Mi sikatrisnan no ta yora mas

Mi sikatrisnan no ta yora mas.
Nò, nan no ta basha mas lagrima.
Ya pa algun tempu—nan a bira mi guia.
Den tristesa i skuridat,
den tur forma di mania,
mi ta buska e lus.
Nan ta guia mi riba e kaminda hustu,
inmortalisá— i yen di balor— un testimonio,
grabá riba mi kutis.
Man den man—manera dos amante,
nos a tuma asiento riba un ponton,
trahá ku palu di Meribá,
pa hiba nos bai na e otro banda.
Mi ta apresiá— mi sikatrisnan.
Nan no ta prueba di propiedat mas.
Pero é alma ku ta kompañami…
Mi sa di unda mi ta bini…
Porfin mi sa unda mi ta bai.
Asta si mi lo mester soportá hopi kontratempu.

Charlton G. Marcos
Groningen, 19 di yüni 2026