Bores dos porta (parti 7)

Caspar the friendly ghost

Boeis, Bores su ruman hòmber ku tabata pars’é mashá, tabatin, banda di su kosnan di mala mucha, poko aspekto i karakterístika komo hende mashá kopioso. Bores ku ami fo’i mucha nos tabata hopi será ku otro. Mi tabata di kas. Un ruman mas den famia. P’esei mi tabata bon na altura di Boeis su detayenan pekuliar ku tabatin su mes famia i tambe bisiñanan den bario ratu ratu bou di un impreshon grandi.
Semper tabatin papiá ku Bores ku Boeis sigur sigur mester tabata oochi idéntiko dje mesun simia i dje mesun barika. Pero realidat ta ku Bores a bin mundu riba un mainta bon tempran di den siman i presis kuarenta dia despues Boeis a bula sali “from nowhere” pa asina e famia bin haña nan di un momento pa otro ku otr’un yuchi nasí resientemente mei mei di nan sin ku niun hende na kas, ni zùster of dòkter na hospital por a splika mamai, manera nos tur tabata yam’é, fo’i kua huki el a sali. Ta pastor so, den tur e kuchi kuchi ku frum frum den bario rònt dje fenómeno hopi straño akí, a laga sa durante su predikashi na misa, pa niun ora so kuestioná Dios su boluntat santu, pasobra ta nos kreador omnipotente so sa kon, na ki momento i pakiko e ta hasi su kosnan i ta nos deber komo bon kristian di aseptá, respetá i siña biba ku Señor su mandato. Amen!
Te dia djawe Boeis su aparishon muchu straño a keda un misterio sin aklarashon. Tanten tabatin hende den bario ta yam’é yu’i spiritu. Nan tabatin den nan kabes e pensamentu firme ku Boeis tabata obra i grasia di spiritu santu. Otronan tabata tent’é caspar, spoki, spetakel, zumbi i skat di otro nòmber fastioso relashoná ku spiritu. Boeis tabatin detayenan personal mashá partikular. Sigun pastor e tabata un den mil miyon i tabata tambe loke iglesia katóliko sa yama un fenómeno divino di kreashon humano.
Fo’i mucha e tabata konta mamai di su enkuentronan djaserka ku spiritu. Na mas ku un okashon el a wak kla kla kon spiritunan yen di mal ehèmpel tabata gara su baiskel den kurá bai kuné anto zwai e bent’é den mondi patra’i kas, djis pa prèt. Sigun e hòmbu, esaki tabata nan wega favorito pa teima kuné. Otro un bia el a bin ta konta na kas kon el a wak den e higr’i solo di tramèrdia, un trupa di spiritu bula sali na kareda manera djaka spantá ora ku un loader tabata bashando abou un kas di palu bandoná pa hopi tempu. Ora kachónan dje bisiña tabata grita yora mahos, Boeis tabata sali bai tira un bista pa despues bin konta ku spiritunan maligno tabata rondoná kas dje bisiña. Dòkter di orea despues di algun test ouditivo a laga mamai sa e tempu ei ku e mucha aki por a kapta zonidonan ku frekuensha masha haltu ku un hende normal no por, manera kachó. Pastor a laga sa tambe ku Boeis por a apsorbá e energia, frekuensha i vibrashon di spiritunan den serkania.
Su kurpa tambe tabata un kos leu fo’i normal. E tabatin kosnan masha straño ku el a nase kuné. Na un man e tabatin 6 dede. Na su pechu e tabatin tres punt’i tete, na su barika dos lombrishi i mas abou tres pipita anto di ñapa dos kabes, sigun un frei bieu di dje a laga sa sin muchu diskreshon hopi mas despues. “Dos kabes, un grandi anto un chikí p’e kishikí kuné. Hahahahaha……. Un felatio kuné, manera Boeis tabata yama e aktividat seksual akí, tabata un ko’i chupa dede! Hahahahaha…” Asina e chick a revelá Boeis su sekreto íntimo tur na harimentu.
