Popol Vuh IV, 4

Ke men, ku Balam-Quitzé, Balam-Acab, Mahucutah i Iqui-Balam, tur tabata huntu riba seru ku nan muhé- i nan yunan ora e guerero- i e sòldánan a yega. E tribunan tabata konta entre diesseis mil i bintikuater mil alma.
Nan a rondoná henter e siudat, lansando gritu duru, armá ku flecha i eskudo, batiendo tambú, lansando gritu di guera, flùit, vosiferando, provokando pelea, ora nan a yega na pia di e siudat.
Pero e saserdote- i e sakrifikadónan no a spanta, nan tabata kontemplá tur kos for di rant di e muraya kaminda nan tabata na òrdu situá ku nan muhé- i nan yunan. Nan tabata blo pensa riba e esfuersonan i e gritunan di e tribunan subiendo na barika di seru.
Tabata falta poko ya pa e tribunan akí a basha bini bèrs drenta e siudat, ora nan ayariba a habri e kuater taparanan poné na rant di e siudat i manera un huma diki di abeha machu i maribomba a sali fo’i den e taparanan. I asina e guereronan a muri pa kousa di e insektonan ku a morde nan pòpchi di wowo i pega na nan nanishi, nan boka, pia- i brasanan.
‘Na unda nan ta?’ esnan ku a bai kohe nan i saka tur e abeha machu- i e maribombanan a puntra otro.
E insektonan di forma furioso tabata bai direktamente pa pika e pòpch’i wowonan, nan tabata ataká kada un di e hòmbernan; bon turdí pa e atakenan ya nan no por a usa nan flecha- i eskudonan ku tabata doblá na suela.
Ora nan a kai nan ta keda drumí na barika di seru i ya no ta sinti kon flecha- i hachanan ta heridá nan. Balam-Quitzé i Balam-Acab a usa solamente palu sin punta so pa bringa. Nan muhénan tambe a djòin bin mata. Ta un parti di nan so a bini bèk i tur e tribunan a sali na kareda. Pero e proménan ku nan a gara, nan a kaba ku nan, nan a mata nan; no ta poko hende a muri i esnan ku nan a pensa di persiguí no a muri, sino ta esnan ku e insektonan a ataká a pèrdè nan bida. No tabata obra di balentia tampoko, pasobra no ta e flechanan ni e eskudonan a mata nan.
E ora ei tur e tribunan a entregá. E pueblonan a baha kabes pa Balam-Quitzé, Balam-Acab i Mahucutah. ‘Tene piedat di nos, no mata nos!’ nan a sklama.
‘Masha bon. Ounke boso meresé di muri, boso ta bira nos sirbidó pa bida largu,’ asina a bisa nan.
Di e forma akí, realisá pa tur nos promé mama- i nos tatanan, derota di tur e tribunan a bai; antó esaki a pasa aya, riba seru Hacavitz, manera e yama awor. Ta riba e seru akí nan a funda nan bibá, kaminda nan a multipliká, nan a engendrá nan yu muhénan i nan a duna bida na nan yu hòmbernan, riba seru Hacavitz.
Ta di komprondé ku nan tabata masha kontentu ku nan a vense tur e tribunan, esta esnan ku nan a derotá aya den kabes di seru. Asina ta e forma ku nan a derotá e tribunan, tur e tribunan. Despues di e viktoria akí nan kurason a trankilisá. I nan a konta nan yunan ku, ora e tribunan ker a mata nan, ya nan propio morto tabata serka.

I awor nos ta bai konta di morto di Balam-Quitzé, Balam-Acab, Mahucutah i Iqui-Balam, asina ta nan nòmber.

(tradusí pa Lucille Berry-Haseth)