Popol Vuh III, 6

Sin embargo, tabatin un tribu ku a hòrta kandela den e huma ku tabatin, ta esnan di e kas di Zotzil, dios di e cakchiquelnan, su nòmber ta Chamalcán i e tin figura di raton djanochi.
Ora nan a pasa den e huma, nan a pasa ketu ketu, kaba nan a poderá di e kandela. E cakchiquelnan no a pidi kandela pasobra nan no ker a entregá nan komo vensí, di e manera ku e demas tribunan a ofresé nan pechu i nan bou di brasa pa nan habri nan. I esaki tabata loke Tohil a ekspresá: sòru pa sakrifiká tur tribu pa e mira, ranka nan kurason saka for di nan pechu kompletamente. I esaki nan no a kuminsá hasi ainda ora Tohil a profetisá ku Balam-Quitzé, Balam-Acab, Mahucutah i Iqui-Balam lo tuma poder i alto mando.
Aya na Tulán-Zuiva for di unda nan a bini, nan tabatin e kustumber di no kome, sino di ta na yuna sin interupshon miéntras nan ta warda mardugá i salida di solo yega.
Nan tabata turna pa mira e strea grandi ku yama Icoquih, ku ta prekursor di solo, esun ku ta sali promé ku solo, ora solo ta nase, e Icoquih briante ku semper pa nan ta na bista na Oriente, tempu nan tabata na Tulán-Zuiva, di unda nan dios a bini.
Pues, no tabata aki, kaminda nan a risibí nan poder i alto mando, sino ta aya nan a someté i koutivá e tribunan grandi i chikí, tempu a sakrifiká nan dilanti di Tohil i a ofrendá e sanger, sustansia, e pechu i tur dos banda di kurpa humano, brasa habrí.
Na Tulán nan a risibí nan poder mesora; nan tabatin gran sabiduria den skuridat i den anochi.
Despues nan a bini, nan a sali bai for di aya i nan a bandoná Oriente.
‘Esaki no ta nos kas, ban fo’i djaki pa nos mira unda nos mester bai establesé,’ asina Tohil di e ora ei.
En bèrdat nan a papia ku Balam-Quitzé, Balam-Acab, Mahucutah i Iqui-Balam. ‘Realisá boso akshon di danki i prepará loke ta nesesario pa ofresé boso sanger: heridá boso oreanan, boso kokotinan, hasi boso sakrifisionan; asina ei lo ta boso tributo dilanti di Dios.
‘Ta bon,’ nan a rospondé, i nan a ofresé sanger di nan orea. I den nan kantonan nan a lamentá nan salida for di Tulán; nan kurason a desbordá di duele ora nan a bandoná e lugá ei.
‘Ai di nos tur! Nunka mas nos lo kontemplá kibrá di mainta na e lugá akí, ora solo ta nase pa iluminá superfisie di tera,’ nan di ora nan a sali pa bai. Pero nan a laga algun hende riba kaminda pa esakinan keda vigilá.
Kada un di e tribunan tabata lanta kontinuamente pa mira e strea prekursor di solo. E señal akí di ourora nan ta karga den nan kurason for di tempu ku nan a bini djaya di Oriente, i ku e mes speransa nan a bai fo’i djaya, for di e gran distansia ayá, segun nan ta ekspresá den nan kantonan awendia.

(tradusí pa Lucille Berry-Haseth)