Popol Vuh IV, 10

Ata akí awor nòmber di e di seis generashon di rei. Nan tabata dos gran rei. Gag-Quicab ta nòmber di e promé rei i e otro ta Cavizimah, i nan a hasi kos grandi i nan a engrandesé Kichénan, pasobra ta sigur ku nan ta di naturalesa sensashonal.
Ata akí destrukshon i divishon di e áreanan rural i e pueblonan di e nashonnan bisiña, chikitu i grandi. Entre nan tabata e nashon ku antiguamente tabata patria di cakchiquelnan, loke aktualmente ta Chuvilá, i esnan di Rabinal, Pamacá, patria di esnan di Caoque, Zaccabahá, i e siudatnan di esnan di Zaculeu, di Chuvi-Miquiná, Xelahú, Chuvá-Tzac i Tzolohché.
E pueblonan akí tabata odia Quicab. El a drenta den guera ku nan i ta sigur ku el a konkistá i destruí e áreanan rural i e siudatnan di rabinaleronan, cakchiquelnan i esnan di Zaculeu; Quicab a yega i vense tur e pueblonan, anto e sòldánan di Quicab a hiba armanan di e rei leu. Un òf dos tribu no a trese tributo, e ora ei e rei a baha riba tur e siudatnan i nan mester a hiba e tributo pa Quicab i Cavizimah.
A hasi nan katibu, a heridá nan i a fiha nan kontra palu di mata i ya nan no tabata konosé gloria, i no tabatin poder. Asina destrukshon di e siudatnan a bai ku di bia nan a basha abou te pareu ku suela.
Manera e rayo ku ta heridá i destrosá baranka, asina den un momentu e pueblonan vensí a yena di teror.
En frente di Colché, komo señal di un siudat ku el a destruí, tin awor un volkan di piedra, manera kasi kòrtá ku e parti skèrpi di un hacha. E ta situá aya na e kosta yamá Petatayub, i hende ku ta pasa eibanda ta mir’é manera testimonio di e balentia di Quicab.
No por a mat’é ni vens’é, pasobra e tabata realmente un hòmber di balentia, i tur e pueblonan tabata rindi tributo n’e.
I ora tur e Señornan a kaba di reuní i deliberá, nan a bai fortifiká e barankanan i e siudatnan, únabes nan a konkistá e siudatnan di tur e tribunan. Kaba e vigilantenan a sali pa opservá e enemigu i nan a funda kampamentu manera pueblo na e lugánan okupá: ‘Por si akaso e tribunan bolbe bin okupá e siudat,’ asina nan di ora tur e Señornan a reuní i deliberá.
Mesora nan a sali bai okupá nan puesto. ‘Esakinan lo ta nos fòrti- i nos pueblonan, nos muraya- i defensanan; aki nos ta proba nos balentia i nos hombresa,’ tur e Señornan di ora nan a dirigí nan na e puesto señalá na kada parsialidat pa bringa nan enemigunan.
I ora tur e señornan a kaba di reuní, nan a bai fortifiká e baranka- i e siudatnan, ‘Boso bai ayá, pasobra ya aya ta nos tera! No tene miedu si ainda ei tin enemigu ku ke bin mata boso: kore purá bin informá nos i ami lo bai mata nan!,’ Quicab di ora el a despedí di nan den presensia di Galel i Ahtzic-Vinac.
E ora ei e flecheronan i e chincheronan (guerero ku ta tira ku chincha) manera nan yama, a bai. E ora ei e welanan i e mayornan di henter e nashon kiché a bai biba den diferente region. Nan tabata den tur e serunan i nan tabata manera wardadó i vigilante di guera. Nan no tabata di orígen distinto ni nan no tabatin diferente dios, ora nan a bai. Nan a bai solamente pa fortifiká nan siudatnan.
