MI SA

Tin echo
Tin testimonio di e bèrdat
Tin kos ku mi sa
Pasó nan a pasa ku mi
Mi sa kiko mi tabatin bistí
Mi sa kiko mi no tabatin bistí
Mi sa kuant’or tabatin
Mi sa unda mi tabata
Mi sa ku ken mi tabata
Mi sa ku mi tabatin un “date”
Mi sa presis ki ora e “date” a para bira un “date” ku mi violadó

Mi sa ku su kurpa tabata riba mi
Mi sa ku su mannan tabata riba mi
Mi sa kon su man a pasa bai…
Mi sa ku tabatin mas kos ku el a hasi ku mi
Mi sa tambe ku mi no por papia tokante ‘e mas ei’

Mi sa ku mi tabatin hopi miedu
Mi sa ku mi a lora mi kurpa den otro
Mi sa ku mi a bringa ku tur mi forsa
Mi sa ku mi a grita masha duru mes
Mi sa ku mi a bisa: ‘Nò…nò…nò!’
Mi sa ku e la sosodé tòg.

Mi sa ku mi a keda ku masha bèrgwensa
Mi sa ku mi a sinti mi masha kulpabel
Pasó mi sa ku ta ami mes a traha e “date” kuné
Mi sa ku ta p’esei mi a sinti mi hopi fis

Mi sa ku mi sa hopi kos
Mi sa ku mi ke pa boso tambe sa nan
Pero mi no sa eksaktamente kon laga boso sa
Alabes mi ke sa, si di bèrdat boso ke sa kiko a pasa?
Pasó si ami tabata den boso sapatu, mi ta kere ku ami lo no ker a sa.

Iona Taylor