PA ARNOLDO, PASÓ BO A PUNTRA

Strès, un enemigu ku ta bishitá mi bes tras bes.
Sin ku el a haña un invitashon.
Ora e ta di bishita, e tin un bisti tradishonal.
Un saya largu…bou di kua su yunan ta skondí.
Kendenan ta bula sali ora mi lomba ta birá.
Pa nan kue mi di sorpresa, den un akto di traishon.

Esun mas fuerte i kruel t’e yu mayó ku yama ‘Miedu’
E t’esun ku por paralisá mi kompletamente
Dor di bula riba mi lomba, gara mi garganta i
flùister kos espantoso den mi orea.
Gritando manera loko, mi ta bula sali fo’i bentana,
I kore  bai den e kaya skur ku mi konosé asina bon.
Un kaya yená ku impotensia, pániko, ansiedat i soledat.
Pero ku semper tòg, mi ta logra sali bèk for di dje.
Despues di un lucha tenas ku ta laga mi morto kansá i kibrá.

Anto pa evitá tur e kosnan horibel ku ‘Miedu’ por hasi ku mi,
mi ta desviá ku hopi koutela for di e sentro di mi pániko.

I ora mi yega kaminda mi ta sinti mi sigur, tene mi duru ARNOLDO.
Bui mi mannan tras di mi lomba, pa mi n’ kòrta mi pòls.
I konvensé mi pa mi stòp di kore bai for dj’e.
Detené mi pa mi no der’é.
Konvensé mi pa stòp di buska otro realidat.
Stroba mi di kome mi sintimentunan.
Obligá mi dil kuné.

Ni maske e ta sigui bini bèk tòg. 

Ta doloroso mi sa, pero mi mester sigui.
Pasó el a bira parti di mi bida kaba; mi ta drumi i spièrta kuné.
Un kos ta sigur…ami no ke sigui biba asina…pasó esaki NO ta bida.

I ounke ‘Miedu’ ta ataká mi tur santu dia…
A yega un punto ku m’a realisá ku tin muchu mas den bida.
Tin muchu mas ku rabia.
Tin muchu mas ku tristesa.
Tin muchu mas ku ‘Miedu’ i teror…

Tin speransa.
Esei mi ke kere…esaki mi tin ku kere!

Iona Taylor