Ilusion no.77

For di mi bentana mi viril sunu
a saluda e ciudad
Calor di Aurora a drenta mi porionan
mane’ absorba pa un spons seco

Tchoupitoulas* a bira mas beyaco
p’e bol’i fuego aki
Rayo pafo a recarga mi energia
eyacula fo’i mi curpa anochi

Un mashin di type cant’i muraya rustico 
sperando pa mi uz’e
Y un teclado lo a zona den mi piso
mane’ den un ritmo monotono

Cas editorial ansha tabata spera mi obra,
muestra di mi maestria
Luz di Teatro Orpheum cendi pa mi so
pa presenta mi monologo

Pinot Noir den kelki n’e boca di Bourbon
pa celebra mi obranan
Mi presencia a honra e caya di Pica
Y amante tabata cay na mi pia

M’a termina e anochi na hotel
c’un yiu di Erzulie Freda
Djey Aurora a yega mi saludo
grandi y firme p’e ciudad

Ma for di mi bentana e bista a cambia
di industrial pa pueblito
M’a mira mi bariga rondo tapa algo
cu ni por saluda Hooiberg….

*Tchoupitoulas: asina ta e nomber di un caya historico na New Orleans, Louisiana, loke ta core paralel cu e riu Mississipi. E caya ta conecta e parke Audubon cu e distrito financiero. Originalmente Tchoupitoulas ta nomber di un cultura indigena cu a habita e region di Mississipi.

Angelo Luis Angela