Konsenshi Rebultá

Si mi ta’tin mas kurashi k’un masbangu,
lo mi a kana derechito bai Plenchi di Wilhelmina
basha poko bala ku mi lenga turdí

Aunke mi sa ku ta e pueblo su bala kòrá ta konta,
ta parse mi ku for di un prinsipio
pueblo su konsenshi ta tur rebultá

Na un distansha sintá, tur preokupá,
ma kue teima ku e piskechinan putri, bon bachá,
ku nan kara di yotín kòrtá i kachu riba nan kabes

Nan ta kana i modelá barata,
tuma parlamentu hasi nan barku di fruta,
i awor tur hostiná ta pega barku na kandela

Nan ta bati bleki sin mizerikòrdia,
tuma esun ku no por lesa òf kòrda
pa komedó di sumpiña

Den nan kabes ta henter pueblo
ta kabritu ku karné,
mansu manera pastor Martinus Joannes Niewindt a premirá

Esta un bèrgwensa pa mira
kon e hòmber pretu a para bira
mesun demful ku esnan
ku nan a tilda komo enemigu i opresor.

Charlton G. Marcos
18-05-2026 (Hanoi)