den bo brasa fragmentá

abo t’e orguyo hustu 
di kada humano
bo ta duna e individuo 
afirmashon ku e tin 
un sunami di sosten
siensia biológiko ta prueba
ku te den DNA
bo ta keda e brùg ku 
niun oséano no por separá
dedenan imprentá 
ku un kontinuashon orgániko 
di bo naturalesa

pa medio di bo wes’i lomba
nos ta drenta mundu.
i bo tei selebrando nos eksistensia.
nuebe luna tan sperá.
rondoná ku un nèshi di 
protekshon.
karanan lusí manera bela
i nos binida t’e lusafè

bo ta na kontrali tambe 
ora Dios susurá
“Bin kas mucha, bo lugá ta prepará!” 

ku alma na luto 
bo ta laga lágrima 
ta bo kompaño ora 
nos pulmonan a bai sosegá.
na entiero bo ta onra nos memoria.
interkambionan presioso, rebibá.

bo ta aya, 
ku selebro meditativo .. pensativo 

balorando relashon 
integral.

dékadanan promé ku nos nase
avochinan ta invertí 
gota di esfuerso 
i klòmpi di sabiduria.

nan perseveransha i historia 
ta laga un mapa p’e ruta 
nos identidat fundá 
den nan eksperiensia.

i p’e lado kaminda 
nos bida a bira herensia.
einan, bo ta keda tene potrèt 
di nos bou di bo repchi
ku goso, bo ta konta 
kuentanan di nos andá.
e tono di nos bos, 
seka bo nunka lo no ta pèrdí 
nos karakter ta un dokumento 
ku bo lo studia.
bo ta karga nos klòmpi i gota 
pa dékadanan ku lo bini.

bo ta presente

ora premirá
ora di 
drenta,
gatia, kana, trompeká.
lanta i kore bai 
den e ruta di bida 
na salida 
presente 
i despues 
bo ta kanta nos memoria.

den e diseño tin 
mama spiritual
amigu ruman.
i yu sin dolor regalá.

un konstelashon di hende kibrá 

amor ta un eskudo ku no ta pèrmití
flecha di pleitu i fayo penetrá.

burakunan ta revelá
ku bo splendor di goso 
no ta nada di perfekshon.

sali fei kueba di skuridat ku
“Bo sa bon bon ku mi ta stima bo, nò?”

brasanan fragmentá.
einan nos kurason ke relahá 
brasá 
den bo presensia.

sí.
sí, abo.
abo.
abo mes.

famia.

Ralph Winedt