Popol Vuh IV, 1

Awor bon, unu unu tabata funda hopi pueblo i diferente rama di e tribunan a bai ta reuní i grupa huntu kant’i kaminda, esta kamindanan ku nan mes a habri.
Pa loke ta Balam-Quitzé, Balam-Acab, Mahucutah i Iqui-Balam, nan paradero no tabata konosí. Pero ora nan mira e tribunan ku ta pasa riba kaminda, mesora nan ta grita for di den kabes di e serunan, lansando gritu manera di coyote i lamento di pushi di mondi, i imitando bramido di leon ku tiger.
I e tribunan, mirando e kosnan akí ora nan ta riba kaminda di: ‘E gritunan ei ta di coyote, di pushi di mondi, di leon i di tiger.’ Nan ke laga pasa ku no ta trata di hende, pa tur e tribunan kere, i nan ta hasi esaki djis pa engañá nos pueblonan. Nan kurason mester ta deseá algu. Ta sigur ku nan no ta spanta di loke nan ta hasi. Nan tin algu na pekel ku e bramido di leon, ku e bramido di tiger ku nan ta lansa ora nan mira unu o dos hende ta kana; loke nan ke ta kaba ku nos.
Tur dia e saserdotenan ta yega kas serka nan kasá, nan ta hiba solamente yu di mámundènguè i di maribomba i yu di abeha pa duna nan kasá.
Tur dia tambe nan ta yega dilanti di Tohil, Avilix i Hacavitz i den nan kurason nan ta bisa: ‘Ata Tohil, Avilix i Hacavitz. Ta sanger di biná i di para so nos por ofresé nan; nos ta saka sanger for di nos orea i brasa so. Laga nos pidi Tohil, Avilix i Hacavitz forsa i vigor. Kiko nan lo ta bisa di e mortonan di pueblo, hendenan ku un pa un nos ta bai mata?’ asina nan tabata komentá entre nan ora nan ta den presensia di Tohil, Avilix i Hacavitz.
Kaba nan a heridá orea- i brasanan dilanti di e divinidat i nan a rekohé sanger den un glas ku nan a pone banda di e monumentonan di piedra. Pero den realidat, nan no tabata piedra, sino ku nan a representá Tohil, Avilix i Hacavitz, kada un ku un figura di yònkuman.
E hóbennan tabata bira kontentu ku e ofrenda di sanger di e saserdote- i sakrifikadónan ora nan yega ku e muestra akí di nan trabou:
‘Sigui nan markanan (esunnan di e animalnan ku nan tabata sakrifiká) t’aya boso salbashon ta!
Di aya el a bini, di Tulán, dia boso a trese nos,’ a bisa nan, ora a duna boso e kueru yamá Pazilizib, untá ku sanger: ‘laga su sanger drama i laga esaki ta e ofrenda pa Tohil, Avilix i Hacavitz.’

(tradusí pa Lucille Berry-Haseth)