Popol Vuh III, 10

Awor nos ta bai konta di nan estadia i nan permanensia aya riba seru, kaminda e kuaternan yamá Balam-Quitzé, Balam-Acab, Mahucutah i Iqui-Balam tabata huntu. Nan kurason tabata yora pa Tohil, Avilix i Hacavitz ku nan a laga atras entre  bromelia i teku di palu.
At’akí e forma ku nan a ofresé e sakrifisionan na pia di e sitio kaminda nan a pone Tohil ora nan a yega den presensia di Tohil i Avilix. Nan a bai bishitá i saludá nan i yama nan danki tambe pa yegada di ourora. Nan tabata kaminda tin yerba abundante, entre piedra, aya den boske. I ta pa arte di magia so nan a papia ora e saserdotenan i e sakrifikadónan akí a yega dilanti di Tohil. Nan no a bini ku regalo grandi, sino ku resina so, sobrá di gòm noh i pericón nan a kima pa nan dios.
I e ora ei Tohil a papia; ta pa un milager so el a duna e saserdote- i e sakrifikadónan konseho. E ora ei nan a papia i nan di: ’Berdaderamente, aki lo ta nos seru- i nos vayenan. Nos ta di boso; nos gloria lo ta grandi i nos desendensia pa obra di tur hende. Di boso tur tribu ta i nos, ta boso kompañero. Kuida boso siudat i nos lo duna boso boso instrukshon.
No presentá nos na e tribunan ora nos ta rabiá pa e palabranan ku a sali fo’i nan boka i pa nan forma di komportá. No laga nos kai den nan trampa tampoko. En kambio, duna nos yu baron di yerba i yu baron di kunuku i tambe yu embra di biná i embra di paranan. Bin duna nos un poko di boso sanger, tene un poko kompashon di nos. Keda ku e kuerunan di biná numa i tene kuidou ku mirada di esnan ku a engañá nos.
Asina antó, kueru di biná lo ta nos símbolo ku boso lo manifestá na e tribunan. Ora nan puntra boso unda Tohil ta?, boso ta presentá nan e biná. Boso mes no ta presentá tampoko, pasobra boso lo tin otro kos di hasi. Boso lo yega leu; boso lo dominá tur tribu; boso ta trese sanger i sustansia di e biná komo ofrenda pa nos, i esnan ku bin brasa nos, tambe lo ta di boso,’ asina Tohil, Avilix i Hacavitz a kontestá e ora ei.
Ora a mira nan yega bin presentá e regalonan, nan tabatin aparensia di hóben e mucha hòmbernan ei. E ora ei persekushon di e yunan di para i di e yunan di biná a kuminsá, anto loke e yagmentu a produsí ta e saserdote- i e sakrifikadónan a risibí. I mesora ku nan haña e paranan i e yunan di biná, mesora nan ta bai depositá sanger di e biná- i di e paranan na boka di e piedranan di Tohil i Avilix.
I ora e diosnan kaba di bebe sanger, mesora piedra sagrado ta papia,  ora e saserdote- i e sakrifikadónan yega, ora nan bin trese ofrenda. I di igual manera nan ta hasi esei dilanti di e símbolonan, kimando pericón i holom-ocox.
E símbolonan di kada un tabata aya kaminda nan a pone esakinan pa e ídolonan, den kabes di seru. Pero nan (e saserdotenan) no tabata biba den nan kas durante dia, sino ta asina ku nan tabata kana den serunan, i nan tabata kome komo alimento solamente e yunan di tábano (muska grandi pikadó o sea muska di kabai) i maribomba i abeha ku nan tabata buska; nan no tabatin bon kuminda ni bon bibida. No tabata konosí tampoko nan kaminda di kas, ni no tabata sa unda nan muhénan a keda. 

(tradusí pa Lucille Berry-Haseth)