Popol Vuh IV, 11

Awor nos ta bai menshoná nòmber di kas di Dios. A duna e kas di e mes manera nòmber di e dios. E Gran Edifisio di Tohil tabata nòmber di e edifisio di e tèmpel di Tohil, di esnan di Cavec. Avilix tabata nòmber di e edifisio di e tèmpel di Avilix, di esnan di Nihaib; i Hacavitz tabata nòmber di e edifisio di e tèmpel di e dios di Ahau-Kichénan.
Tzutuhá, ku hende ta mira na Cahbahá, ta nòmber di un gran edifisio, den kua tin un piedra ku tur e Señornan di Kiché ta adorá i tur e pueblonan tambe ta adorá.
E pueblonan ta hasi nan sakrifisionan promé na Tohil i despues nan ta bai mustra rèspèt na Ahpop i Ahpop-Camhá. Kaba nan ta bai presentá nan pluma bunitanan i rindi nan tributo na rei. I e reinan ku nan tabata sostené ta Ahpop i Ahpop-Camhá, kendenan a konkistá nan siudatnan.
Gucumatz i Cotuhá,  tabata gran Señor i hòmber di naturá asombroso, i e reinan espektakular akí tabata sa si lo bin tin guera, pasobra nan tabata klarevidente. Nan por a mira si ta bin tin un gran tasa di mortalidat òf hamber, o si ta bin surgi pleitu. Nan tabata sa bon unda nan por a haña tur e informashonnan akí: tabata eksistí un buki yamá Popol Vuh, ku nan tabata konsultá.
Pero no ta solamente den e sentido akí naturalesa di e Señornan tabata grandi. Grandi tabata tambe e echo ku nan tabata yuna, i esaki nan tabata hasi komo gradisimentu ku a krea nan i ku nan tin nan reino. Nan tabata yuna durante largu tempu i nan tabata ofresé sakrifisio na nan diosnan. At’akí e forma ku nan tabata yuna: nuebe hòmber ta yuna i nuebe hòmber ta hasi sakrifisio i kima sensia. Diestres hòmber mas ta yuna i otro diestres ta trese ofrenda i kima sensia pa Tohil. Dilanti di nan dios nan tabata alimentá únikamente ku fruta, zapote, matasano i jocote. I nan no tabatin tortia pa kome.
Sea ta diesshete hende ku ta hasi sakrifisio, o ta dies ku ta yuna, realidat ta ku nan no ta kome. Nan tabata kumpli ku nan reglanan sagrado, i asina nan tabata demostrá nan naturalesa di Señor.
Tampoko nan no tabatin muhé ku ken nan por a drumi, nan tabata nan so, na yuna. Nan tabata den kas di nan dios, ta pasa henter dia den orashon, kimando sensia i hasiendo sakrifisio. Asina nan tabata keda for di ora nochi sera te mardugá, lamentando den nan kurason i den nan pechu, i ku nan kara alsá na shelu, pidiendo felisidat i bida pa nan yu- i nan sirbidónan i a la bes pa nan reino.
At’akí e petishonnan na nan dios, ora nan ta resa: i esaki tabata e súplika di nan kurason:
‘Oh abo, beyesa di dia! Abo, Huracán; abo Kurason di Shelu i di Tera! 
Abo, fuente di abundansia, i  dunadó di yu muhé i yu hòmber! Trese bo gloria i bo rikesa aki; konsedé mi yunan i mi sirbidónan bida i desaroyo; laga esnan ku tin di alimentá i sostené bo krese i multipliká; esnan ku ta invoká bo riba kaminda, den kunuku, na oria di riu, i riba baranka, bou di palu, bou di liannan.
Duna nan yu muhé i yu hòmber. Libra nan di desgrasia i mala suerte, no laga gañadó drenta serka nan ni nan tras ni nan dilanti. No laga nan sukumbí, ni sufri leshon, no laga nan forniká, ni laga hustisia tin di kondená nan. Evitá ku nan ta kai na bahada o na subida di kaminda. No laga nan topa opstákulo nan tras ni nan dilanti, ni nada ku lo por gòlpia nan. Konsedé nan kaminda bon, bunita i lizu. No laga mala suerte toka nan ni desgrasia pa bo kousa, ni pa bo bruheria.
Laga eksistensia di esnan ku ta duna bo sustento i ta duna bo kuminda na boka, den bo presensia, ta bon; Kurason di Shelu, abo, Kurason di Tera, Bohoti sagrado di Mahestat. I abo, Tohil; abo, Avilix; abo, Hacavitz, arko di shelu, superfisie di tera, e kuater rinkonnan, e kuater puntonan kardinal. Laga tin pas i trankilidat so dilanti di bo boka, den bo presensia, oh Dios!’
Asina e Señornan tabata papia, miéntras den e tèmpel tabatin e nuebe saserdotenan, e diestres hòmbernan i e otro diesshete hòmbernan ta yuna. Nan tabata yuna durante dia i nan kurason tabata lamentá pa nan yunan i nan sirbidónan i pa tur nan esposanan, ora kada un di e Señornan ta hasi su ofrenda.
Esaki tabata preis di e bida felis, preis di poder o sea di gobernashon di Ahpop, Ahpop-Camhá, Galel i Ahtzic-Vinac.  Dos dos nan tabata subi trono, turnando unu tras di otro pa karga riba nan lomba e pueblo i henter e nashon kiché.
Unu so tabata orígen di nan tradishon i orígen di e kustumber di kuida i alimentá, i unu tambe tabata orígen di e tradishon i e kustumbernan semehante na esunnan di esnan di Tamub- i Ilocabnan, di  esnan di rabinalero- i  cakchikelnan, di esnan di Tziquinahá, Tuhalahá i Uchabahá. I ta un solo tronkon nan tabata, un solo famia; i ei na tera kiché, nan tabata tende tur loke e hendenan ei tabata hasi.
Pero esei no tabata e úniko manera ku nan a reina. Nan no a malgastá e regalonan di esnan ku a alimentá i sostené nan; pero nan a konsumí i bebe nan. Ni nan no a kumpra nan: nan a gana i a tuma nan imperio, nan poder i nan dominio.
Asina mes nan a yega na someté kampo i siudat. E pueblonan chikí i grandi tabata paga tributo na gran kantidat: nan a trese piedra presioso i metal,  nan a trese miel di abeha, pulsera, pulsera  di esmeralda i otro piedra presioso i nan a trese koyar trahá di pluma blou, regalo di tur e pueblonan. Tur esaki tabata yega den presensia di e gran reinan: Gucumatz, Cotuhá, i tambe pa Quicab i Cavizimah; Ahpop, Ahpop-Camhá, Galel i Ahtzic-Vinac.
No tabata poko loke nan a hasi, ni tabata poko e pueblonan ku nan a konkistá. Hopi rama di e pueblonan a yega pa paga tributo na e Kichénan; yen di duele nan a bini pa entregá esaki. Sin embargo nan poder no a krese di un dia pa otro. Tabata Gucumatz kende a duna prinsipio na engrandisementu di e reino. Asina su splendor i tambe e engrandisementu di e pueblo kiché a kuminsá.
Awor nos lo enumerá e generashonnan di e Señornan i nan nòmber, nos ta menshoná di nobo tur e Señornan. 

(tradusí pa Lucill Berry-Haseth)