Bores dos porta (parti 8, final)

Atrobe limpi di tur desgrasia

Tende Bores ta kontami kon a sigui ku difuntu Valdez su instrukshonnan: ‘M’a butami pa sigui nan “al pie de la letra”. Manera m’a yega kas djis promé ku solo sali, m’a dal un baño den purá pa mesora subi kama, morto kansá di henter e drama di nervio, miedu i di strès ku m’a pasa aden serka François. M’a logra drumi un ratu te na momento ku diripiente un stem fini leu asina den mi orea a spiertami ripitiendo: “Bores lanta bo wak bou’i kama. Bores lanta bo wak bou’i kama. Bores lanta bo wak bou’i kama.” 
Ma bula lanta tur tolondrá pero tòg poko poko m’a logra sak abou pa asina tira un bista bou’i kama. Mi kurpa a rel ora m’a topami ku un pòch’i glas sospechoso ta wak mi fiho den mi kara. Un pòchi tapá ku un kontenido di blach’i mata kortá na pida pida den un likido diki i hel manera strop’i abea. Anto pa kolmo, lo bo’n kere Win. Aki tabata trata di un akto kondenabel muchu leu buská. Skucha esaki. Den dje tabatin un pasfoto bieu di mi ku mi pober kara tur borá ku feneta. M’a sinti un spantu horibel te ku e tiki kabeinan na mi kabes a reis lanta para klabu klabu mané klabu di stal. Pero ora m’a haña mi kalmu bèk m’a saka mi konklushon dirèkt. Hesus, mi Dios santu, e ko’i mal ora aki ta vudu mes. M’a kana bai kushina purá ku e pòchi den mi man pero leu fo’i mi kurpa pa puntra Shon Mi gritá, ku rabia, ki karaho mishi e porkería ei bou’i nos kama. El a barstu mesora na yoramentu i ku un kara di miedu ta tembla sin fin el a kore kontestami manera un yuchi skondí tra’i mamai su saya: “Bores pordonami, por fabor pordonami Bores. No tumami na malu. No ta mi falta. Ta mamai su idea. T’e a mandami but’é eibou pa wak si nos relashon ta drecha.” 
Mesora m’a sali bai den kurá purá huntu ku Shon Mi i te den huki patras el a yudami sende un kandela. Eiden m’a hisa benta e pòchi ku mesora a rementá duru manera un bòm. Mira’ki Win, spanta nos mata. Ata nos na kareda. Na e momento hustu ei m’a wak kon madam skondi trai kortina di un bentana tabata lur nos ku wowo grandi mané di baka siguiendo tur nos moveshonnan. Sigur sigur el a wak tambe ora m’a hisa benta su pòchi di vudu yen di maldat den kandela pa dje forma ei kibra su maldishon diabóliko kontra mi. Manera el a ripará ku mi bista a kai riba dje, el a hala kita mesora.
Bèk den kas m’a probechá pa dal bai ku e di dos instrukshon dje difuntu. Mi di ku Shon Mi: “Tendemi’kí shon, kuminsá pak bo bulchi awor’akí mesora pa awe nochi mes, nos sali ban kas di mi mama. Nos no por keda niun dia mas aki den.” Dicho echo. E anochi ei mes nos a drumi aya un soño trankil.
E dianan ku a sigui tabata esnan mas dushi i di pas di henter mi bida. Tur mi problemanan matrimonial, emoshonal, físiko i mental a pasa den un tiru pa historia. Un milager Win. Mi tabata e hòmber mas felis riba planeta tera. Anto Shon Mi tabata por la goma. E tabata kompartí e felisidat aki ku mi sin fin. Nos relashon a kambia total te ku el a para bira un kos úniko i spesial. Un dje anochinan ei, selebrando ku un bon biña e momentonan fantastiko ku nos tabata pasando aden, m’a pidié pe bolbe kasa ku mi. Ku un reakshon bon i sinsero di su banda el a aseptá.
Despues dje siman ei, asina m’a haña un chèns m’a tumba pa santana na Roodeweg pa kumpli ku loke François a pidimi hasi. Atardi promé ku bahada di solo m’a kana drenta un kurá’i santana solitario ku grafnan bandoná i mal tené, tur na mondi. Ami ku un sigá Willem II den mi saku di karson i un nèchi bukèt di flor den mi man, m’a ponemi ku tur e bon intenshon di mundu pa gradisí difuntu Valdez rikamente pa e fabor eksepshonal otorgá na mi persona i alabes pa dun’é mi pordon inkondishonal, manera François a yam’é. E regalo spesial akí di difuntu Valdez tabata un liberashon di mi alma di bèrdè. Asina m’a yam’é. Asina m’a mir’é fo’i e momento ku e maldishon satániko ku tabata tormentami dia aden dia afó a disparsé kompletamente. Sin e bunita regalo spiritual akí, mi eksistensha no tabatin sentido. M’a sinti kla kla ku durante i despues dje par di dianan sublime akí huntu ku Shon Mi m’a nase atrobe limpi di tur desgrasia.
Basta un ratu mi mester a kana buska aki aya pa porfin logra haña difuntu Valdez su graf. Ya despues den e pas i silensio ku tabata reina rònt di mi, m’a sende mi sigá i den un monólogo na bos haltu kuné mirando shelu m’a supla e huma manda laira pa di tal forma mi gradisimentu i mi pordon por a yega serka dje. Na pas ku mi konsenshi, m’a bandoná e lugá konvensí shen por shentu ku m’a hasi e hòmbu un bon. Asina nos a keda kit. Ami ku su yudansa m’a logra libra mi kurpa i mente di tur malu i e bondadoso difuntu ku mi pordon inkondishonal na final di kuenta por a haña su pas eterno. Amen.’ 

