lagami bai

profundidat ta lokual mi alma ta pidi p’e
no laga bo olanan di egoismo batimi den e barakanan di bo mente bashí.
no hogami na kantu.

mi mente ta bisa ku serka bo ta mas seif pasó mi por para pero bo koriente ta dominá mi energia i tardi of trempan e ta bai kumi, sofoká mi, lo mi pèrdè mi mes i niun hende n’ por hañami.

bo sa ku bo no por dunami loke mi ta deseá,
laga mi landa bai afó, kaminda mi pia no por mishi ku suela i úniko kos ku mi por hoga aden, ta amor.

ora nochi sera, lo mi topa ku e ami ku mi no konosé, pero luna ku strea lo lusa mi miedu i inseguridat.
i ora di dia habri i mi mira ku m’a sobreviví, solo lo keintami ku felisidat.

mi ke deskubrí mi mes i ken mi ta den profundidat.
mi ke sambuyá bai abou i buska pa konosé vulnerabilidat.
i kada bes mi bin ariba pa kue rosea mi pulmon ta wòrdu yená ku intimidat.

mi ke wòrdu romantisá, mi ke stima
mesun hundu i hanchu ku e espasio ku mi ta aden.

laman a mustrami ku t’esei mi meresé i mi ta kere i mi ke e.

Rebibá