Popol Vuh I,2

Despues a krea e animalnan chikí di den seru, e wardadónan di tur boske, e doñonan di seru grandi, biná, para, leon, tiger, serpiente, kolebra, víbora i e kuidadónan di lian.
I e Progenitornan di: ‘Silensio ku inmobilidat so bou di e palu- i e liannan? Den futuro mester bini wardadó pa kuida nan.’
Asina nan di mesora ku nan a meditá i papia. Inmediatamente a krea biná ku para. Sin tarda a mustra e biná- ku e paranan nan lugá di biba. ‘Abo, biná, ta drumi na e partinan seku di riu i kaminda tin baranka. Ei boso lo ta entre yerba shimaron i yerba regular; boso lo multipliká den boske, boso lo kana i keda para riba kuater pia.’ Anto dicho i echo. 
Kaba a mustra e para chikínan i e paranan mas grandi tambe nan lugá di biba: ‘Boso, paranan, lo biba den palu i den lian; ei boso lo traha boso nèshi i multipliká, ei boso lo sakudí kurpa den e ramanan di palu i di lian.’ Asina a bisa e biná- i e paranan pa nan hasi loke nan mester hasi, i nan tur a tuma nan lugá di biba i kaminda di traha nan nèshi. Di e manera akí e Progenitornan a duna e animalnan nan lugá di biba na tera.
I únabes Tzakol i Bitol i e Progenitornan a kaba ku kreashon di tur kuadrúpedo i para, e animalnan a haña e enkargo: ‘Papia, grita, kanta, yama, kada ken segun su espesie, segun variedat di kada ken.’ Asina a bisa e biná-, para-, leon-, tiger- i serpientenan pa nan hasi. 
‘Pues, bisa nos nòmber, alabá nos ku ta boso mama, boso tata. Pues, invoká Huracán, Chipi-Caculhá*, Raxa-Caculhá*, Kurason di Shelu, Kurason di Tera, Kreador, Formador, Progenitornan; papia, invoká nos, adorá nos,’ asina a bisa nan pa hasi. 
Pero no por a logra ku nan ta papia manera hende; nan tabata chia, kakariá, kroa so i kada un tabata saka zonido di un manera diferente. 
Ora Kreador i Formador a mira ku no ta posibel ku nan ta papia, nan a bisa otro: ‘No a logra pa nan menshoná nos nòmber, nos ku ta nan kreador i formador. Esaki no ta bon,’ e progenitornan a komentá un ku otro.
E ora ei a bisa nan: ‘Lo kambia boso pasobra no a logra ku boso ta papia. Nos a kambia di pareser: boso alimento, boso lugá di kome yerba, boso lugá di biba i traha boso nèshi, boso lo tin riba baranka i den boske, pasobra no a logra ku boso ta adorá ni invoká nos. Ta bai tin ken pa adorá nos sí, nos ta bai krea otro ser ku sí ta obediente. Boso, aseptá boso destino numa: lo mula boso karni. Asina lo sosodé. Esaki lo ta boso suerte.’ Asina nan a laga e animalnan chikí i grandi ku ta eksistí riba superfisie di tera sa loke ta nan boluntat. 
Kaba e animalnan ker a bolbe purba suerte, nan ker a hasi otro intento i nan ker a purba di nobo adorá nan Progenitornan. 
Pero nan no por a komprondé nan lenguahe entre nan mes, nan no por a logra nada i nan no por a hasi nada. Pa e motibu akí a mula nan karni i a kondená nan ku lo mata i kome e animalnan ku ta eksistí riba superfisie di tera. 
Asina pues, Kreador, Formador i e Progenitornan mester a hasi un intento nobo pa krea i forma hende. 
‘Ban purba atrobe! Ya promé lus di dia i mardugá ta aserkando; laga nos krea ser ku lo sustentá i alimentá nos! Kon ta hasi pa logra ku ta invoká nos, ku na tera ta sigui kòrda nos? Ya nos a purba ku nos promé obranan, nos promé kriaturanan; pero no a logra ku nan ta alabá i venerá nos. Ban purba krea awor ser obediente, respetuoso, ku ta sustentá i alimentá nos.’ Asina nan a papia. 
E ora ei a bini kreashon i formashon. Di tera, di lodo a traha karni di hende. Pero a mira ku e no tabata bon, pasobra e tabata kai fo’i otro, e tabata moli, e no por a move, e no tabatin forsa, e tabata fofo, e tabata papa, e no por a move su kabes, su kara tabata bai di banda, un belo tabata tapa su bista, e no por a drei mira su tras. Na prinsipio e tabata papia sí, pero e mes no por a komprondé loke e ta bisa. Masha lihé el a muha den awa i e no por a keda riba pia. 
I Kreador ku Formador a komentá: ‘Ta evidente ku e kreashon akí no por kana ni multipliká. Laga nos ban tene un konsulta al respekto,’ nan di. 
