Popol Vuh I, 4

E tempu ei tabatin masha tiki klaridat riba superfisie di tera. Ainda no tabatin solo. Sin embargo, tabatin un ser orguyoso di su mes yamá Vucub-Caquix, o sea Shete Wakamaya.
Ya tabata eksistí shelu i tera, pero kara di solo i di luna tabata tapá.
I Vucub-Caquix tabata bisa: ‘Berdaderamente, nan ta un muestra kla di e hendenan ayá ku a hoga i nan naturalesa ta manera di ser sobrenatural. Ami lo ta grandi awor, mas grandi ku tur ser kreá i formá. Mi ta solo, mi ta klaridat, mi ta luna,’ el a grita. 
‘Grandi ta mi splendor. Den mi klaridat hende lo kana i nan lo ta viktorioso. Pasobra ta di plata mi wowonan ta, resplandesiente manera piedra presioso, manera esmeralda; mi djentenan ta bria manera piedra delikado ku parse kara di shelu. Mi nanishi ta bria djaleu manera luna, mi trono ta di plata i ora mi sali dilanti di mi trono, superfisie di tera ta iluminá. Asina pues, mi ta solo, mi ta luna, pa humanidat. Asina lo ta pasobra mi bista ta tira masha leu.’
Di e manera akí Vucub-Caquix tabata papia. Pero den realidat Vucub-Caquix no tabata solo; e tabata blo broma ku su plumanan i su rikesa. Pero su bista tabata yega te horizonte so i e no tabata ekstendé riba henter mundu. 
Ainda no tabata mira kara di solo, ni di luna, ni di strea, i ainda dia no a habri. Pa e motibu akí Vucub-Caquix tabata broma manera si e ta solo i luna, pasobra klaridat di solo i di luna no a manifestá ni ostentá ainda. Su úniko ambishon tabata di hunga grandi i dominá. Anto ta e ora ei a bini e diluvio pa motibu di e pòpchinan di palu. Pa mayanan maishi ta base di bida. Hende ta bini di tera i di e alimento sagrado, i e ta dependé di naturalesa pa e eksistí.
Awor nos ta bai konta kon Vucub-Caquix a muri i kon a vens’é, i kon Kreador i Formador a krea hende. 

(tradusí pa Lucille Berry-Haseth)