Popol Vuh I, 5

Esaki ta prinsipio di derota i ruina di e gloria di Vucub-Caquix kousá pa e dos chabalitunan oochi: e promé di nan yama Hunahpú i e di dos Ixbalanqué. Esakinan en realidat ta dios. Komo nan a mira e maldat ku e ser sobèrbè ei tabata hasi, i ku e ker a hasi esaki den presensia di Kurason di Shelu, e chabalitunan a bisa otro: 
‘No ta bon ku esaki ta asina, miéntras ku ainda no tin hende ta biba aki na tera. Asina pues, nos ta purba tir’é ku ‘serbatana’ ora e ta komiendo i nos lo kous’é un enfermedat, anto e ora ei lo e pèrdè tur su rikesa, su piedra bèrdènan, su metalnan presioso, su esmeraldanan, su prendanan di kua e ta asina orguyoso. I asina tur hende lo hasi, pasobra hende no mester broma ku poder i rikesa.’
(Serbatana ta arma ku Hunahpú i Ixbalanqué tabata usa i ku ta konsistí di un tubu di kaña hòl, ku ta sirbi pa lansa proyektil, bala di klei i flecha untá ku venenu, suplando nan ku forsa via un di e ekstremonan di e tubu).
‘Asina lo sosodé,’ e chabalitunan di, i kada un a hisa su serbatana pon’é riba skouder.
Awor bon, e Vucub-Caquix akí tabatin dos yu hòmber: e promé yama Zipacná, e di dos yama Cabracán; i e mama di nan dos yama Chimalmat, kompañera di Vucub-Caquix.
Zipacná tabata hunga bala ku e seru grandinan: Chigag, Hunahpú, Pecul, Yaxcanul, Macamob iHuliznab. Esakinan ta nòmber di e serunan ku a aparesé ora dia a habri i ta den un solo nochi Zipacná a krea nan.
Cabracán tabata move e serunan i e tabata kousa ku e seru grandinan i esunnan chikí ta tembla.
Di e manera akí e yu hòmbernan di Vucub-Caquix tabata proklamá nan orguyo: ‘Boso skucha! -Ami ta solo!’ Vucub-Caquix a bisa.
‘Ami ta esun ku a krea tera!’ Zipacná a bisa.
‘Ami ta esun ku ta sakudí shelu kousa ku henter tera tembla!’ Cabracán a bisa. Asina e yu hòmbernan di Vucub-Caquix tabata reta outoridat di nan mama. I esaki e chabalitunan a konsiderá totalmente fo’i lugá.
Ainda no a krea nos promé mama, ni nos promé tata.
Asina ta, ku e dos chabalitunan a disidí di mata i destruí Vucub-Caquix i su yu hòmbernan.

(tradusí pa Lucille Berry-Haseth)