Popol Vuh IV, 5

I komo ya e kuater patriarkanan tabata presintí nan morto i nan fin, nan a duna nan yunan konseho. Nan no tabata sinti malu, nan no tabata sinti doló ni agonia ora nan a laga rekomendashon pa nan yunan.
I esakinan ta nòmber di nan yunan: Balam-Quitzé a haña dos yu hòmber, Qocaib ta nòmber di esun promé i Qocavib ta nòmber di e di dos yu hòmber di Balam-Quitzé, tawela i tata di esnan di Cavec.
I esakinan ta e dos yu hòmbernan ku Balam-Acab a engendrá, ata nan nòmber akí: Qoacul ta nòmber di esun promé di su yunan i Qoacutec e di dos yu hòmber di Balam-Acab, di esnan di Nihaib.
Mahucutah a haña un yu hòmber so, di nòmber Qoahau.
E tresnan ayá tabatin yu, pero Iqui-Balam no tabatin yu. Nan tabata realmente e sakrifikadónan, i asina ta nòmber di nan yunan.
Asina pues, nan a despedí di e yunan. Nan kuater tabata huntu i nan a kuminsá kanta, sintiendo tristesa den nan kurason; i nan kurason tabata yora segun nan ta kanta Camucú, nòmber di e kansion ku nan a kanta ora nan a despedí di nan yunan.
‘Oh nos yunan! Nos ta bai, nos lo bolbe: nos ta laga pa boso rekomendashon sano i konseho sabio. I pa boso tambe, kendenan a bini di nos Patria un tera leu, oh nos esposanan!’ asina nan a despedí di kada un di nan esposa, nan a despedí di kada un di nan. ‘Nos ta bai nos pueblo bèk, ya Nos Señor di biná (símbolo di despedida i di separashon), ta na su lugá, manifiesto ta den shelu. Nos ta bai emprendé e biahe di regreso, nos a kumpli ku nos mishon, nos dianan a terminá aki. Boso pensa, pues, riba nos, no saka nos fo’i boso memoria ni lubidá nos. Boso lo bolbe mira boso hogar i boso serunan, bai establesé ei, i amèn! Sigui boso kaminda i boso lo bolbe mira e lugá di unda nos a bini.’
E palabranan akí nan a pronunsiá ora nan a despedí. Kaba, Balam-Quitzé a laga un señal di su eksistensia: ‘Esaki ta un rekuerdo ku mi ta laga pa boso. Esaki lo ta boso poder. Mi ta despedí ku masha tristesa,’ el a agregá. E ora ei el a laga e señal di su ser, loke yama Pizom-Gagal. Su kontenido tabata invisibel, pasobra e tabata lorá i no por a habri loke e tabata lorá aden, komo no tabata mira niun kosé, ya ku niun hende no a mira ora a lor’é.
Di e maner’akí nan a despedí i mesora nan a desaparesé aya den kabes di seru Hacavitz.
Nan esposanan, ni nan yunan no a dera nan, pasobra niun hende no a mira kiko nan a hasi despues ku nan a desaparesé. Solamente a mira nan despedida klaramente, i asina esnan ku a keda a tesorá di manera spesial e Emboltura. Tabata rekuerdo di nan mayornan i inmediatamente nan a kima kopal (sensia kimá pa e promé kuater hefenan na salida di solo; e Señornan Prinsipal tabata kima kopal dilanti di Tohil ora nan tabata den orashon) pa honra e rekuerdo akí di nan mayornan.
I e ora ei e Señornan ku a bin okupá lugá di Balam-Quitzé, a krea tawela i mayornan di esnan di Cavec; pero nan yunan sí no a desaparesé, esnan ku yama Qocaib i Qocavib.
Asina ei nan kuater, nos promé tawela- i nos mayornan a muri; asina e patriarkanan a desaparesé, lagando nan yunan riba seru Hacavitz, aya kaminda nan yunan a keda.
I estando e pueblonan ya someté i nan grandesa a terminá, e tribunan ya no tabatin ningun poder i nan tur tabata biba dediká na sirbi tur dia.
Nan tabata kòrda riba nan mayornan; pa nan, gloria di e Emboltura tabata grandi. Hamas nan a habri loke e tabata lorá aden, sino ku nan a manten’é semper lorá i huntu ku nan. Nan a dun’é e nòmber: Envoltorio di Grandesa ora nan a ensals’é i pone nòmber pa loke nan mayornan a laga pa nan komo señal di nan eksistensia.

Asina, pues, tabata desaparishon i fin di Balam-Quitzé, Balam-Acab, Mahucutah i Iqui-Balam, e promé baronnan ku a bini di aya, di e otro un banda di laman, kaminda solo ta nase. Ta hopi tempu pasá nan a yega aki promé ku nan a muri, e ora ei nan tabata masha bieu kaba e hefe- i sakrifikadónan akí manera a yama nan.

(Tradusí pa Lucille Berry-Haseth)