Popol Vuh I,3

Inmediatamente a likidá nan, a destruí i desbaratá e pòpchinan di palu akí, i nan a risibí nan morto. 
Kurason di Shelu a produsí un inundashon; a forma un gran diluvio ku a baha riba kabes di e pòpchinan di palu.
Kreador i Formador a traha karni di hòmber ku tzité, pero ora Kreador i Formador a traha muhé, nan a traha su karni ku espadaña (tipo di rit masha usá den trahamentu di tapeit). Ta e materialnan akí Kreador i Formador ker a usa pa forma hende. 
Pero e hendenan no tabata pensa, nan no tabata papia ku nan Kreador i Formador, kendenan a traha nan, kendenan a krea nan. I pa e motibu akí nan a muri, nan a hoga. Un resina abundante a basha for di shelu. Gran Palabrua yamá Xecotcovach a basha bin saka nan wowo; Gran Raton Djanochi Camalotz a bini pa kòrta nan kabes kita afó; i Panter Feros Cotzbalam a bini, devorá nan karni. Tapir Tucumbalam tambe a yega i el a kibra nan wesu- i lastimá nan nèrvionan, el a mula i destrosá nan wesunan. 
I esaki tabata pa kastigá nan pasobra nan no a pensa riba nan mama, ni nan tata, Kurason di Shelu, yamá Huracán. I pa e motibu akí superfisie di tera a bira skur i a bini un áwaseru pretu, un yobida den dia, un yobida anochi. 
E ora ei e animalnan chikí, e animalnan grandi, i e palu- i piedranan a gòlpia nan kara. Anto nan tur a kuminsá papia; nan tinashinan, nan kasuela, tayó, wea, nan kachónan i nan piedranan di mula, tur a lanta gòlpia nan kara. 
‘Demasiado malu boso a hasi ku nos; boso tabata kome nos, i awor nos lo morde boso,’ asina nan kachónan i nan paranan doméstika di. 
I e piedranan di mula: ‘Boso a tromentá nos; tur dia, tur dia, anochi i mainta tempran, henter ora boso tabata hasi holi, holi huqui, huqui den nos kara. Esaki tabata e tributo ku nos ta paga boso awor. Pero awor ku boso a stòp di ta hende, boso lo purba i konosé nos forsa. Nos lo mula boso karni, hasié bira stòf,’ asina nan piedranan di mula a bisa nan. 
I ata akí loke nan kachónan a papia i bisa nan: ‘Pakiko boso no tabata duna nos kuminda? Apénas nos kai sinta warda, ya boso ta kore ku nos, saka nos pafó. Semper boso tabatin un palu kla pa dal nos kuné miéntras boso ta sinta kome. Asina boso tabata trata nos. Nos no por a papia. Kisas awor nos lo no a yega na mata boso; pero pakiko boso no a reflekshoná, pakiko boso no a pensa riba boso mes? Awor nos ta bai destruí boso, awor boso ta bai sinti e djentenan akí ku tin den nos boka; nos lo devorá boso,’ e kachónan di, kaba nan a destrosá nan kara.
I na nan turno, nan kasuela-, nan weanan a papia asin’akí ku nan: ‘Doló i sufrimentu boso a kousa nos. Nos boka i nos karanan tabata tur na chemené, semper boso ta pone nos riba kandela i laga nos kima, manera si nos no tabata sinti doló. Awor ta boso ta bai sinti kon nos ta bai kima boso,’ asina nan weanan di, kaba nan a destrosá nan kara. E piedranan montoná riba fogon a salta direktamente for di kandela bai dal kontra nan kabes, kousa nan doló.
Desesperá nan tabata kore di un punta pa otro; nan ker a subi riba e kasnan, i esakinan tabata bini abou i benta nan na suela; nan ker a subi den palu i e palunan tabata lansa nan leu; nan ker a drenta kueba i e kuebanan tabata sera den nan kara. 
Asina ei tabata ruina di e hendenan kreá i formá, di e hendenan trahá pa destruí i kaba ku nan kompletamente; a destrosá boka i kara di nan tur. 
I tin hende ta bisa ku desendiente di eseinan ta e makakunan ku awendia ta eksistí den boskenan tropikal; esakinan ta muestra di esayanan, pasobra ta di palu so Kreador i Formador a traha nan karni.
I pa e motibu akí makaku parse hende, ta muestra di un generashon di hende kreá, di hende formá ku tabata pòpchi so i trahá di palu so.

(tradusí pa Lucille Berry-Haseth)