Bores dos porta (parti 2)

Pèrdè saku, pèrdè kangreu

Bores su ko’i kareda, su kachipin manera e mes tabata yam’é, ku tur tempu a komportá na altura, di un dia pa otro a dalé palu i forsá el a hañ’é tin ku but’é para un banda. Dj’awor bai dilanti ta bùs chikí, konvoí ku kabé’i boto a para bira su medio di transporte diario. Pa trabou, pa kas pero tambe pa Leliënberg. El a konfia Mòsh, su ruman mekániko ke tròbel dje outo. Pero mas ku un aña a pasa i niun nobo di Mòsh tokante su outo. Bores mes no a deskonfiá e asuntu ètòl. Tur bia ku mi tabata puntr’é kon ta pará ku su ko’i kareda, e tabata dunami e mesun kontesta. “Ai no Win, no wòri, no preokupá bo kabes, e outo ta den bon man serka e hòmbu.”
Un dia pa kasualidat Bores a pasa wak un outo ku parse su kachipin stashoná dilanti di un snèk aya na Santa Helena ku un tèrsio sintá trai stür. Bores poko dudoso a hala bai serka pa dal un rònchi di inspekshon promé, pa chek sigur ku ta su outo pasobra tabatin algun detaye diferente na su kurpa i asta e koló no tabata kuadra. “Si, no tin duda. T’e mes!” Ya despues até ta puntra e hòmbu p’e outo ku masha koutela i esaki a spliké tambe korektamente ku ta kumpra el a kumpré serka Mòsh mekaniko.
Mesora Bores a tumba pa kas dje ruman pa buska drechi dje outo. Grandi tabata su disgustu ora el a puntra p’e. “Sí ruman, asina mes. Sòri pero m’a hañami tin ku bendé”, el a kontestá Bores flèt i kortiku ku un kara di yo no fui. A resultá ku e hòmbu a kore bende e outo den un mester grandi pa plaka. E pregunta kardinal ku n’e momento ei a keda kologá den laira ta: Kon a para ku Bores su plaka dje benta? Mòsh no a wòri mes pa dun’é kuenta i rason djesaki. E hòmbu no a habri su snùit mas. Bores shen porshento sigur ku su outo tabata den bon man serka e ruman, awor a hañ’é den un situashon sumamente lamentabel, esta sin outo anto pa kolmo sin su plaka. Pèrdè saku, pèrdè kangreu, manera nos grandinan sa bisa. Mal di freak, Bores, pa evitá pió, a guli manda abou anto hala kita mesora. Un sla formal bou’i faha ku a hasi e hòmbu hopi doló. Despues di mas ku un aña sin su ko’i kareda, ata pober Bores ku tur tempu a hinka man den kandela p’e ruman tin ku sigui move djawor bai dilanti ku patamobil. E no por a kere pa nad’i mundu ku su mes ruman stimá por a pas’é un fèstbòl asina anto riba dje, tum’é hasi. “Un abusu di konfiansa demasiado reprochabel”, segun Bores.

