Komplikashon den famia

M’a nase na Boneiru, pasobra mi tawela a emigrá for di Kòrsou pa Boneiru komo hóben, kaminda el a namorá di un bunita mulata, kende el a saka mashá lihé na estado. Pa evitá skandal nan a kasa promé ku mi tata a mustra ku e tabata na kaminda, i nan a bai biba ku mi wela su famia den e pueblo di Antriol. Mi welanan a haña un otro yu, un yu muhé, mi tanta Claire, kende tabatin e mala suerte di duna lus na un yu ‘djafó’ di un hòmber kasá di Nort ‘i Saliña: mi prima Altagracia, kende nos ta yama Chaya. Despues ku Welita a fayesé, Opa a kasa di nobo ku un dams di Coro (Venezuela) muchu mas yòn kuné. Su nòmber di kariño tabata Nanda, kende a duna lus na un yu hòmber, djis un tiki mas bieu ku mi. Mi mester a yam’é ‘tio’, loke nunka mi no a hasi. 
Despues ku Opa a fayesé nos a bai biba na Kòrsou, kaminda m’a bai skol i m’a topa ku e mucha muhé ku kende m’a bin kasa despues. Lo m’a preferá keda Boneiru, pero e ora ei lo mi no a topa Altagracia, kende a proba di ta tur loke un hòmber por a deseá. E no tabatin solamente un karakter agradabel, el a proba tambe di ta un ekselente mama pa nos yunan. Su abilidat den kushina tabata ekselente, di moda ku kasi nunka nos no tabata bai kome na restorant. Nos tabata preferá invitá amigunan bin kome, na lugá di gasta plaka na kuminda karu i ménos dushi.
E bida ideal akí a sigui te dia nos úniko yu muhé, Maria Elena, a bin namorá di un studiante venezolano na UNA: Gustavo Alcázar Cordero. Pasobra Gustavo tabata un studiante estranhero ku solamente un pèrmit temporal, kasamentu aki na Kòrsou tabata un poko problemátiko. Registro sivil tabata rekerí tur sorto di dokumento, entre otro, sertifikado di nasementu, te di terser generashon. Ta e ora ei numa Gustavo su identidat berdadero a bin sali na kla. A resultá ku e ta ñetu di Nanda, kende tambe a bandoná Boneiru ku su yu despues di fayesimentu di Gran (Opa). E misterio di Gustavo su nòmber di famia tabata ku nos abuelo – Gran – nunka no a kasa ku Nanda, di moda ku ofisialmente su desendientenan a krese ku e fam Cordero. Dia mi ‘tio’ a kasa ku mama di Gustavo, e nòmber a bira Alcázar de Cordero.
Mi pregunta ta, “Kiko ta Gustavo su relashon ku nos yu muhé, i nos por pèrmití e matrimonio akí tuma lugá trankilamente?” 
Apresiable lektor, si bo a logra komprondé e storia kompliká akí, mi ta invitá bo awor pa yuda mi – pa mi no bira loko – sugiriendo mi un solushon aseptabel pa mi problema.

E teksto akiriba ta un storia inventá

Joseph ‘Jopi’ Hart
tradukshon: Lucille Berry-Haseth