Bores dos porta (parti 5)

Esta un bèrgwensa!

Ata otr’un di malu horibel ku a sigui kibra e hòmbu. Un mainta bon tempran ora el a lanta bai baño, el a ripará ku tabatin un kos ku no ta klòp ètòl na momento di uriná. El a sinti un kimamentu fuerte anto despues un grawatashi fèrfelu ku tabata kans’é. Mesora el a pura bai su dòkter di kas bou di un preokupashon enorme. Aya, manera dòkter a tira un bista mesora el a konstatá un soa, konosí den boka di pueblo komo drep. Ora dòkter a puntr’é ku kara harí na mod’i chiste, den kua nèshi fruminga el a hink’é, e hòmbu nervioso a kore splika dòkter ku ta ku Shon Mi so e tabatin sèks último tempunan akí. “Keremi dòkter, ku niun otro hende mas!”
Awèl. Djis despues dòkter a manda yama Shon Mi urgentemente. Ata Shon Mi tur na drep. Anto pa kolmo de los kolmos a bin sali na kla ku e tabata na estado tambe. A resultá ku ta Shon Mi su amigu íntimo, su amante komprensivo i komplasiente, su maestro i bon konosedó di hende muhé su deseonan sekreto, manera el a gaba e hòmbu te aya, a peg’é kuné. “Esta un bèrgwensa! Esta un humiashon! Esta un falta di rèspèt di marka mayó! No por. Aki no tin pordon!”
Esei tabata palabranan di lamento profundo i na mes momento di rabia ku e tabata ripití despues ku el a kore sali kabes abou tur na bèrgwensa fo’i dòkter su ofisina. Manera el a yega kas, Shon Mi sin perde pa gana a kore ku e hòmbu porko ei fo’i su kama, fo’i su kas i fo’i su bida na mashá mal manera. But’é porta pafó. Mand’é bai den su pepe sin niun klase di konsiderashon. “Ché, esta fis no!”
Ya fo’i e momento krítiko aki despues dje akto demasiado bergonsoso di Shon Mi, no tabatin otr’un kaminda di buèlta pa mi brò su relashon marital. Ni maske Shon Mi a keda insistí i hura te na morto ku e yu den su barika ta di Bores, e hòmbu no a bèk niun inch. Na promé lugá, e wega sin pia sin kabes di hinka un sinbèrgwensa abusadó den kas anto bai kama kuné djis pa asina straf Bores; na di dos lugá, e falta di rèspèt garafal di tira den su mes kasá su kara e kalumnia kruel ku e no ta hasi su trabou bon den kama; na di tres lugá, e akto sumamente rechasabel di sali na estado nèt durante dje pará amoroso ku el a tira i por último pega su mes kasá ku drep ta den totalidat un rekòrt mundial den pifiamentu. Partimentu tabata e úniko alternativa, sigun mi brò su pensamentu rashonal. Y esei a sosodé tambe.

