Lensu

Strepi ku ta marka,
muestra di un luchadó

prueba ku mi ta kla pa e derota 

Djaleu bo ta mir’é
Indikashon ku
esun ku ta
karg’é,
bistié,
komo armadura 

kompañero silensioso
rekuerdo di prinsipio 

Testigu di morto i triumfo
Di noshon, idea i deseo
Makutu di konsenshi i selebro 

Unifòrm di mi hubentut
mare mi wesunan por bisti e siguridat ku bo ta ilustrá
Mi karni imprimí ku bo patronchinan 

Makutu di konsenshi i selebro

Lora mi
tesor’i memoria
opstakulo pa mi sintí
Duki pa sosiegu, asta riba pia
Lapi di konsuelo, p’e dia pisá

Prenda o arma
Lora mi 

Testigu di morto i triumfo
Di noshon, idea i deseo
Makutu di konsenshi i selebro 

Ralph Winedt