E ora ei nan a desbaratá i deshasí di nan obra i nan kreashon. Djis despues nan di: ‘Kon nos ta hasi pa perfekshoná, pa nos adoradónan, nos invokadónan sali bon kreá?’  
Asina nan a papia ora nan a bolbe konsultá otro: ‘Ban papia ku Ixpiyacoc, Ixmucané, Hunahpú-Vuch, Hunahpú-Utiú, nos bisa nan: Purba suerte atrobe! Purba realisá kreashon!’ Asina Tzakol i Bitol a ekspresá entre nan ora nan a papia ku Ixpiyacoc i Ixmucané.
Mesora nan a bai papia ku e miradónan di destino ayá, wela di dia, wela di mardugá, pasobra ta asina Kreador i Formador a yama nan, i kende nan nòmber tabata Ixpiyacoc i Ixmucané.
I ora Huracán, Tepeu i Gucumatz a papia ku e miradó di destino, dunadó di mal nobo, ku e formador ku ta e miradónan di destino, nan di: ‘Mester reuní i haña medio pa e hende ku nos forma, e hende ku nos ta bai krea, ta sostené i alimentá nos, ku e ta invoká nos i e ta kòrda nos.
Boso drenta pues den konsulta, wela, tawela, nos wela, nos tawela, Ixpiyacoc, Ixmucané, hasi pa klaridat drenta, pa dia habri, pa e hende kreá, e hende formá, e hende mortal, invoká, adorá nos, hasi pa asina sosodé.
Duna di konosé loke ta boso naturalesa, Hunahpú-Vuch, Hunahpú-Utiú, dos biaha mama, dos biaha tata, Nim-Ac, Nimá-Tziís, Señor di esmeralda, hoyero, eskultor, skreinwèrker, Señor di e bunita tayónan, Señor di kalbas bèrdè floriá, maestro di resina, maestro Toltecat, wela di solo, wela di e promé lus di dia, ya ku ta asina nos obranan i nos kriaturanan lo yama boso.
Konsultá destino ku boso pipitanan di maishi i di tzité, (simia di un palu di kua su fruta ta un baliña ku pipita ku parse bonchi. E pipitanan ei indjannan ta usa pa yama suerte i pa hasi brua). Hasi asina i nos lo haña sa si nos ta labra o graba den palu, boka i wowo di nos kreashon.’ Asina nan a bisa e miradónan di destino. 
E ora ei a sigui e miramentu di destino; konsulta di suerte ku maishi i tzité. ‘Suerte! Kriatura!,’ un muhé bieu i un hòmber bieu a bisa nan e ora ei. I e hòmber bieu akí tabata di suerte di tzité, yamá Ixpiyacoc. I e muhé bieu, tabata e miradó di destino, e formador femenino, yamá Chiracán Ixmucané.
Anto ora a kuminsá ku e miramentu di destino, nan di asin’aki: ‘Bini huntu, forma pareha! Papia, nos ta skucha, papia, deklará si ta kumbiní pa palu uni i pa Kreador i Formador labr’é, i si e resultado (e hende di palu) ta esun ku mester sustentá i alimentá nos ora klaridat yega, ora dia habri!
Abo, maishi, abo, tzité; abo, suerte; abo, kriatura: boso uni, boso forma pareha!,’ nan a bisa maishi, tzité, suerte, e kriatura. ‘Bin sakrifiká aki, Kurason di Shelu; no kastigá Tepeu i Gucumatz!’ 
E ora ei nan a papia i nan a bisa bèrdat: ‘Boso pòpchinan trahá di palu lo resultá bon i nan lo papia i kòmbersá riba superfisie di tera.’
‘Amèn!,’ tabata e kontesta, ora nan a papia.
Anto instantáneamente e pòpchinan trahá di palu a kobra bida. Nan tabata parse hende, nan tabata papia manera hende i nan a pobla superfisie di tera. 
Nan a eksistí i nan a multipliká; nan a haña yu muhé, nan a haña yu hòmber e pòpchinan di palu ei; pero nan no tabatin alma, ni kapasidat di komprondé, nan no tabata kòrda nan Kreador, nan Formador; nan tabata kana sin rumbo i nan tabata gatia.
Ya nan no tabata kòrda Kurason di Shelu i p’esei nan a frakasá. Tabata djis un ensayo, un intento pa traha hende. Na prinsipio nan tabata papia, pero nan kara tabata flaku, ral; nan pia- i mannan no tabatin konsistensia; nan no tabatin sanger, ni sustansia, ni humedat, ni gordura; nan kontentu di kara tabata seku, seku tambe nan fut- i nan mannan, i nan karni hel. 
Pa e motibu akí ya nan no tabata pensa riba Kreador ni riba Formador, riba esnan ku a duna nan bida i tabata kuida nan. 
Esakinan tabata e promé hendenan ku na gran kantidat a eksistí riba superfisie di tera. 

(tradusí pa Lucille Berry-Haseth)

• Diferensha entre Chipi-Caculha i Raxa-Caculha ta diferente tipo di welek. Na papiamentu nos konosé un palabra so, pero tin lenga ku ta hasi distinshon. E promé dios ta dios di lamper (kòrtá di lus visibel, bliksem)  i Raxa-Caculha ta dios di welek (refleho riba nubia, weerlicht).