Mayan

Ami sí sa masha bon
ta pakiko mi ta gradisí
Joseph Corsen ku su don
ku a krea su Atardi

pa nos awor por disfrutá
di loke el a publiká
un siglo pasá a desembarká
nos lenga su literatura.

Dia a yega na su fin
ma miedu, n’n’, ami n’ tin
sino sierto mi ta ta, sigur di
mi n’ por kambia mester muri.

Mirando bèk riba dia
i akto ku m’a hasi
mi sa mi no ta ria
pa mayan mi ta renasí.

Mi kurpa físiko ta ked’ atras
i ku mi guiadó nokturno
di strea mi ta drenta kas
mi mi ta biaha tasiturno

reuní ku mi spiritu
den esfera di planeta
mi ta risibí mi zjeitu
mi ta rekordá mi meta.

Ami sí sa basta bon
ta pakiko mi ta kon-
tentu tur anochi ku mi
pon’e kurpa di mi drumi.

Djo, mi ta sinti harmonia
un sereno relashon
ku e rei di kreashon
i mi ser i mi alm’i bida

kontentu ku mi buk’i bida
satisfecho mi ta purba ta
danki, lider guiadó,
pas ku bo b’a deseá mi

liber mi por skohe paso
miedu ta kuminda pa sukú
pa rekaí, inmobilidat,
mi boluntat no ta konta

rekordá mi futuro
tur mainta mi ta lubidá
ta imposibel duru
kòrda meta di mi bida.

Talbes n’ ta sa mi sa
sino mi ta sinti sí
alegria i gran pas
i ta p’esei kisas

ami sí sa masha bon
ta pakiko i di kon
solo ta baha den laman
p’e bolbe sali mayan.

Jeroen Heuvel, 2005

a skirbi e teksto (ku no ta poesia) akí den forma poétiko komo reakshon riba, i pa konmemorá ku un siglo promé korant a publiká Atardi di Joseph Sickman Corsen.