Popol Vuh IV, 2

Ata akí e manera ku robo di hende di e tribunan di Vuc Amag a kuminsá, efektuá pa Balam-Quitzé, Balam-Acab, Mahukutah i Iqui-Balam.
Despues a bini matansa di e tribunan. Tabata kue un hende ora e so ta kanando, o dos ora nan ta kanando, i no tabata konosí ki ora ta kue nan, i mesora ta bai sakrifiká nan dilanti di Tohil i Avilix. Despues ta santifiká kaminda di kana ku nan sanger i ta pone nan kabes separadamente na sierto distansia  fo’i otro kant’i kaminda. Anto e tribunan ta bisa: “Tiger a kome nan”. I nan ta papia asina pasobra a laga marka manera pata di tiger, ounke no tabatin tiger niun kaminda.
Ya ta hopi hende nan a hòrta, pero e tribunan no a duna nan kuenta, sino muchu mas despues.
‘Si lo ta Tohil ku Avilix ta esnan ku ta introdusí nan mes entre nos? Nan mester ta esnan ku e saserdote- i e sakrifikadónan ta alimentá. Unda nan kasnan lo ta? Ban sigui marka di nan pia,’ tur e pueblonan a sugerí.
E ora ei nan ku nan a reuní pa deliberá. Mesora nan a kuminsá sigui e markanan di pia di e saserdote – i sakrifikadónan, pero e markanan akí no tabata kla. Tabata marka di pata di fiera, di tiger loke nan tabata mira, pero e markanan ei no tabata klaru. E promé markanan ei no tabata kla pa por a distinguí nan, pasobra nan tabata kontrario. Manera marka pa un kaminante bruha i pèrdè, i e kaminda no tabata klaramente visibel. A forma un neblina, a forma un yobida pretu ku a kousa hopi lodo; i awa a kuminsá finfin. Esaki ta loke e pueblonan tabata pas’aden. I nan kurason a kansa di buska i persiguí e diosnan riba kaminda, pasobra komo ser di Tohil, Avilix i Hacavitz tabata asina grandi, nan tabata alehá bai te leu den kabes di e serunan, den besindat di e pueblonan ku nan tabata mata.
Asina sekuestro di hende a kuminsá ora hèksnan tabata kue e tribunan riba kaminda bai sakrifiká nan dilanti di Tohil, Avilix i Hacavitz; pero nan propio yunan nan tabata salba i laga nan aya riba seru.
Tohil, Havilix i Hacavitz tabatin aparensia di tres yònkuman i nan tabata kana pa virtut mágiko di piedra. Tabatin un riu kaminda na su oria nan tabata baña i ta ei so nan tabata aparesé. P’esei nòmber dje lugá tabata Den Baño di Tohil, i esaki tabata nòmber di e riu. Ku frekuensia e tribunan tabata mira nan ei, pero nan tabata desaparesé inmediatamente ku pueblo mira nan.
A bin haña notisia di unda Balam-Quitze, Balam-Acab, Mahucutah i Iqui-Balam tabata, i mesora e tribunan a reuní pa disidí kon ta e manera pa kaba ku nan.
Na promé lugá e tribunan ker a reuní tokante e forma di vense Tohil, Avilix i Hacavitz. I tur e saserdote- i sakrifikadónan a bisa e tribunan:
‘Boso tur lanta, yama tur hende, sòru pa no tin grupo, ni unu ni dos entre nos ku ta ked’atras.’
Tur hende a reuní, na gran kantidat nan a reuní i nan ku nan a deliberá. I un a puntra otro: ‘Kon nos ta hasi vense kichénan di e famia Cavec(ku tabata e famia mas poderoso di e kichénan) pa kende nan kulpa nos yunan i nos sirbidónan ta kabando? Nos no sa kon destrukshon di hende ta tuma lugá. Si nos mester kaba na muri pa medio di e sekuestronan akí, amèn; i si poder di Tohil, Avilix i Hacavitz ta dje grandi ei, e ora ei laga e Tohil akí ta nos dios i ohalá boso hasié boso katibu! No ta posibel ku nan ta vense nos. No tin entre nos basta hòmber? I Cavecnan no ta hopi hende,’ nan di, ora nan tur tabata den reunion.