Bores ta rekapitulá su experiensianan horibel

Poko mas despues, Bores a bolbe kasa ku Shon Mi. Maske e hòmber tabata pa basta tempu un pia aden un afó tantu na kas komo den su “matrimonio mitar mitar”, manera e mes tabata yam’é, tòg na e momento hustu el a para ketu un ratu pa hasi un reflekshon profundo i asina tuma e desishon kategóriko di sali bai buska solushonnan pa tur su di malunan. Na final di kuenta el a haña atrobe su stabilidat emoshonal i e iluminashon di spiritu santu pa e por a bin komprondé bon kla ku bida no ta konsistí di kosnan di bon bida so. Komo hòmber di misa devoto, Bores a sigui Dios su mandamentunan ku obediensia i sumishon total. Nan dos, esta Bores ku Shon Mi a buta tur renkor, odio i demas kos negativo un banda i nan a pordoná otro tur ku tin pa mesora kuminsá di nobo un bida di pareha kasá ku, na promé lugá, respèt pa otro manera debe i meresé.
‘Hòmbu Win, mi tin ku baha kabes i konfesá na abo, mi amigu fiel di tur tempu, ku si mi no a hasi mi kosnan di sinbèrgwensa ku mi kasá, mi no a hañami den e sèt di desgrasianan akí. Durante un periodo largu di mi bida esakinan tabata kousa di un sufrimentu mahos. Hesus, m’a pasa den poko tròbel kruel, ruman!’
Na kontinuashon Bores, librá di tur malu, a rekapitulá mas despues, i di un forma muchu mas ophetivo i rashonal, su eksperienshanan horibel ku el a pasa aden: ‘Topa Shon Mi den kaya di Otrobanda biniendo stret den ami ku Lulu su direkshon anto pa kolmo ami bon brasá kuné, ta kon ku bo mir’é, un konfrontashon di pániko ekstremo asta pa esnan mas balente riba e planeta akí.
Pa motibu di mi tèrkedat di buriku bestia, m’a hañami forsá ta pasa henter un mardugá di fin di aña ku bientu friu i ku un pal’i áwaseru sin ke stòp bou di un sobrá’i ket mei mei di un trupa di kabritu. Kana m’a kana yega serka Shon Mi e mainta tempran ei den un estado deplorabel ku mi paña shushi, papa muhá i ku mi kurpa tur na holó stèrki di pishi ku kaka di bestia. Skual e muhé a para skual mi sin miserikòrdia.
Djis despues, m’a hañami pa mi di malu na mi di dos porta ku un gai bibu ku durante mi ousensia poko largu a probechá pasa mi dilanti pa buta beslag definitivo riba mi muhé ku flèt, ku kama ku tur demoño. Ora m’a pidi Lulu kuenta i rason, mal hostiná el a laga sa ku lastu tempu mi no a wak mi kaya na un manera serio i responsabel. Pero realidat ta ku mas ku un aña largu moviendo na pia obligá a strobami mashá di buska Lulu su drechi manera tabata mi bon kustumber. Mòsh tabatin tur e tempu ei den su kurá mi outo riba blòki pa drecha m’a na final el a kore bend’é sin mi pèrmit. Mi mes ruman ku tur ten tabata gosa di mi konfiansa a dal mi un palu formal ku a hasimi hopi doló.
Atami aya pabou na Leliënberg durante marcha di karnaval den modo agresivo ta kore ataká Lulu su stimadó nobo i vlur e ku un skòp devastador den su atras. Lulu den un deskontrol total a sali tanki tanki mi tras pa buskami pa likidá ku un barank’i pieda demoño grandi.
Túresten, madam ku su odio siegu kontr’i mi a dediká tur su tempu na venená mi mente den sekreto ku su porkerianan di vudu. Pa e motibu akí, m’a bin hañami un mardugá grandi kargá ku áwaseru, bientu fuerte ku bos ku welek na rant di un pos bieu den mondi patras di mi kas, kla pa bula aden. Shon Satanas mes a gatia sali fo’i e soño di horor ku n’e momento ei tabata traha ku mi. Bati el a batimi ku skòp sakami fo’i kama i ku forsa diabóliko el a lastrami hiba te na rant dje pos. Ta mi angel wardadó a bula bin skapami na wow’i angua di un morto sigur. Anto tur e tempu akí mi no a maginá niun ora so ku ta madam tabata tras di tur e tragedianan abominabel akí ku tabata torturami sin miserikòrdia.
Di su banda, Shon Mi pa venganza, na sièrtu momento a disidí dunami purba di mi mes un remedi. “Wowo pa wowo, djente pa djente”. Esei el a laga sa ora ku rabia m’a pidié dunami un splikashon konvinsente tokante e fulan kabé limpi kurpa grandi ku el a slùip hinka den kas i den su kama. Pa kompletá su venganza mortal kontr’i mi, el a tira flèt den mi kara un revelashon kurú te aya. Kos ku komo hòmber machista a hasimi hopi doló. E di ku mi sin rel niun tiki ku mi no ta hasi mi trabou bon, ku e ta mediokre i ku den kama ta un tiger brabu lomba yen e mester pa chapi su kurá limpi limpi, kalma su hamber kompleto anto but’é drumi ketu ketu.
Pero tur e gaba ku el a gaba su macho kumplidó, bisando mi ku e ta un tremendo konosedó di hende muhé su deseonan sekreto i splikando alabes ku luho di detaye ku su tiger brabu lomba yen su trabou den kama tabata algu fenomenal, fabuloso, fantástiko, sublime, ets., tòg na final lei di karma a mustr’é ku man di heru ku su sistema di paga malu ku malu no tabata ètòl e forma korekto, hustu i elegante pa atendé ku nos krísis relashonal. E soa di baina ku su stimadó pashonal a peg’é kuné tabata sin duda e prueba klaritu ku Shon Mi tabata hopi robes bezeg. Anto pa kaba di dòrna su pifio garafal ku korona di oro, el a pegami ku e kos fis ei tambe. Ata nos dos tur na drep serka dòkter. Esta un bèrgwensa di marka mayó! Anto riba esaki a reis otro desaster mas. Shon Mi tabata ne momento di nos konflikto marital na estado, sin e sa mes. Ku barika anto ku drep! Unda b’a tende un desaster asina, Win? 
Mi “disfuncion erectil” manera e dòkter charlatan di baina ei, esta Ricardo a yam’é, a hinkami den un hansha formal i a butami kore un kabé’i gai demoño buskando rònt nos isla riba instrukshon dje sinbèrgwensa hambrá pa plaka ei, poko webu di patu pekin chines. E maldishon kriminal akí di madam kontra mi potensia di machu potente ku mi kohonnan kargá ku testosteron di toro di raza Holstein spesial pa dèk a kibra mi ego na wèrki. Otro gòlpi mas di bida ku e muhé hasidó di brua ei ku su malditu pòchi di vudu skondí bou’i kama a pompami kuné.
Finalmente l’homme spirituel François di Wishi ku yudansa balioso dje bon alma di difuntu Kid Valdez a librami, Dios grasia, di tur desgrasia. Ami a keda porfin liber i limpi di madam su kondenashon satániko i e difuntu su bon alma a haña su sosiegu eterno bon meresí.’

