Mi palu di kalbas a disparsé

Mi palu di kalbas a disparsé
A basha betón na su lugá
Nan di ta siegu m’a bira
Pasó mi ta blo ta murmurá ku mi no ta mira niun palu di wabi mas
Na Hato, e serunan enfrente di mirador
ántes ta’tin airu fresku, awa ta kokobiá for di baranka
bai kumindá suela, muha pia di matanan indígena
Na ka’i mi defuntu wela den Kanga tabatin un dam chikí
pero sufisiente pa tene e suela muhá pa laga bonchi kabesura yongotá i krese.
Si patras den Muizenberg, ta’tin un dam ku konosé su mes historia
ora awa kai duru, bo ta tende su ronká for di un distansia…
Unda mi Kòrsou ta?
Yeremi, playanan ku santu pretu
Unda e dulsura di antaño a bai skonde?
Unda lo mi para grita sin miedu, ku malechornan lo ataká mi pober alma?
Mi pais, no bai drumi promé ku ami sera mi wowonan…
Mi ke mirabu bria, aunke e malditu katarat ta huzgami pa ta un hòmber di edat avansá.

03 augustus 2026, Groningen