavec, nos di Nahaib i nos di Ahau-Kiché,’ e tres famianan akí i e tres Kas grandinan di. Hopi tempu largu nan a keda ei na Izmachí, te ora nan a haña i nan a mira un otro siudat i nan a bandoná e siudat di Izmachí.

(tradusí pa Lucille Berry-Haseth)