I algun di nan di, dirigiendo nan na e tribunan ora nan a papia: ‘Ken a mira esnan ku ta baña den riu tur dia? Si ta Tohil, Avilix i Hacavitz, nos ta vense nan promé, i despues nos ta kuminsá ku derota di e saserdote- i e sakrifikadónan.’ Esaki ta loke vários di nan di ora nan a papia.
‘Pero kon nos lo vense nan?’ nan a bolbe puntra.
‘Esaki lo ta nos manera di vense nan. Komo nan tin aspekto di mucha hòmber hóben, yònkuman ora nan laga hende mira nan den awa, nos ta laga dos dams hóben realmente bunita i sumamente amabel reis riba nan, pa lanta serka nan deseo di poseé e damsnan,’ asina nan a kontestá.
‘Masha bon. Ban, pues, ban buska dos mosa masha bunita mes,’ nan di i mesora nan a bai buska nan yu muhénan. I esakinan tabata realmente di un beyesa eksepshonal.
Despues nan a duna e dams bunitanan akí instrukshon: ‘Bai, boso bai laba paña na riu, i si boso mira tres yònkuman, kita paña nan dilanti, i si nan kurason deseá boso, yama nan! Si nan bisa: Nos tin pèrmit di yega serka boso?, “Sí”, boso ta rospondé nan. I ora nan puntra: “Di unda boso ta bini, yu muhé di ken boso ta?”, boso ta kontestá: “Nos ta yu muhé di e Señornan”.
Despues boso ta bisa nan: “Duna nos un prenda di boso.” I si nan duna boso un òf otro opheto i nan lo ke sunchi boso na kara, entregá boso di bèrdat na nan. I si boso no entregá boso na nan, nos ta mata boso.’ Despues nos kurason lo ta satisfecho. ‘Ora boso tin e prenda, tres’é akí, i esaki lo ta prueba, segun nos, ku nan a yega íntimamente serka boso.’
Asina e Señornan di ora nan a konsehá e dos damsnan. Ata nan nòmber: Ixtah tabata nòmber di un di e damsnan, Ixpuch nòmber di un otro i Quibatzunah di e otro. I a manda e tres damsnan bai riu, na baño di Tohil, Avilix i Hacavitz. Esei ta loke tur e tribunan a disponé.
Mesora nan a bai, nèchi bistí i dòrná, anto nan tabata lusi realmente masha bunita ora nan a bai kaminda Tohil tabata baña, pa e mira nan i pa nan laba paña.
Ora nan a bai, e Señornan tabata masha kontentu ku nan a manda nan dos yu muhénan.
Asina nan a yega riu, nan a kuminsá laba paña. Anto nan a kita sunú i nan dos tabata labando na e piedranan di e riu ora Tohil a yega ku Avilix i Hacavitz. Esakinan a yega na oria di e riu i nan a keda un poko sorprendí di mira e dos mosanan labando paña i e damsitanan akí a sinti bèrgwensa mesora ku Tohil a yega. Pero Tohil no a antohá pa e tin e tres mosanan. E or’ei el a puntra nan: ‘Di unda boso a bini?’ Asina el a puntra nan i el a agregá: ‘Kiko ta loke boso ke ku boso a yega te aki na oria di nos awanan?’
I nan a kontestá: ‘Ta e Señornan a manda nos akí. “Bai buska kara di Tohilnan i papia ku nan”, e Señornan a manda nos; i trese despues prueba ku boso a mira nan kara”, nan a bisa nos. Asina e mucha muhénan a papia, dunando di konosé e motibu di nan yegada na e riu.
Awor bon, loke e tribunan tabata ke ta pa nagualnan di Tohil (e indionan pa boluntat por a transformá den persona òf animal) violá e damsnan. Pero Tohil, Avilix i Hacavitz a bisa nan, papiando di nobo ku Ixtah, Ixpuch i Quibatzunahku ta nòmber di e tres damsnan: ‘Ta bon, boso lo bai ku prueba di nos kòmbersashon. Warda un ratu i despues boso lo risibí e prueba pa duna e Señornan,’ asina a bisa nan.
