JUAN RAMÓN JIMÉNEZ tres poema

Oktober

Drumí mi tabata riba suela i mi 
dilanti e tera sin fin di Castilla,  
ora Otoño tabata lor’e paisahe den 
e dulsura oraño di su solo bahando.

E plug paralèl tabata habri e tera 
skur poko-poko i un man simpel 
– habrí – tabata parti simía 
honradamente den tera.

Diripiente mi kier a ranka mi kurason 
i tir’é, yen di un sintimentu sinsero
i profundo, den e buraku hanchu di
e tera tièrnu; ban mira si mi garn’é
i sembr’é, Primavera lo kier mustra 
mundu e mata puru di amor eterno.         

        (fo’i:Sonetos espirituales, 1916) 

Rònt di e tòp…

Rònt di e tòp
dje pal’i mata
mi ilushonnan 
ta bulando.

Nan ta palomba 
koroná ku lusnan 
outéntiko,
i bulando nan
ta plama músika.

Mira kon nan 
ta drenta i sali 
for di e palu solitario!
Mira kon ku oro
nan ta rondonami!

  (fo’i: Poesía, 1923)

E paranan ku ami sa di unda

Henter anochi
e paranan a keda kanta
nan kolónan pa mi

(No e kolónan 
di nan álanan di mainta
den e airu fresku dje solonan

No e kolónan
di nan pechunan di atardi
den shinishi kayente dje solonan 

No e kolónan
di nan piku di tur dia
ku den anochi ta paga,
manera e kolónan konosí
di e blachi- i flornan ta hasi) 

Otro sort’i koló,
di e promé paraiso 
ku e ser umano a pèrde pa semper,
e paraiso ku e flor- i páranan
konosé enormemente.

Flor- i paranan
ku ta bai-bini holiendo,
bulando tur rònt’i mundu.

Otro sort’i koló,
di un paraiso ku n’ por kambia
i ku den nan soño hende ta atravesá.

Henter anochi 
e paranan a keda kanta
e kolónan pa mi.

Otro sort’i koló
ku nan tin den nan otro mundu 
i nan ta saka durante anochi.  

Sierto koló ku, 
bon spièrtu, m’a yeg’i mira,  
i mi sa tambe na unda.

Mi sa di unda 
e paranan a bini
pa kanta pa mi den anochi.

Ami sí sa di unda,
atravesando bientu i ola,
pa nan kanta pa mi 
e kolónan di mi.        

(fo’i: Tercera antolojía poética, 1957)

(un adaptashon di Henry Habibe)