Felo su problema

Mi konosé Felo kasi henter mi bida i mi ta konsiente ku e ta un gai desente. Komo mucha, Felo tabata yuda su tata, un mèslá, ku tabata traha por lo ménos kuater luna kada pasa aña pa mantené nos kas bieu. Komo un mucha tímido, Felo tabata preferá hasi e trabou ku su tata tabata dun’é pa e hasi – loke e tabata ehekutá mashá na òrdu – na lugá di e mes tuma inisiativa. 
Manera m’a bisa kaba, un bon gai, pero e tambe a bira víktima di e epidemia di droga. 
Felo a kasa na e edat relativamente ‘bieu’ di 45 aña ku un dama di República Dominicana, kende a pasa kasi henter su bida na Kòrsou. E diferensia den edat tabata basta grandi, pero Flor tabata un dama inteligente, kende su étika di trabou i su desensia a dun’é un bon reputashon, asta serka su bisiñanan, kendenan no tabatin masha apresio pa “San Dòmnan”, manera tabata yama nan na Kòrsou. 
Pero asta nan, sinembargo, mester a atmití ku Felo lo por a hasi un pió eskoho. 
E problemanan a surgi ora Flor a sorprendé Felo ku dos yu ku el a haña tempu ku e tabata teenager. E muchanan a lanta ku Flor su mama tur e añanan akí, i Flor no a menshoná nan eksistensia promé, pa miedu ku lo e no a haña pèrmit pa traha di parti di imigrashon. E tabatin suerte ku Felo a logra konvensé departamento di imigrashon ku lo e keda responsabel pa e muchanan akí. 
Felo a insistí ku e muchanan, di 16 i 17 aña, mester bai skol pa nan siña algu pa gana nan pan di kada dia, pasobra e no tabata dispuesto di paga pa nan estadia mas largu ku 3 aña. 
Desafortunadamente e muchanan no tabata asina trahadó manera nan mama, i masha lihé nan a kai den problema. Esun problema a okashoná otro, i un dia skol a manda un di nan kas, pasobra el a purba bende droga na skol. Felo a haña trabou p’e serka un hardinero ku e tabata konosé, i el a spera ku kos lo drecha. Pero esun mas hóben tabata asta pió. E tabata mas inteligente i tabata buska manera di gana plaka i tabata preferá tuma riesgo, na lugá di traha komo hardinero manera su ruman. El a bira lider di un organisashon ku ta hasi negoshi ku droga. 
Ora Flor su mama a bira malu despues ku el a regresá su pais natal, Flor a disidí di bai Santo Domingo pa kuid’é. 
Su yu mas hóben a dun’é un paki ku piesa di outo pa un amigu di dje. Ora Flor a yega su pais, duana a arest’é pasobra e tabatin dos kilo di coke den e pakete ku su yu a dun’é. Nan a hink’é den prizòn i Felo no a tende nada, sino te ora Flor su mama a splik’é na telefòn kiko a pasa. Ora Felo a tende henter e relato, el a disidí di informá outoridatnan na Kòrsou tokante e yu mas yòn, di kende e tabata sospechá ku e tambe tabatin algu di ber ku e aresto di Flor pa kontrabanda di droga. Ora polis finalmente a arestá henter e ‘gang’, Felo a pidi outoridatnan pa ekstraditá e yu akí pa Santo Domingo pa e aparesé den korte. Felo a deklará ku e no ta responsabel mas pa su yu awor ku e ta ekstraditá, tampoko pa su ruman mas grandi, kende e tabata sospechá di ta embolbí tambe, pasobra Felo a nenga di kere ku e ruman akí no tabata sa nada tokante asuntu di droga di parti di su ruman chikí. A ekstraditá e tambe pa su pais natal. 
Anke komportashon di su yu hòmbernan tabata un enorme desapunto pa Flor, e tabata aliviá ku Felo a resolvé e problema i ku tòg el a keda aseptá komo su kasá.

Joseph ‘Jopi’ Hart
tradusí pa Lucille Berry Haseth