Kaba, e saserdote- i e sakrifikadónan a reuní pa deliberá i nan a bisa Balam-Quitzé, Balam-Acab, Mahucutah i Iqui-Balam: ‘Pinta tres kapa, i pinta riba nan señal di boso ser pa esakinan yega serka e tribunan, esta pa e tres damsnan ku ta labando paña hiba nan. Entregá e damsnan akí e tres kapanan,’ nan a bisa Balam-Quitzé, Balam-Acab i Mahucutah.
Mesora nan tres a kuminsá pinta. Promé, Balam-Quitzé a pinta un tiger; el a pinta esaki riba superfisie di e manta. Kaba Balam-Acab a pinta figura di un águila riba superfisie di e manta; i despues Mahucutah a pinta tur kaminda abeha i maribomba riba e tela. I nan tres a pinta i kaba nan pinturanan, tres piesa nan a pinta.
Despues di esei nan a bai entregá Ixtah, Ixpuch i Quibatzunah, asina nan yama, e kapanan i Balam-Quitzé, Balam-Acab i Mahucutah a bisa nan: ‘At’akí prueba di boso kòmbersashon; hib’é pa e Señornan: “Efektivamente Tohil a papia ku nos,” boso ta bisa, “ata akí e prueba ku nos ta trese”, boso ta bisa nan, i boso ta manda nan bisti e pañanan ku boso lo duna nan.’ Esaki ta loke nan a bisa e damsnan ora nan a yama nan ayó. Mesora nan a bai, hibando e kapanan pintá.
Ora e damsnan a yega, e Señornan a bira sumamente kontentu ora nan a mira nan kara i prueba di loke a pidi nan, kologá na nan brasa.
‘Boso a mira kara di Tohil?’ a puntra nan.
‘Sí, nos a mir’é,’ Ixtah, Ixpuch i Quibatzunah a rospondé.
‘Masha bon. I boso a trese e prenda, no?’ E Señornan a puntra, pensando ku esaki lo ta señal di nan piká.
E ora ei e hóbensitanan a mustra e kapanan pintá, nan tur na tiger i águila i yen di abeha i maribomba, pintá riba superfisie di e tela ku tabata bria nan dilanti. Mesora a drenta nan gana di bisti e kapanan.
E tiger no a hasié nada ora e Señor a tira e promé kapa pintá riba su lomba. Despues e Señor a bisti e di dos ku e pintura di águila. E Señor a sintié masha bon kuné bistí. Asina el a kana pasa mira nan tur. Despues el a kita su falda dilanti di tur hende i bisti e di tres kapa pintá. El a bisti e di tres kapa ku e abeha- i e maribombanan riba dje. Anto mesora e machunan di abeha i e maribombanan a pika su karni. I komo e no por a soportá ni tolerá piká di e animalnan, e Señor a kuminsá grita duru debí na e animalnan di kua nan figura tabata pintá riba e tela, e pintura di Mahucutah ku ta e di tres kapa ku nan a pinta.

Asina a vense nan. Mesora e Señornan a rabia ku e damsnan: ‘Ta ki sorto di paña esakinan ta ku boso a trese? Ta unda boso a sali ku nan, demoñonan?’ Nan a bisa e damsnan ora nan a rabia ku nan. Tohil a vense tur e pueblonan.
Awor bon, loke nan tabata ke, ta ku Tohil lo a bai dibertí ku Ixtah, Ixpuh i Quibatzunah i ku esakinan lo a bira muhé di bida alegre, e tribunan a kere ku nan lo sirbi nan di tentashon. Pero no tabata posibel pa nan kanta viktoria, danki na e hòmbernan maravioso, Balam-Quitzé, Balam-Acab, Mahucutah i Iqui-Balam.

(tradusí pa Lucille Berry-Haseth)