Popol Vuh III, 9

Ata aki, pues, ourora, i aparishon di solo, luna i strea.
Balam-Quitzé, Balam-Acab, Mahucuctah i Iqui-Balam a bira sumamente kontentu ora nan a mira Strea (o sea Planeta) di mardugá. El a sali ku kara radiante, promé ku solo a sali.
Mesora nan a ofresé e sensia pa kima ku nan a trese for di Oriente, i nan a habri e tres prezèntnan sagrado.
E sensia ku Balam-Quitzé a trese yama Mixtán-Pom; e sensia ku Balam-Acab a trese yama Caviztán-Pom; i esun ku Mahacutah a trese yama Cabauil-Pom. Nan tur tres a bini ku sensia. Nan a kima sensia i mesora nan a kuminsá balia kara pa Oriente.
Baliando nan tabata yora di alegria i nan a kima sensia, nan presioso sensia. Despues nan a yora pasobra nan no tabata mira ni kontemplá ainda nasementu di solo.
Den esei, inmediatamente solo a sali. Tur animal chikí i grandi a bira kontentu; ku salida di solo nan a lanta fo’i soño, esunnan na e partinan fértil di riu, esunnan riba baranka i e otronan den kabes di seru; tur a dirigí nan bista aya kaminda solo ta sali.
Despues leon ku tiger a brama. Pero promé a tende kanto di e para ku yama Queletzú. Realmente ta tur animal mes a bira kontentu i águila a habri ala, rei zope, e para chikitunan i e para grandinan.
Saserdote- i sakrifikadónan tabata na rudia; alegria di e saserdote- i e sakrifikadónan i esnan di Tamub- i Ilocabnan i esnan di rabinal- i cakchiquelnan, esnan di Tziquinahá i esnan di Tuhalhá, Uchabahá, Quibahá, esnan di Batena i esnan di Yaqui Tepeu, tur ta tribu ku te awendia ta eksistí. I no tabata posibel pa konta kantidat di hende. Na e mes tempu ourora a iluminá tur e tribunan.
Djis asina superfisie di tera a seka, pa motibu di presensia di solo. Solo tabata parse un ser humano ora el a manifestá, i su kara tabata manda vlam ora superfisie di tera a seka.
Promé ku solo sali, superfisie di tera tabata húmedo i lodoso, promé ku solo sali; pero solo a sali, subi, i kima brabu. Su kalor tabata insoportabel. Solo prehistóriko a manifestá, ora el a nase so i el a keda fiho manera un spil. Siertamente no tabata e mes solo ku nos ta mira, asina su historianan ta konta.
Inmediatamente despues Tohil, Avilix i Hacavitz, huntu ku e sernan sagrado ku ta leon, tiger, kolebra, kantil (serpiente venenoso) i duende a bira piedra. Nan brasanan a gara brasanan di e palunan ora solo, luna i strea a aparesé. Nan tur meskos tambe a bira piedra. Kisas awendia nos lo no tabata bibu si no tabata pa kousa di e animalnan hambriento, leon, tiger, kolebra, kantil i duende, kisas awor nos gloria lo no a eksistí si e promé animalnan no a bira piedra pa obra di solo.
Ora solo a sali, kurason di Balam-Quitze, Balam-Acab, Mahucutah i Iqui-Balam a yena di alegria. Nan a bira sumamente kontentu ora dia a habri. No ta hopi hende tabatin ei; ta djis algun hende tabatin riba seru Hacavitz. Ei dia a habri pa nan, ei nan a kima sensia i balia kara pa Oriente, for di kaminda nan a bini. Ei ta kaminda nan seru- i vayenan tabata, aya for di kaminda Balam-Quitze, Balam-Acab, Mahucutah i Iqui-Balam, manera tabata nan nòmber, a bini.
Pero ta aki ta kaminda nan a multipliká, den seru, i esaki tabata nan siudat; aki nan tabata ademas ora solo, luna i strea a sali, ora dia a habri i klaridat a iluminá superfisie di tera i di mundu henter. Aki tambe nan kanto ku yama Camucú a kuminsá; nan a kanta, pero ta e doló di nan kurason i nan entraña so nan a ekspresá den nan kanto:

‘Ai di nos! Na Tulán nos a pèrdè otro,
nos a separá, i aya
nos rumannan mayor i menor a keda.
Ai, nos a mira solo!,
pero unda nan ta awor
ku ya dia a habri?’

asina nan tabata bisa e saserdote- i sakrifikadónan di yaquinan.
Pasobra realidat ta ku, esun ku yama Tohil ta e mes dios di yaquinan, di kende su nòmber ta Yolcuat-Quizalcuat (Yolcuat = kolebra kaskabel; Quetzalcóatl = kolebra ku pluma bèrdè). 
‘Nos a separá aya na Tulán, na Zuiva, djaya nos a sali huntu i ta aya a krea nos rasa tempu nos a bini,’ asina nan tabata papia entre nan.
E ora ei nan a kòrda nan rumannan mayor i nan rumannan menor, yaquinan kendenan solo a sali na e pais ku awe yama México. Tabatin tambe un kantidat di hende ku a keda aya na Oriente, yamá Tepeu Olimán, esnan ku a keda ayá, asina historia ta konta.
Gran aflikshon nan a sinti den nan kurason aya na Hacavitz; mes sintimentu Tamub- i Ilocabnan kendenan tambe tabata aya, a sinti aya den e boske ku yama Amac-Tan, kaminda solo a sali p’e saserdote- i e sakrifikadónan di Tamub i nan dios, ku tabata e mes Tohil, pues tabata e mes nòmber di e tres ramanan di e pueblo kiché. E ta nòmber tambe di dios di rabinaleronan, pues tin tiki diferensia ku e nòmber Huntoh, pasobra ta asina e dios di rabinaleronan yama; p’esei nan ta bisa ku nan lo ker a igualá nan lenga ku esun di Kichénan.
Awor bon, lenga di cakchiquelnan ta diferente, pasobra tempu nan a bini djaya di Tulán-Zuiva, nòmber di nan dios tabata diferente. Totzivá Chimalcán tabata nòmber di nan dios, i awe nan ta papia un lenga diferente; anto famianan Ahpozotzil i Ahpoxá manera nan yama, tambe ta di nan dios nan a tuma e nòmber.
Lenga di e dios tambe a kambia, ora, aya na Tulán, den e piedra sagrado, a entregá nan nan dios; su lenga a transformá ora den skuridat nan a sali  for di Tulán. Anto ora tur e tribunan tabata huntu, dia a habri i su ourora a resplandesé pa nan tur, a reuní e nòmbernan di e diosnan di kada tribu. 

(tradusí pa Lucille Berry-Haseth)