Popol Vuh IV, 6

Despues nan a disidí di bai Oriente, pensando ku asina nan ta kumpli ku rekomendashon di nan mayornan ku nan a keda kòrda. Ta hopi tempu despues ku nan mayornan a muri, e tribunan a duna nan nan muhé i nan a kasa ora nan a tuma nan muhé.
I ora nan a sali pa bai, nan di: ‘Nos ta bai Oriente, aya di unda nos mayornan a bini.’ Asina e tres yunan di, ora nan a sali pa subi kaminda. Qocaib ta nòmber di e yu di Balam-Quitzé, di Cavecnan. Esun ku yama Qoacutec ta yu di Balam-Acab, di Nahaibnan; i e otro ku yama Qoahau ta yu di Mahucutah, di esnan di Ahua-Kiché.
Esakinan pues, ta nòmber di esnan ku a bai aya na e otro un banda di laman; ta nan tres a bai e ora ei, i nan tabata dotá di inteligensia i di eksperensia. Nan karakter no tabata di hende superfisial. Nan a despedí di tur nan ruman- i famianan i nan a bai kontentu. “Nos lo no muri, nos lo bolbe”, nan tres a sigurá ora nan a sali pa bai.
Ta sigur ku nan a krusa laman pa nan a yega Oriente, pa nan bai risibí nan nombramentu di e reino djaya. I esaki ta nòmber di e Señor, Rei di Oriente kaminda nan a yega. Ora nan a yega den presensia di Señor Nacxit (sélebre rei asteka), ku ta nòmber di e Gran Señor, e úniko hues supremo di tur reino, el a entregá nan e símbolonan di reino i tur e emblemanan di reino. E ora ei e título- i símbolonan di grandesa di outoridat di Ahpop i Ahpop-Camhá a drenta i Nacxit a kaba na entregá nan e símbolonan di realesa ku ta: toldo, trono, flùit di wesu, cham-cham (tipo di tambú grandi), kuenta hel, pata di leon, pata di tiger, kabes i pata di biná, tènt, koncha di karkó, tabako, kalbas chikí, pluma di wakamaya kòrá, bandera (banners) di pluma di garsa real, tatam i caxcón (instrumènt musikal di perkushon). Tur esaki nan a bolbe kuné, despues ku nan a kaba di risibí na e otro un banda di laman e pinturanan di Tulán, esta e pinturanan manera Kichénan tabata yama loke ta representá nan historia.
Despues, ora nan a yega nan pueblo ku yama Hacavitz, a uni ei tur esnan di Tamub i di Ilocab; tur e tribunan a bini huntu i nan a yena di alegria ora Qocaib, Qoacutec i Qoahau a yega, kendenan a bolbe tuma mando pa goberná e tribunan.
Esnan di Rabinal, esnan di Cakchaquel i esnan di Tziquinahá a bira sumamente kontentu. E símbolonan di grandesa di reino a bira visibel. Grandi tambe tabata eksistensia di e tribunan, ounke nan dominio no a kaba di manifestá ainda. I nan tabata ei na Hacavitz, nan tabata ku tur esnan ku a bini for di Oriente. Ei nan a pasa hopi tempu huntu, ei riba  kabes di e seru nan tabata na gran kantidat.
Ei tambe e señoranan di Balam-Quitzé, Balam-Acab i Mahucutah a muri.
Despues nan a bandoná nan patria i nan a buska otro lugá pa nan bai establesé. E lugánan kaminda nan a establesé ta inkontabel, kaminda nan tabata, i ku nan a duna nòmber. Ei nan a reuní i ei nos promé mama- i nos promé tatanan a multipliká. Asina e hendenan di edat avansá tabata bisa ora nan ta konta kon nan promé siudat yamá Hacavitz a pèrdè parti di su habitantenan, i nan a bin funda un otro siudat ku nan a yama Chi-Quix.
Nan a keda hopi tempu na e otro siudat akí, kaminda nan a haña yu muhé i yu hòmber. Ei nan tabata na gran kantidat, i kuater seru a haña nòmber di nan siudat. Nan a kasa nan yunan, tantu e yu hòmber- komo e yu muhénan; loke e yu muhénan a risibí di regalo òf komo fabor, nan mayornan tabata konsiderá un muestra di agradesimentu pa nan yu muhénan, i asina nan tabata hiba un eksistensia felis.
Nan a pasa despues na kada un di e barionan di e siudat, di kua e nòmbernan ta: Chi-Quix, Chi-chac, Humetahá, Culbá i Cavinal. Esakinan ta nòmber di e lugánan kaminda nan a keda. I nan a buska pa sa unda tin lugá liber riba seru i den e siudatnan, pasobra tur huntu ya nan tabata hopi hende.
Ya esnan ku a bai Oriente pa risibí e poder destiná pa goberná segun e mandato sagrado, a muri kaba. Nan tabata bieu kaba ora nan a yega na kada un di e siudatnan. Nan no a kustumbrá ku e diferente lugánan ku nan a bishitá; nan a pasa masha trabou i sufri hopi pena i asta despues di hopi tempu nan no a yega na e pueblo di nan wela- i mayornan.

At’akí nòmber di e siudat kaminda nan a yega. 

(tradusí pa Lucille Berry-Haseth)