Webu di patu pekin

Problema no ker a laga Bores na pas. Djis despues dje krísis bergonsoso di drep, kosnan a sali fo’i panchi kai den kandela ku e hòmbu. Mal ora a bolbe straik. Di un dia pa otro pa nada di mundu e no por a para mas. Lanta mainta anto bin hañ’é ku e atversidat tristu akí. Ko’i bira loko. Otr’un trouma kruel pa su estado mental. ‘Win, ta manera tur kos a kaba pa mi riba e planeta akí. Kiko mas di bon un hòmber impotente por spera di bida?’ Ku awa na wowo el a sinta kontami ku su hèrmènt di trabou no ker a funshoná mas, a ni ku kran!
Den desesperashon grandi el a sali bai su dòkter di kas. Esaki a mand’é dal un Calpol tres bia pa dia durante dos siman. “Despues dje di dos siman Bores, otro gai lo kanta”, asina dòkter a purba kalma e hòmbu. Pero dia i anochinan largu, yen di fèrdrit tabata pasa, anto Bores no tabata sinti ni wak kambio. Despues di basta pidi porfin dòkter a lag’é bai spesialista. Urólogo a manda e hòmbu bai hasi sèt di tèst pa na final ata Bores ku un resèpt den su man pa otr’un kantidat grandi dje mesun pilchinan. Mal frustrá el a legumai kür ku sita serka spesialista mesora. Bores a sinti kla ku su problema no tabata bayendo den bon direkshon.
Na dado momento su hansha di dia aden dia afó a kuminsá hunga mal wega ku su mente. “Anto loke ta mas frustrante Win, ta ku bo no por papia dje asuntu íntimo akí ku niun hende. Bo no por puntra hende unda pa bai pa ousilio. T’abo ku bo mes mester lucha den pia dje balentenan pa haña e kaminda di un solushon pa bo doló.
Pero pa mi di suèltu den tur mi malunan un djis despues pa kasualidat m’a bin topa den kòrant Bala riba e ultimo pagina te abou ayá un aviso na spañó mashá chikí di un tal doctor Ricardo den Punda ku tabata ofresé yudansa 100% efektivo pa entre otro problemanan di erekshon.
Mesora m’a supla bai den su direkshon. Aya el a kuminsá ku splikami ku e no sa trata malesanan ku sustanshanan kimiko konvenshonal sino ku produktonan di orígen puru natural. I pa mi problema spesífiko el a pidimi di bia pa mi trese un dozein i mei di webu di patu. Anto no di kualke patu krioyo kèns. No Win! El a pidimi na un manera kla i kategóriko sin laga niun duda atras pa mi bin ku webu di patu pekin! Un bestia balente tur na spir di rasa chines. Sigun e hòmbu patu pekin su webu ta un alimento ultra potente i sumamente efektivo pa mi problema. E ta lata lata di proteina, mineral ku omega-3 plus e meta-vitamina D ku ta stimulá produkshon di testosteron, e hormona vital pa regulá tur loke tin di haber ku nos funshon seksual. Huntu ku e webunan el a pidimi bin tambe ku un kantidat reimu di gèmber, zjozjolí, kané i nétumuskat. 
Win, atami awor ta move ku bùs i ku konvoi rònt Korsou ta buska un dozein i mei di webu di patu pekin sin por a keda kla den promé instansha. Bo mes sa, sin un ko’i kareda di bo mes e buskamentu ta bira hopi mas kabuya. Bai aki bai aya, lor’akí lor’ayá, anto na final di dia nad’akí nad’ayá. Ku masha koutela m’a disidí puntra algun konosí i amigu unda mi por haña e benditu webunan di patu pekin kumpra; pero Win, bo sa kon e kosnan akí ta bai. Semper tin hende kla pa hasi chèrchi dje asuntu asina nan sinti ku mi no tabata duna nan e informashon kompletu. Un dje brònan pompero akí a puntrami stret ku kara harí: ‘Hòmbu Bores, ki intenshon bo tin? Kuantu ròndu bo ke bai anto? Mi kier sa b’a bira poko peligroso. Bai poko poko ruman. E sort’i webunan ei no ta ko’i hasi wega ku nan, kos serio nan ta!’ 
Pero Dios grasia, bingo! Porfin m’a logra gana e promé bataya akí. Un chino ku mi sa topa ratu ratu na snèk a mandami te pariba ayá na Fuik. Sigun el a splikami, un bròder chines di dje tin krio dje raza di patunan akí. Fo’i dje snèk ei mes m’a supla un pasá bai pariba. I Aleluya! Chino di Fuik a dunami un preis razonabel pasobra m’a siguré ku despues mi ta bin pa mas. Chino tabata saliendo direkshon di Punda i asina el a kore bentami djis serka dje dòkter naturalista spesialisá den naturopatia, manera el a bedei mi na vários okashon despues. Promé ku esei, m’a pasa kumpra e sobrá ingredientenan na marshe nobo. Ku mashá kuidou ku mi sak’i webu bon gará, m’a kana subi trapi pa mèldu na e hòmbu su kantor den un di dos piso. 

