Kiko bisti ora ta bai misa

Tabata un djadumingu atardi kalor i floho den luna di sèptèmber i vários ama di kas den e bario bou di huma di Refineria Isla tabata hasiendo nan trabou di kas di kustumber den fin di siman. 
“Maggie, b’a lesa ku e obispu nobo ta bai introdusí regla pa loke bo tin ku bisti ora ta bai misa?” Mabel a grita na tranké, pasobra Maggie tabata dunando e matanan awa den su kurá na sierto distansia for di e tranké.
“Awèl, laga mi bisa bo un kos, bisiña; ningun obispu no ta bin dikta Mabel akí kiko sí i kiko nò e tin ku bisti ora e ta bai misa. Dia mi hiba di gana, mi ta bisti algu ku lo pone obispu su wowonan bula sali fo’i nan kashi! Bo konosé Dada, e muhé di Martinique ku ta biba mas pariba; awèl, algun dia pasá el a bai misa den su shimis di mas bunita, ku tabata pegá na su kurpa manera kuer’í kolebra, wèl mi ta bisa bo! E shimis práktikamente no tabatin un parti patras, ku eksepshon di dos ‘strèp’ fini ku tabata tene e shimis desentemente na ‘òrdu’. Na e parti dilanti e blusa tabatin un pida tela elástiko hanchu ku apénas tabata kubri su pechu grandinan. 
Awèl! Mi Tata dushi! Bo mester a mira e wowonan di e saserdote ora Mabel, komo delaster hende tabata yanga pa bai risibí Santu Komunion. Tur hende tabata wak e, anto e saserdote a hera di laga e kális ku hostia kai. Awèl, laga mi bisa bo, Maggie, dia ami bai misa un di e dianan akí, mihó e saserdote tene e kális duru i mas kos tambe, pasobra mi ta bai ‘dal e nòkout’ kompleto!” Segun Mabel tabata eksitá sin ningun motibu, Maggie tabata pensa kiko ta pone hendenan manera Mabel i Dada komportá di e manera akí.
“Mir’é ei, ta kon, asina un monton di karni por a asta pensa mes di bai misa bistí den nada otro si no ta ku un bistí hanchu pa desentemente kubri e enormidat di su kurpa?” 
Maggie mes tabata un dams hóben i atraktivo ku un kurpa ku lo por atraé basta mirada di hende hòmber, pero lo e no por ni pensa di bai misa den un shimis ku ta mustra demasiado parti di su kurpa. E tabata puntra su mes pakiko hende manera Mabel ta bai misa mes! “Ta kon e por konsentrá ora e ta resa i prepará su mes pa bai risibí, miéntras e ta bende su kurpa di e manera akí?” 

Joseph ‘Jopi’ Hart
tradusí pa Lucille Berry-Haseth