Federico García Lorca: Rosa & Bientu

(un adaptashon di Henry Habibe)

Rosa ta biniendo su so
i birginalmente tokando
su luna di perkamènt
riba un kaminda di santu,

E silensio sin strea,
huiendo di su kanto,
a kai unda awa ta bati
su anochi yen’i masbangu.

E polisnan kasi na soño,
hasiendo warda na Playa
i kuidando kas i tereno
dje hendenan na mando.

E piskadónan ta traha,
pa selebrá nan dansa,
nan patio di kokolishi
i rámanan di mata.

Su luna di perkamènt
Rosa ta bini tokando.
Bientu a mir’é i a lanta
manera un bestia brabu.

Bok’i tribon a habri pa
tira un piropo masha largu,
miéntras e ta pèilu e mucha
i toka su flùit suave-suave.

– Mi yu, bini akí, lagami
hisa bo bistí pa mi mirabo.
Habri flor di bo skochi den
mi dedenan di ansiano.

Rosa, tirando su instrumènt,
ta sali na kareda di spantu.
E bientu-machu ta siguié
ku un spada kayente na haltu.

Rumor di laman a krem,
kadushi a bira pálido,
flùit ta zona den sombra
i kriki ta blo yena espasio.

– Kore Rosa, kore Rosa,
p’e bientu hambrá no hañabo!

– Kore Rosa, kore Rosa!
mira kon e kier garabo!
Satanas di higra malu
ku su leng’i kandela largu.

Tur spantá Rosa ta drenta
den un dje kasnan mas haltu,
na unda hefe di polis ta biba
den un mansion na Rancho.

E gritu a lanta tres polis
fo’i soño, ku a bini di biaha,
tapando nan frenta i nan wowo
ku nan kepi birá di banda.

Rosa a haña un glas di lechi
di e hefe di polis na mando
i un kalè di yanefer, ku e
mucha no kier a bebe, klaru.

I miéntras Rosa ta konta
su aventura blo yorando,
Bientu ta klaba su djente den
e panchinan riba dak, di rabia.