Su basilon magistral di tur tempu tabata un pustamentu ku plaka ku e tabata yama hende afó kuné. Ora e tabata sinta na mes’i dominó, su pasatempu favorito, ku un integrante nobo, un djis despues at’é ta yam’é afó dje manera humoristiko akí: “Brò, mi ta sigurabu ku den ami ku bo, den nos dos, nos tin sinku pipita. Keubo, bo ke ban un 50? Basta plaka el a gana ku su kek. Pero un dia a bló un wais gai ku ker a bai, no 50 sino 200 bubu! Apesar di Boeis su sospecho i duda, tóg na final, el a bai di akuerdo. Ora a yega e momento di berdat, e tèrsio ku un harí sarkástiko a hisa buta su un pipita riba mesa. “Bròder, ata’ki mi un pipita. Mustrami awor bo kuaternan. Ban pa kaba! Hahahahaha…” Fo’i dje bia ei, Boeis a legumai su basilon.
Boeisitu no kera bai skol pa nad’i mundu. Speibel sin fin. Su èksküs di semper tabata ku e sa mas ku e maestronan pará dilanti klas. Na final, mamai no a sigui kans’é mas tokante bai skol i a lag’é pa su kuenta. M’a ta Boeis t’esun ku kere òf no, tabata duna su kuater rumannan beilès den matemátika ku físika banda di kualke otro materia kompliká ku nan por tabatin tròbel kuné. Anto su siguiente mainta na skol ata nan ta bati nuebe ku dies pa prufwèrk. Un kos sí. Semper ora di sinta na mesa ku nan, promé kos, e tabata pidi e rumannan pa kompañ’é den un orashon na Spiritu Santu pa esaki iluminá kada un di nan ku su sabiduria infinito. Su devoshon i fe den Spiritu Santu tabata grandi.
Ata otr’un partikularidat mas di Boeis. Ei sintá na mesa, e rumannan tabata keda boka habrí ta wak e hòmbu ku wowo grandi ta skirbi i lesa di patras bai dilanti. Boeis tabata hari su barika yen tumando nota dje reakshon di strañesa spontaneo riba nan kara.
Despues ku e notisia a plama na skol ku Boeis tabata e gran maestro i guía di hùiswèrk di Boresnan, mayoria di mayor a kore bin pidi i asta yora e hòmbu p’e aseptá nan komo kliente pa nan yunan. Na dado momento kabes di skol ku maestronan no por komprondé kiko tabata pasando. Resultadonan di prufwèrk, tèntamen ku èksamen tabata surpasá tur espektativa i tur rekòrt eksistente. Durante un reunion di maestro mas despues, esakinan a laga sa ku ora puntra e muchanan pa splika kon bin nan resultadonan ekselente di último tempu, nan tabata kontestá den kor ku ta “Obra i Grasia di Spiritu Santu”.
Boeis tabata dominá tambe algun lenga strañero. Papia mandarin den mésun sintonía ku kasá di Cheng, doño dje minimarket den bario. Aya na Otrobanda e tabata gusta bai para kombersá ku hindunan di pakus den nan propio lenga. Meskos tabata e kaso ku e bisiñanan libanes den bario. Ora puntr’é kon e por papia e lenganan ei asina bon, su kontesta tabata semper ku ta “Obra i Grasia di Spiritu Santu”.
Latin tambe tabata di su dominio. Tur santu djadumingu mainta e tabata bai yuda sirbi misa pa despues keda te atardi lat na pastorí ta yuda pastor ku tur sorto di trabou di den kas ku den kurá. Fo’i un beibel na latin ku pastor a fi’é, el a para bira un bon konosedó dje “lingua mater omnes linguae”, esta e lenga mama di tur lenga, manera pastor tabata yam’é. Pastor tabata laik e hòmbu mashá. Sigun pastor, Boeis tabata un ehemplar bibu di un “Illuminatus a Sancte Spiritus”.
