Pèrdiendo Laman

Nos pèrla rondoná pa laman
Pero n’ t’e mes t’e pèrla ?
Kaminda tur pèrla ta originá
Materia prima manera oro
Dia pa dia birando mas skars
Oceanview i oceanfront gulí pa resorts
Opheto di luho reservá
pa esnan ku gold creditcard
mas ousente ku presente. 

Penshonado europeo, merikano
Heredero di rikesa generashonal
eksitoso òf frakasá
Regius don Pérignon,
San Alberto i Juan Valdez.
Aperitif, martini òf negroni
Kobe, langoustine i kaviar
kabá ku crème brulé karamelisá
bou di shelu na strea Michelin. 

Símbolo di status
será, blokiá, opstakulisá
Muraya of port’i heru altu
Kadena na kandal
Slagboom i security ku telefòn
Julianadorp, Biesheuvel i Emmastad
rebishitá tur na kámara
Kiko bo ke, ken bo ta, bo ta invitá ?
Laman bo ke bai ? Aki ta privá. 

Apartheid 2.0.

Nos naturalesa sekuestrá
Parti di oséano infinito todopoderoso
kaminda horizonte
ta kaba i kuminsá
Podio pa solo baha
i luna yen avansá.  

Kosta su amante
ku su karisia perpetual
Skupidó di kokolishi i piedra koral
Para, tortuga i piská su habitat
Pa hende fuente bibu pa kalma, kura,
relahá i revitalisá.

Memoria kolektivo mas presioso
di nos infansia.
N’ ta mihó nos no laga niun hende
roba nos di ni un parti mas?

Natasha Cabenda,
april 2026