Mei mei dje bestianan di bon kurason

Lulu a bin ta komportá basta krepchi ultimonan aki pa motibu ku Bores ya no ta esun mas di ántes ku tabata bin serka dje tres, kuater te asta sinku bia den siman anto keda drumi tambe. Ku su rason, e muhé tabata hasi fèrfelu i heringá sin fin den Bores su kabes tur bia ku e tabata yama e hòmbu na telefon na kas dje mama. Pa baha Lulu su beis poko, Bores a invit’é pa nan bai un kòmbèk party riba un djadumingu atardi bai anochi aya pabou mes, na Hòfi Popo Rojer, bon famá e tempu ei pa su tremendo pachanganan warachero. Un konosí di Lulu ku su chick ku tambe tabata bayendo e fiesta a pasa piki nan pa huntu nan kore bai e hòfi. P’e okashon aki Bores a dal su kombinashon elegante di kustumber, esta su wayabera habanero blanku manga largu ku su karson balon maron skur kombiná ku su mokasinnan blanku. Tur esakinan di La Moda, su pakus favorito di den Punda. Aya na hòfi, nan tur a fiesta na grandi, pasa tremendo i skùif e pianan te lat riba piesanan son montuno i wawankó. Bores ku Lulu tabata amantenan te aya di fiestanan kòmbèk.
Ora fiesta a kaba e mesun brò akí a kore dròp nan na Lulu su kas. E brò tabata di mas pabou, di wespen. P’e motibu aki Bores a hañ’é pegá aya na Lulu su kas. Ya tabata mardugá grandi anto e hòmbu a hinka den su kabes ku ta kas e ta bai. E no kera tende di Lulu ni matá. Ni maske Lulu a purba na konvens’é di tur banda p’e keda kompañ’é, el a insistí i persistí ku ta pariba e ta bai. El a palabrá ku Shon Mi ku e ta bin kas. Na final ata pober Lulu sintá chòmbòn chòmbòn den kas su so atrobe anto ku un beis demoño. Koi kore limpi bai.
Awèl bon. Dicho echo. E hòmbu kabesura a disidí ku e ta kuminsá move na pia i ku na kaminda e ta haña un kabe’i boto sigur. Pero pa su di malu sin previo aviso un mal tempu kompañá pa un pal’i awaseru a gar’é na kaminda. Anto di mes n’e oranan ei kaya tabata morto morto, sin niun alma den serkanía ni tampoko un lugá na drechi p’e por a dèk. Haña el a hañ’é tin ku kore un pasá bai gatia bou di un sobrá’i ket di konstrukshon di Woningbouw Bedrijf kant’i kaminda.
Pero manera el a hinka su kabes bou dje ket, el a bin topa kara kara ku un trupa di kabritu krioyo ku a kuminsá bira poko nervioso na momento ku nan a ripará k’e hòmbu tabata hala bin pèrta chikí chikí den nan banda buskando un kayent’i kurpa. Na final ku tur e bon intenshon di parti dje bestianan mansu, Bores a logra haña un lugá basta komodo huntu ku nan p’e por a skapa dje bientu friu ku tabata penetrá dor di su paña papa muhá pa bai korta den su kueru manera blet. Eibou el a hañ’é obligá tin ku pasa sobrá dje mardugá kruel ei mei mei dje bestianan di bon kurason te ora solo a disidí sali porfin fo’i tras dje nubianan pretu kargá ainda ku basta awa.
Una bes atrobe riba kaminda grandi el a bin haña pa su di suèltu un kabe’i boto sintá patras den baki di un pikòp riba un seru di sak’i plèstik papa muhá dje awaseru i kankan di kaka di baka, kabritu, karné ku galiña destiná komo mèst. Dilanti no tabatin lugá’i sinta. E shofür a splika e hòmbu ku e tabata hibando su dos muchanan skol. Tuma of laga. Bores no tabatin chòis. Den e kastigu ei bentá riba e sakunan di kaka’i bestia ku un holó insoportabel, porfin, Bores a logra yega kas den un kondishon hopi lamentabel, un ko’i yora. 
Ora Shon Mi a wet’é pará su dilanti na porta el a spanta. Ku paña papa muhá, mal batí, ku wowo pata pata di soño, kara blek blek, ta tembla anto pa kompletá, ku un holó stèrki di pishi kabritu ku kaka’i baka na su kurpa, e hòmbu a kana drenta kas un pia un pia, mansu mansu. ‘Ché Bores, ta ki holó stinki esei? Ki a pasabo? Unda demoño b’a hinka bo kurpa, hòmbu di baina?’ Shon Mi a kans’é ku bòsh’i pregunta. Sin kontest’é un pataka ku kara será, Bores a kana stret bai baño anto klap e porta sera duru duru su tras ku un saitkik a la lucha libre. Den baño e tabata skucha Shon Mi ta heringá na gritu ketu bai: “Drechi pabo karaho! E ko’i mal oranan ei ta pasa bo, pasobra kaya so bo ke kore na lugá di buta bo atras na kas!” 

