Popol Vuh III, 2

Esakinan ta nòmber di e promé hòmbernan kreá i formá: e promé hòmber ta Balam-Quitzé. E di dos ta Balam-Acab, i e di tres Mahucutah i e di kuater Iqui-Balam.
Esakinan ta e promé nòmbernan di nos promé mama- i tatanan.
Tin bisá ku nan ta trahá i formá di nan mes, ku nan no tin mama, nan no tin tata. A yama nan ‘baron’ nada mas. Nan no a nase di muhé, ni ta Kreador i Formador i Progenitornan a engendrá nan. Ta djis pa un milager i pa arte di magia Kreador, Formador i e Progenitornan Tepeu i Gucumatz a krea nan. I komo nan tabatin aparensia di hende hòmber, nan tabata hòmber: nan tabata papia, kòmbersá, mira i tende, nan por a kue kos tene; nan tabata bon i nèchi hende i nan figura tabata figura di baron.
Nan tabata dotá di inteligensia: nan por a mira i alabes nan bista tabata logra bai mas leu, nan a logra konosé tur loke tin den mundu. Ora nan mira, ta mesora nan ta mira tur loke tin rònt di nan i nan ta kontemplá firmamento i kara rondó di tera.
Kosnan fo’i bista debí na distansia, skondí, nan ta mira tur sin tin di move promé i hala mas serka; inmediatamente nan ta mira mundu i asina ei mes for di e lugá kaminda nan ta, nan ta mira tur kos.
Nan tabatin gran sabiduria; nan bista tabata yega te kaminda tin boske, baranka, lago, laman, seru i vaye. Di bèrdè mes nan tabata hende atmirabel: Balam-Quitzé, Balam-Acab, Mahucutah i Iqui-Balam.
E ora ei Kreador i Formador a puntra nan: ‘Kiko boso ta pensa di boso estado? Boso no ta mira? Boso no ta tende? Boso lenguahe i boso forma di kana no ta tremendo? Mira antó! Kontemplá mundu, mira ku seru- i vayenan a aparesé! Purba antó boso mira!’ asina a bisa nan.
I inmediatamente nan a kaba na mira kuantu kos tin den mundu. Kaba nan a yama Kreador i Formador danki: ‘Di bèrdè mes nos ta yama boso danki, dos i tres biaha asta! Boso a krea nos, boso a duna nos un boka i un kara, nos ta papia, tende, pensa i nos ta kana; nos ta sinti perfektamente i nos konosé loke ta leu i loke ta serka. Nos ta mira tambe loke ta grandi i loke ta chikí na shelu i na tera. Nos ta gradisí boso, pues ku boso a krea nos, oh Kreador i Formador, ku boso a duna nos nos naturalesa, oh kerida wela di nos!’ Asina nan di yamando danki pa nan kreashon i formashon.
Nan a kaba na konosé tur kos i nan a studia e kuater puntonan di blou di shelu i di superfisie di tera.
Pero Kreador i Formador no a gusta di tende esaki.
‘No ta bon loke nos kriaturanan, nos obranan ta bisa; tur kos nan sa, loke ta grandi i loke ta chikí.’ Asina nan a komentá. Pues e Progenitoran a drenta reunion atrobe. ‘Kiko nos lo hasi ku nan awor? Nos mester hasi pa nan por mira djis un parti so di superfisie di tera! No ta bon loke nan ta bisa. Akaso pa naturalesa nan no ta simpel kriatura ku nos a krea? Nan tambe mester ta dios antó? I si nan no prokreá i multipliká ora mainta habri, ora solo sali? I si nan no reprodusí?’ Asina Kreador i Formador a papia ku otro.
‘Ban frena nan deseonan un poko, pues no ta bon loke nos ta mirando akí. Nan tin di igualá nos antó ku ta nan outor, nos ku por abarká distansia grandi, nos ku sí sa i ta mira tur kos?’
Esaki ta loke Kurason di Shelu, Huracán, Chipi-Caculhá, Raxa-Caculhá, Tepeu, Gucumatz, e Progenitornan, Ixpiyacoc, Ixmucané, Kreador i Formador di. Asina nan a papia i mesora nan a kambia naturalesa di nan obranan, di nan kriaturanan.
E ora ei Kurason di Shelu a supla rosea riba nan wowo, ku a nubla manera ora supla riba kristal di un spil. Ta manera un belo a kubri nan wowo i nan por a mira solamente loke ta serka, esaki so tabata kla pa  nan por a mira.
Asina a destruí nan sabiduria i tur konosementu di e kuater hendenan di orígen i prinsipio di e rasa kiché.
Asina Kurason di Shelu, Kurason di Tera a krea i forma nos wela- i tawelanan, nos mayornan.