E ora ei tur esnan di Uvilá a bai, tur esnan di Chulimal, Zaquiyá, Xahbaquieh, Chi-Temah, Vahzalahuh i esnan di Cabracán, Chabicac-Chi-Hunahpú, i esnan di Macá, esnan di Xoyabah, esnan di Zaccabahá, esnan di Ziyaha, esnan di Miquiná, esnan di Xelahuh, i esnan ku ta biba na kosta. Nan a sali bai vigilá guera i protehá tera, ora nan a bai ku òrdu di Quicab i Cavizimah, kendennan tabata Ahpop, Ahpop-Camhá, i Galel i Ahtzic-Vinac, ku ta e kuater Señornan.
A manda nan pa vigilá e enemigunan di Quicab i Cavizimah, nòmber di e reinan, tur dos di e Kas di Cavec, di Queemá, nòmber di e Señor di esnan di Nihaib, i di Achac-Iboy, nòmber di e Señor di esnan di Ahau-Kiché. Esakinan ta nòmber di e Señornan ku a manda nan i a despachá nan ora nan yunan i nan sirbidónan a bai den seru, kada un di e serunan.
Nan a bai mesora i nan a trese esklabo i prizonero pa Quicab i Cavizimah, Galel i Ahtzic-Vinac. E flecheronan i esnan ku a usa chincha a lucha, tumando hende komo katibu i prizonero. Defensornan di e puestonan tabata berdadero héroe, i e Señornan a duna nan hopi premio ora nan a regresá bin entregá tur nan katibu- i nan prizoneronan.
Despues, ku òrdu di e Señornan Ahpop, Ahpop-Camhá, Galel i Ahtzic-Vinac a reuní pa deliberá, i nan a disidí i bisa ku esnan ku tabat’ei promé ta e proménan pa risibí e dignidat di ta representante di su famia. ‘Ami ta Ahpop! Ami ta Ahpop-Camhá!, ami lo tin e dignidat di Ahpop: miéntras ku abo, Ahau-Galel, lo tin e dignidat di Galel,’ asina tur e Señornan di ora nan a reuní pa deliberá.
Meskos nan di Tamub i nan di Ilocab a hasi; igual tabata e sirkunstansia di e tres gruponan kiché ora a nombra kapitan i a elevá pa noblesa nan yu- i nan sirbidónan pa promé biaha. Asina ei tabata resultado di e reunion. Pero no a hasi nan kapitan aki na region di Kiché. E seru kaminda a hasi e yunan i e sirbidónan kapitan pa promé be, tin su nòmber, ora a manda nan tur, kada un su seru, i nan tur a bini huntu. Xebalax i Xecamax ta nòmber di e serunan kaminda a hasi nan kapitan i nan a risibí nan kargo. Esaki a pasa na Chulimal.
Asina Ahpop i e Ahpop-Camhá, Galel i Ahtzic-Vinac a disidí nombramentu, promoshon i distinshon di e binti Galelnan i di e binti Ahpopnan. Tur e Galel-Ahpopnan, djesun Nim-Chocoh, i Galel-Ahau, Galel-Zaquic, Galel Achih, Rahpop-Achih, Rathzalam-Achih, Utzam-Achih a risibí nan dignidatnan, nòmbernan ku e guereronan a risibí ora nan a haña título i distinshon riba nan trono- i asientonan, siendo e promé yu hòmber- i e feudatarionan di Nashon Kiché, su miradornan, su oyentenan, e flecheronan, e tiradónan di chincha, murayanan, portanan, fòrtinan i bastionnan di e Kiché.
Asina tambe e Tamub- i Ilocabnan a hasi; nan a nombra i elevá pa noblesa e promé yunan i sirbidónan ku tabatin na kada lugá.
Esaki, anto, tabata e orígen di e Galel-Ahpopnan i e dignidatnan ku ta eksistí awor den kada un di e lugánan akí. Asina tabata nan orígen ora nan a surgi. Ta via Ahpop i Ahpop-Camhá, Galel i Ahtzic-Vinac nan a aparesé. 

(tradusí pa Lucille Berry-Haseth)