NA MI MAYORNAN: “NO TA IMPORTÁ”

Mas altu boso konstruí murayanan di hipokresia i mentira,
mas atlétiko lo mi bira pa mi por bula i burla di e mes murayanan ei.

No ta importá!

Mas tantu bia boso hiba mi derechonan Lèntfel, ku mas forsa lo mi bringa pa haña nan bèk. Si mi tin ku rosa mondi pa kolektá nan bek, lo mi hasié.

No ta importá!

Ta hasi manera boso no por tende mi.
Por disidí di kita kara ora mi konfrontá boso ku bèrdat.
Skondiendo tras di tapaboka.
Korda no tapa boka so, nanishi tambe mester tapa.
Òf boso gusta boso propio holó di putrimentu asina tantu?

No ta importá!
Mi t’ei ketu bai.
Pasobra mi tin algu asina fuerte den mi,
ku mi sa ku mi lo logra vense tur maldat.
Boso maldat!

Ku e maldat i e abusu kometé kontra mi,
boso a pensa ku mi amor propio lo a disparsé kompletamente.

No ta importá!

Sigui pensa asina numa.
Sigui kere ku boso ta ganadó.
Di patras lo mi bini!

Pasó loke tin den mi ta asina fuerte,
ku mi sa ku mi lo logra vense abusu.
Boso abusu.

Mas boso nenga di skucha mi bos,
mas duru lo mi grita.
Produsiendo mas volúmen ku kualke mikrofon.

No ta importá!

Pa tur hende porfin haña sa tur loke mi mester a tuma na boso man.
E ora ei nan mes lo yuda mi saka boso fo’i tras di boso fachada di mentira,
kaminda por a biba hopi aña.
Fachada di muraya bunita, dekorá tur na rosa.
Pero tur hende sa ku rosa ta bin akompaña ku sumpiña.

No ta importá!

A nenga mi eksistensia komo yu pa tantu tempu,
asta hasiendo mi un muhé promé ku mi tempu.
Pone mi duda den ken mi ta, kiko mi ta, kiko ta di mi i e pakiko mi ta riba e mundu akí.

No ta importá!

No ta importá, pasó awor mi a disidí di laga mi lus bria asina kla i fuerte ku tur hende mester mira mi i rekonosé ku mi t’ei.
Manera un orkan ku ráfaga ku mestertene kuenta kuné.

Pasobra mi a deskubrí ku mi tin balor.
I mi tin algu asina fuerte den mi, ku lo mi vense.
I lo mi sigui den bida, riba kadans di esaki
“…For di lodo mi a lanta
‘Dori Mako’ mi a kanta
Basta kos mi a wanta
De bes en kuando mi a spanta
Pero mi a sigui kanta
Te ora mi a lanta (atrobe)…” 

Iona Taylor