Un hòmbu egoista i plegá

Foi dia ku Bores a keda sin su kachipin, e no por a baha bai Leliënberg mas manera ántes. Frekuensha a dròp konsiderablemente. Un atardi kontentu di dje, despues di basta dia sin tira un tèk aya pabou, ora ku el a kana subi kurá’i kas dje mayornan di Lulu pa bai ne flèt a resultá ku e porta dilanti tabata medio habrí i presis ne momento ei el a skucha paden un stem di hende hòmber. Ei el a wanta un brek. El a dal un par di stap patras pa despues slùip bai chikí chikí na un bentana den banda p’e por a tira un bista paden. Dor dje bentana e por a wak kla kla kon un hòmbu flaku, kòrá, ku kara tur na purunchi, kabes limpi ku barba stail di taliban, lomba sunú, na bermuda, pata abou i ku dos pal’i pia mané toothpick ta kana bai bin eiden mané ta di kas e ta. Sin buska drechi niun dònder, Bores a bati retirada di bia. Purá el a kana bai port’i kurá bèk p’e hala kita foi djeibou. Ariba abou ku un rabia bestial i ku rabu meimei di pia mané kachó koriendo un kabe’i gai, el a logra bin pariba den un konfushon total, sin sa kiko pensa ni kiko hasi tokante loke el a wak.
Su siguiente mainta tempran mal hostiná na momento ku el a kore pidi Lulu kuenta i rason na telefon, esaki a bula kort’é den tòm di bia pa djei kontest’é tambe na masha mal ordu: ‘Tende’ki Bores, wanta bo wil sua, anto lagami splikabo. Lastu tempu m’a sintimi fòking bandoná, butá un banda, hinká den huki di olvido. Mi so ku mi so aki den, meimei dje kuater pida murayanan akí. Bo sa bon bon di mi’, el a sigui splik’é ku su bos pata pat’i rabia, ‘fo’i dje promé dia ku b’a konosemi m’a splikabo na plaka chikí ku mi no por biba mi so. No! Mi n’ por! Ni maske mi ke e no ta bai. Mi n’ tin lei k’e fulan frustrá ayá ku nan sa yama shon soledat. E ta dunami strès anto hasimi bira malu di kabes aki den. Ultimonan aki ta masha di baina mi ta mirabo. Ta kada aña pa kuaresma bo ta pasa aki banda. Kos a para bira ku ta ora e lomba ta mal yen so bo ta blo riba mi. Ya bo no ta manera ántes mas. Kos entre nos dos a kambia drástikamente. Relashon a fria te bira blòk’i eis. Anto tur bia te mesun smoesje barata mi tin ku tende. “Mi n’ tin outo!”
Lulu a sigui deshogá. ‘Abo ta bon hòmbu di Dios. Bo n’ por keha. Aya pariba bo tin bo otro muhé anochi den kama bon di plak den bo banda ku su dushi kayent’i kurpa. Bo por bras’é, primié, karisi’é, sunch’e i yam’é bon nochi. Ami no tin niun demoño pa brasami, ni pa karisiami, ni pa sunchi mi, laga para pa yamami bon nochi. Fo’i dia bo outo a straik ba bòltu shen ochenta grado, Bores. B’a bira hopi straño. Mi n’ konosé bo asina. Bo no ta buska mi drechi mas manera ántes. B’a bira lomba pa mi. Anto awor bo ke bin rabia, zundra, borotá i reklamá pasobra m’a buska un alma di bon kurason pa kompañami. Ban serio, Bores. Get real hòmbu. Manera nan sa bisa na spañó: ‘El que se fue pa Sevilla perdió su silla’. Dje simpel ei. Saka bo sòm awor, Bores. T’asina sa sosodé ku hòmbunan egoista i plegá manera bo ku ta deskuidá nan propiedat i no ta wak nan kaya. Lagami yu. Bai laba pa kaba!’
Ei mes el a hisa dal e telefon sera duru duru den e hòmbu su orea bou di un deskontrol total. Pero shon Lulu su mensahe tabata franko i direkto, mas kla ku di dia, sin skonde nèt nèt nada. Anto esaki a dal e hòmbu hopi duru mes. Otr’un sla formal bou’i faha!

(ta kontinuá)