Popol Vuh III, 4

Balam-Quitzé, Balam-Acab, Mahucutah i Iqui-Balam di: ‘Laga nos warda dia habri.’ Asina e gran sabionan ei di, esta e baronnan ku konosementu, e saserdote- i sakrifikadónan. Esaki ta loke nan di.
Nos promé mama- i tatanan no tabatin ainda palu ni piedra pa nan adorá, pues nan no tabatin ídolo, pero nan kurason tabata kansá di warda pa mira solo. I ya tur e pueblonan a oumentá na gran kantidat, meskos tambe e saserdote- i e sakrifikadónan.
Ban, ban buska pa mira si nos símbolonan a keda konservá!, si nos ta haña loke nos lo bai pone komo ofrenda pa nan. Pues, manera situashon ta pinta akí nos no tin hende pa kuida nos,’ asina Balam-Quitzé, Balam-Acab, Mahucutah i Iqui-Balam di.
I ora a yega na nan orea notisia di un siudat, nan a disidí di bai aya.
Awor bon, nòmber di e lugá kaminda Balam-Quitzé, Balam-Acab, Mahucutah i Iqui-Balam ku e hendenan di Tamub i Ilocab a bai, ta Tulán Zuiva, Vucub-Pec, Vucub Ziván. Esaki ta nòmber di e siudat kaminda nan a bai risibí nan diosnan.
Asina antó, nan tur a yega Tulán. No tabata posibel konta e kantidat di hende ku a yega aya; nan tabata masha hopi mes i nan tabata kana ordenadamente.
E ora ei nan diosnan a presentá; promé e dios di Balam-Quitzé, Balam-Acab, Mahucutah i Iqui-Balam, kendenan a yena di alegria: ‘Por fin nos a haña loke nos ta buska!’ nan di.
Anto esun di promé ku a sali ta Tohil, asina ta nòmber di e dios akí, i Balam-Quitzé a karg’é den su arka i ku deboshon riba lomba. Mesora nan a saka e dios ku yama Avilix, ku Balam-Acab a karga. E dios yamá Hacavitz ku Mahucutah a karga; anto e dios yamá Nicahtacah ku ta Iqui-Balam a hiba.
I huntu ku e hendenan kiché, esnan ku tambe a risibí nan dios ta Tamubnan. I Tohil mes tambe ta nòmber di e dios di Tamubnan, kendenan a risibí tawela i tata di e Señornan di Tamub, ku nos konosé awendia.
Na di tres lugá tabata esnan di Ilocab. Tohil ta mes nòmber tambe di e dios ku e tawela- i e mayornan di e Señornan kende igualmente nos konosé awor, a risibí.
Asina ta nòmber di e tres famianan kiché i nan no a separá pasobra tur tres famia tabatin nan dios ku e mes nòmber. Tohil di Kichénan, Tohil di Tamubnan i di Ilocabnan; ta un nòmber nan dios tin, i p’esei e tres famianan kiché no a separá. Nan a keda huntu.
Naturalesa di e tresnan Tohil, Avilix i Hacavitz tabata realmente di gran taya.
I e ora ei a yega tur e pueblonan: esnan di Rabinal, esnan di Cakchiquel, esnan di Tziquinahá i e hendenan ku awor yama Yaqui. I ei ta kaminda abla di e tribunan a kambia; nan lenganan a konfundí. Ya nan ku nan no por a komprondé otro klaramente despues ku nan a yega Tulán. Ei tambe nan a separá; tabatin algun ku a bai Oriente, esta Yucatán, pero hopi di nan a bini akibanda, den e region di Chichicastenango.
I loke nan tabatin bistí tabata kueru di animal so; nan no tabatin paña adekuá pa bisti, kueru di animal tabata úniko kos pa nan bisti. Nan tabata pober, nan no tabatin nada, pero nan naturalesa tabata di hende sobresaliente.
Ora nan a yega Tulán Zuiva, Vucub-Pec, Vucub-Ziván, e tradishonnan antiguo ta konta, nan mester a kana masha hopi pa yega Tulán. 

(tradusí pa Lucille Berry-Haseth)