Epílogo

Lulu su dos yunan ku Bores a keda bon kuné. Hopi despues ku Lulu su stimadó nobo a fayesé, Lulu tambe a bira bon bèk ku Bores. Tempu a trese sanashon pa kaba ku tur renkor entre nan dos. E hòmbu tabata baha bai bishit’é ratu ratu pa asina e por a sigui wak su dos muchanan. De bes en kuando Lulu tabata pidi Bores un yudansa finansiero i Bores ku mil kariño pa su yunan tabata kooperá mesora.
E relashon entre Bores ku Shon Mi a sigui asina harmonioso ku ora Bores a puntr’é na dado momento si su dos muchanan di aya pabou por a pasa bin bishitá nan rumannan aki na kas, Shon Mi ku mashá humildat i amor di bon mama a bai totalmente di akuerdo i a duna permit sin niun problema. Bores a gradisié rikamente i de paso e di kuné: ‘Si bo stima shon, bo tin ku stima su kachónan.’
Bores mas dilanti a bin haña di regalo su bon ko’i kareda plus un kantidat reimu di plaka komo gradisimentu di un ruman muhé mayó di dje ku tabata stim’é mashá i ku a fayesé di un ora pa otro. Bores a lidia i karga kuné te na final.
Despues di basta un par di aña felis i kontentu huntu, Shon Mi a bin fayesé i Bores a keda su so den kas. E tres yunan muhé mas grandi no a apresiá hamas e trato inhustu ku e tata a duna nan mama. Te dia djawe, nan no ta parti un pan ku e hòmbu. E yu hòmber ku a nase despues ku nan a bolbe kasa a emigrá pa tera friu pa estudio i a keda biba ayá. Esaki sí a keda semper den bon relashon ku e tata. 

Fin