Despues ku frater Benno, organista ulandes di tur tempu na misa di Wishi a mustra Boeis den buelo di para algun detaye tékniko i musikal dje òrgel, Boeis a para bira un djis despues e organista base di misa. Frater Benno no por a komprondé pa nada di mundu di unda su disípulo a saka tur su kualidatnan eksepshonal ora ku riba un djabièrnè santu ku un misa lata lata el a sinta skucha Boeis su “performance” impreshonante di algun parti dje obra maestro Matthäus Passion di Bach.
Su mente tambe tabata spesial. Boeis tabatin un seksto sentido super desaroyá. E por a lesa hende nan mente ku mashá fasilidat. Bisiñanan ku tabatin problema, duda, deskonfiansa òf sospecho tokante kualke asuntu kompliká ku otro hende, ta serka Boeis nan tabata bai pa guia i konseho. Na dado momento el a kuminsá kobra p’e konsultanan pero asina mes su klientenan tabata buta plaka riba mesa sin niun problema i ku hopi satisfakshon nan tabata lanta bai. Kosnan a bai dje leu ei ku asta un bisiña den bario i hefe di departamentu di reshèrshi na warda di polis di Rio Kanario tabata konsultá e hòmbu ratu ratu ora tabatin kasonan di investigashon kriminal masha kompliká sin posibel solushon. Mayoria di bia Boeis tabata dal e klabu riba su kabes ku su klarividensha balioso i al kaso saká fo’i su bala di kristal ku e tabatin wardá bou’i su kama. E bala mágiko akí el a hañ’é di regalo serka Minga, un señora dominikano gitano i klarividente, manera sa yama esakinan, ku tabata apresiá Boeis mashá. E hòmbu tabata bai di bishita ku hopi regularidat serka Minga aya na ser’i Sharo i ei el a bin siña traha ku e Orbe, e palabra tékniko pa e bala.
Boeis a kompartí su hopi momentunan di legria, spiritualidat, humildat i pas den seno di su famia durante 23 aña, 3 luna, 3 siman i 3 dia nèt nèt. Den un sorto di diario ku el a bai laga bou di su kusinchi di kama, mamai a bin topa e informashon sorprendente akí. Nunka el a bin komprondé di kon su yu stimá tabata hasi anotashon di su tempu mei mei di su sernan kerí ku asina tantu presishon.
Riba un djadumingu mèrdia pastor a bèl kas preokupá pa puntra p’e. Ta kon bini e no a presentá pa yuda sirbi misa? Fo’i tempran mamai a wak su kama bashí. Kos ku e tabata hasi regular, esta keda un anochi pafó’i kas. Pero semper e tabata kana yega su siguiente mainta bon tempran riba un trankil. E bia aki un, dos, tres, kuater i mas dia a pasa i nada dje hòmbu. Manera nada, el a disparsé fo’i pantaya. Te dia djawe niun hende sa kiko a sosodé kuné. Su desaparishon misterioso a keda un echo sumamente tristu sin splikashon, tantu na kas komo na mando polisial ku a atendé e kaso ku hopi interes i atenshon. Pastor atrobe a rekordá bisiñanan baidó di misa pa no kuestioná Dios su boluntat santu. Boluntat di nos Kreador semper tin su “raison d’être” ku E so konosé. Manera el a bini, asina el a bai. Pastor a laga mamai sa ku sernan humano eksepshonal manera Boeis, fiá nan ta. Awe nan tei, mañan nan no tei mas. Den e kaso akí, Dios a  manda Boeis mundu ku un solo proposito i un mensahe kla, esta pa nos riba e isla bendishoná akí sigui buska sin sosiegu e lus divino di Spiritu Santu. Ku su lus divino den nos, tur kos bon ta posibel. Esaki tabata e mensahe humilde ku e tabata bosiferá tur bia ku pastor dun’é un chèns p’e dirigí su mes na e fiel baidónan di misa prosedente di basta bario rònt nos isla.
Un kos ta sigur. Hermano Boeis a bai laga un tristesa profundo i un bashí enorme den hopi hende nan kurason. Durante añanan largu, Boresnan na kas, huntu ku basta bisiña den bario, a sinti Caspar the friendly ghost su falta mashá.