E Circulo p’e Suicidarionan cerc’e Fierno di Dante

Na Dante su Fierno,
na piso number cuater
(of ta cinco, ya mi n’ por corda mas!)
tin un mondi rib’un sero
na unda tin mata cu ta sangra,
hubada cu herida humano.
Virgilio, un boswa competente
y poeta pagano masha logra, kemen cu:
“Esayanan, e palonan ey no ta sconde spion, Shon Dante.
Nan ta djis e almanan kende a suicida,
kennan a mata nan curpa,
sin sabi cu mesora guli nan a guli
yabi di e porta di shelo den nan, y no
meramente puiro di cianura.”

Na Aruba ta crece e mata
Plumeria cu tur ora kier duna lechi.
Pober Plumeria tin lechi paden
mescos c’un mama nobo
kende a perde su unico yiu 
durante or’i luz, 
ta keda colma cu lechi inutil.
Asina mes, e kier duna
ofrenda, sirbishi, pecho di muhe den aire.
Ma unicamente e ciego buladonan di or’i scurito
ta bin busca bebida cerca dje,
(ta bin come herida cerca dje).
Y Plumeria no por nenga nan,
maske e vampironan ta mahos
y e ta masha bunita mes,
e ta mara na suela.
Tini reis cu ta liber,
maske na tera e ta mara?

Tin watapana cu ta drumi (soña, hasta!)
riba custia benta,
mane’ boshi boa herida, 
bestia grandi cu a bolter 
cay n’un banda, ta sosega 
pa ward’e fin.
Rasa di gigante cu a haya sa
danki na informante,
cu nan epoca a pasa keto bay 
y no tin nada mas di haci.
Cu e silabanan sangriento
di nan nomber, Watapana,
por construi e palabra “Tawata”.

Salo ta habita tur cos,
Tur cos e por shiwata,
mane’ un catibo actuando como Dios
den Shon su ausencia, asina gososo 
ora e doño oraño golos
a sali bay shop na marche.

Tin mata cu ta yora para na pia, 
yorando semper bay (mane’ na Mangel Halto,
entre otro ehempel, ni sikiera ‘magina pa Miguel Angel) 
y boshi cadushi cu parce solda cu ta yora,
nan legion di legria
muriendo sin morto, eternamente muriendo 
na pia.

Arturo Desimone