Den mi kabes tabatin otr’un hende ku no t’ami

Su siguiente dia atardi mes, mi mester a pasa tuma serka e dòkter su asistente e promé bòter grandi dje preparashon likido diki ku un koló hel bèrde straño pa e mesun anochi ei mi start ku mi tratamentu intensivo di tres siman. E asistente a splikami ku e ta usa mei dozein di webu pa kada bòter dje preparashon. Despues e dòkter a dunami e instrukshon klaritu atrobe pa mi bebe sin salta unu, 100 cc dje preparashon dos bia pa dia despues di kome durante un siman. ‘Despues dje di tres siman wanta bo wil señor Bores’, asina e hòmbu a warskiu mi, ya ku poko mas konfiansa. ‘Pasobra ora e fulan ayá di bo disidí reis pa lanta buelo, bo asuntu ku bo tròbel. Abo wak kon bo ta hasi pa bah’é. No bini aki pa yudansa pasobra te ainda no ta eksistí un “antídoto” pa e efekto superpotente dje webunan di patu pekin. Hahahahaha!’ Dje manera humorístiko akí e hòmbu ker a hinka ánimo i optimismo den mi kabes.
Pa bo sa Win, for di e promé dianan dje tratamentu m’a kuminsá sinti un kambio hopi satisfaktorio i esaki a hasimi mashá kontentu. El a yenami ku speransa i legría. M’a pensa ku si t’asina ta e promé siman, korda despues dj’esun di tres. Kosnan lo bira normal atrobe porke yes! Manera tabata ántes of muchu mas mihó ainda. E pensamentu positivo akí a kuminsá eliminá poko poko pero sigur tur e negativismo destruktivo ku mi tabatin den mi kabes ya pa algun tempu kaba. Ku hopi fe i sakrifisio mi tabata bebe e likido diki i marga ku tabata hole bòñòñò, pero mi no tabata wòri ètòl. Importante ta ku m’a sinti un kambio radikal. Aya serka doctor Ricardo manera el a pidimi yam’é, ta chisti ku harimentu so tabatin den nos ku nos tokante e efekto milagroso dje webunan di patu pekin. Ami tabata hopi  kontentu ku loke mi tabata sinti i wak ku mi mes wowo i doctor Ricardo tabata bati pechu i saka djent’i oro sin fin pa e echo ku e por a yudami 100% ku mi problema.
Pero Win, lo bo n’ kere. E niun tiki bon notisia dje asuntu aki ta ku mi legria i mi pensamentu positivo no a dura mashá. Despues dje di tres siman e efekto milagroso primintí a mengua konsiderablemente i ya esaki no tabata manera den prinsipio. M’a sinti ku atrobe mi tabata bayendo atras, esta ku e potensha ku m’a sinti na promé instante a kuminsá bira e impotensha di ántes. Anto tende esaki, den nos ku nos, den konfiansia. E bianan ku m’a purba bai kama ku Shon Mi mi hermènt no kera hasi su djòp a ni matá. Ni maske m’a purba pechu abou, pechu ariba, sintá, pará, na rudía, kabes abou, kabes ariba, ets., nada brò! Kaso perdido! Mishon imposibel! Na final despues di mi intentonan desesperá, mi mester a bati retirada forsá. Dobla warda. Despues bentá riba kama mal frustrá ta wak plafònt sin por a pega soño, mi tabata buska pa loko den mi kabes pa wak si mi por a haña un splikashon lógiko pa e desaster akí. Un kos ta sigur. Den e kamber di mal ora ei tabatin un energia negativo ta kologá. Un mashá mal vibrashon. Algu maligno ku tabata kibrami i traha ku mi mente. Anto bo sa Win, keremi. Mi tabata sinti n’e momentonan ei ku den mi kabes tabatin otr’un hende ku no t’ami. Hopi straño ruman.
Mi no a bai mas serka doctor Ricardo. m’a perde tur konfiansa den e hòmbu ku su kuent’i Nanzi tokante webu di patu pekin potente. Basta un par shen heldu m’a pag’é korektamente pa na final mi ripará kla kla ku m’a bai bèk na e mesun kondishon di disfunshon erektil, manera e tabata yama mi kaso. Papia nèchi, hunga ròl di dòkter milagroso, pero na final niun dònder. Manera nan sa bisa: Hopi skuma, tiki chukulati! Un par di siman despues, m’a lesa den Beurs ku ámtenarnan di imigrashon a kore kuné fo’i nos isla na mal ordu. But’é ku man duru riba un avion di Aeropostal anto mand’é bèk su lugá. E korant a yam’é tur sorto di baina. Kwakzalver, oplichter, beunhaas, bedrieger. Mir’akí Win, nèk bòsh’i hende. Kue nan tur kabes abou. Mi mes tambe. 

(ta kontinuá)