Popol Vuh III, 8

I atrobe nan dios a papia ku nan. E ora ei Tohil, Avilix i Hacavitz a papia ku Balam-Quitzé, Balam-Acab, Mahucutah i Iqui-Balam:
‘Ban pa kaba, lant’ariba pa kaba, ban fo’i djaki, hiba nos un lugá sekreto! Mainta ya ta den habri. Lo no ta un desgrasia pa boso si enemigunan atrapá nos entre e murayanan akí kaminda boso, saserdote- i sakrifikadónan tin nos wantá? Ke men antó, pone kada un di nos na un lugá sigur,’ asina nan di ora nan a papia.
‘Masha bon. Nos ta bai, nos lo bai buska kaminda tin boske,’ nan tur a kontestá.
Kaba, kada ken a tuma su dios, karg’é riba lomba. Nan a hiba Avilix na e baranka ku nan a duna e nòmber Euabal-Ziván, e baranka enorme di e boske ku awor nos ta yama Pavilix, i ei nan a lag’é. Riba e baranka akí Balam-Acab a lag’é.
Ku sierto sekuensia a bai lagando e diosnan. Esun promé ku nan a laga ta Hacavitz, riba un piramit kòrá grandi, riba e seru ku awor yama Hacavitz. Ei a funda su pueblo, na e lugá kaminda e dios ku yama Hacavitz tabata.
Asina ei mes Mahucutach a keda ku su dios, ku ta e di dos dios ku nan a bai skonde. Hacavitz no tabata den un boske, sino riba un seru for di kua a kita tur vegetashon natural. Ei nan a bai skonde Hacavitz.
Despues Balam-Quitzé a yega ayá na e boske enorme; pa skonde Tohil Balam-Quitzé a yega na e seru ku awe yama Patohil. E ora ei nan a selebrá ku a skonde Tohil den e baranka, den su refugio. Tabatin den e boske gran kantidat di kolebra, tiger, serpiente i kaskabel venenoso, konsiderá diosnan menor den mitologia di e antiguo indígenanan kaminda saserdote- i sakrifikadónan tabatin Tohil skondí.
Balam-Quitzé, Balam-Acab, Mahucutah i Iqui-Balam tabata huntu; huntu nan tabata warda mainta habri aya riba e seru yamá Hacavitz.
I no masha leu e dios di Tamubnan i esun di Ilocabnan tabata. Amac-Tan tabata nòmber di e lugá kaminda dios di Tamubnan tabata, i ei solo a sali pa nan.
E lugá kaminda solo a sali esnan di Ilocab yama Amac-Uquincat ita nòmber di e lugá kaminda dia a habri Ilocabnan; ei e dios di Ilocabnan tabata; na un distansia kòrtiku for di e seru.Ei tabatin tambe tur esnan di Rabinal, Cakchiquel, esnan di Tziquinahá, tur e tribu chikínan i e tribu grandinan. Huntu nan a keda warda yegada di klaridat di dia i salida di e gran strea yamá Icoquih, ku ta sali promé ku solo, ora ta amanesiendo, segun nan ta konta.Nan tabata huntu, pues, Balam-Quitzé, Balam-Acab, Mahucutah i Iqui-Balam. Nan no a drumi, nan a keda riba pia i grandi tabata ansiedat di nan kurason i di nan tripa pa mira ourora i kibrá di. mardugá. Ei tambe nan a sinti bèrgwensa, a drenta nan un gran aflikshon, un angustia enorme i nan tabata kibrá di doló.
Nan a yega te ei. ‘Ai, nos a yega sin alegria! Mare nos por a mira sikiera nasementu di solo! Kiko nos ta bai hasi awor? Si na nos patria nos a kompartí e mes doló i e mes goso, kon awor nos ta mira otro manera  strañero?’ Nan tabata papia nan ku nan, entre tristesa i aflikshon nan ku nan tabata papia ku bos lastimero.
Nan tabata papia pero e ansiedat di nan kurason pa mira yegada di ourora no tabata kalma: ‘Diosnan ta sintá aya riba baranka, den boskenan, entre parasit i suela kubrí ku manto bèrdè i húmedo; ni un asiento di tabla sikiera no a duna nan,’ asina nan tabata komentá.
Na promé lugá tabata Tohil, Avilix i Hacavitz. Nan gloria tabata grandi, tambe nan forsa i nan poder riba e diosnan di tur e tribunan. Nan tabatin un kantidat di talento eksepshonal i inkontabel tabata nan biahe- i peregrinashonnan den friu i kurason di e tribunan tabata yen di temor.
En kambio na komparashon, kurason di Balam-Quitzé, Balam-Acab, Mahucutah i Iqui-Balam tabata trankil. Nan no tabata sinti ansiedat den nan pechu pa e diosnan ku nan a risibí i karga riba lomba ora nan a bini djaya di Tulán-Zuiva, di aya na Oriente.
Nan tabata pues, ei den e boske ku awor yama Zaquiribal Pa-Tohil, P’Avilix, Pa-Hacavitz.
E ora ei den kibrá di mardugá ourora a bria pa nos tawela- i nos mayornan.
Awor nos ta bai konta di yegada di ourora i aparishon di solo, luna i strea.

(tradusí pa Lucille Berry-Haseth)