Bores dos porta (parti 4)

Nan ta buska Bores pa likidá

Basta dia kaba Bores su bida tabata leu fo’i normal. Anochi e no por a drumi un soño trankil. Ratu ratu e tabata bula lanta ta dal gritu manera bestia di mondi, morto spantá, ku kalafriu, papa sodá ta tembla sin fin anto den un hansha pisá ku di baina e por a hala rosea na drechi. Tur e síntomanan insoportabel akí tabata pa motibu di poko nagmèri horibel ku tabata kastigá e hòmbu su estado emoshonal sin kompashon. Soñonan abominabel ku tabatin di haber ku vampironan hambrá pa Bores su sanger, ku spiritunan maligno ku tabata changa Bores, but’é lomba kontra muraya anto busk’é pa kap ku chapi ku houru, ku mònsternan apokalíptiko ku tabata pèrsiguié sin sosiegu i ku chupakabranan ku djente di tribon ku tabata busk’é pa habraká.
Un mardugá grandi ku un mal tempu mahos, ku un áwaseru torensial, ráfaga di bientu fuerte i bos ku welek di kore skonde, un di su soñonan makabro a but’é bula lanta fo’i kama i tur zonzá el a sali bai pafó bela yen pa kore drenta un mondi será patra’i kas.
Despues dje anochi di terror ei, Bores tur perturbá i ku un preokupashon grandi a kontami ku ora el a bin bei, e tabata sintá papa muhá ta tembla di miedu i di friu na rant di un pos di tempu’i katibu. Pero e parti di mas misterioso tabata ku e hòmbu no por a kòrda mashá di loke a sosodé promé ku esei. E no por a komprondé pa nada di mundu ki mish’é ne oranan ei den mondi bou di un pal’i áwaseru ku asina un mal tempu anto pió ainda, sintá ta tembla na rant dje pos di baina ei. Ta manera un spiritu mal bat salí fo’i fièrnu a gar’é anto lastr’é bai kuné te na rant dje pos pe bula aden. ‘Pero Win, mi angel wardadó tabatei ku mi i el a manifestá su mes presis n’e instante ei pa medio di un welek ku bos manera un misil ku a baha bin kai net den mi banda pa asina sakami fo’i den e trans kruel ku mi tabata aden. Gloria i alabansa na Dios Tata ku a manda su angel pa skapami di un morto sigur.’
E mesun mardugá ei promé ku solo sali, ya un Bores muchu mas rùsteg a saka su konklushon kontundente. Nan ta buskami pa mata. Un hende den mi serkania ta buskami pa likidá. No tin otro splikashon.

Un krimen abominabel sin pordon di Dios

T’asina ku madam a deklará Bores persona suma non grata i a start un guera friu kontra dje fo’i dia ku el a bin haña sa ku Shon Mi tabata karga barika dje hòmbu. Shon Mi tabata yuda e mama devotamente ku gastunan di kas pero na dado momento pa motibu dje barika, e mester a stòp ku trabou i p’esei e no por a sigui kooperá mas manera e mama tabata deseá.
Ku kada ko’i bon bida, ko’i sinbèrgwensa òf paso fo’i sla ku Bores tabata dal, madam su odio tabata krese mas i mas te pasa tur límite. Dia madam a sinti ku e no por a wanta mas, el a tuma e desishon drástiko pa destruí Bores su mente i su spiritu ku un trabou makabro di bruha. Tur tempu, madam tabata stima su porkerianan di bruha ku no por a wak lus di dia.
Asta Yubi, su kasá, a kai na dado momento den desgrasia serka madam i tur ten tabatin papiá ku e pober hòmbu aki a bira viktima di un trabou shushi di parti di madam. Yubi a wòrdu kondená pa restu di su bida pa drumi anochi den su pida pikòp mal batí i tur na frus bou di un pal’i mango patra’i kas, mané un miserabel kachó ku a pèrdè tur kariño di kas. Fo’i dia ku madam a maldishoné i saké fo’i kas, nunka mas e por a buta un pia den su mes propiedat. Dia aden dia afó, e hòmbu tabata kore kaya mané chòler sin pariba ni pabou anto anochi lat morto kansá i mort’i hamber e tabata kore drenta kurá’i kas, parker bou dje pal’i mango pa porfin duna e bòdi su sosiegu. Pa kolmo Yubi ku tabata un hòmber kurpa grandi mester a trosa e kurpa mané kolebra pa porfin por a logra haña un posishon mas o ménos kómodo riba un sobra’í stul tur na buraku ku bòsh’i fer punta skèrpi ku tabata bula sali i hinka e pober hòmbu rònt su kurpa, mané fakir. Su anochinan tabata un kastigu insoportabel.
‘Anto Win, lagami kontabu. Bo n’ por kere. Yubi’kí su fayo imperdonabel pa madam tabata e echo ku na dado momento el a kuminsá hala bin tiki tiki na mi banda tumando parti pa mi. Na mas ku un okashon m’a tend’é hostiná ta grita madam p’e stòp di mete den nos asuntunan di hende kasá. Pa laga nos na pas pa asina nos mes buska solushon pa nos problemanan. Pasobra madam fo’i mainta tempran te anochi lat tabata kritiká i kondená na bos haltu mi relashon kompliká ku Shon Mi. P’esei madam ku su odio siegu pa mi no por a pordoná Yubi su traishon flagrante pa nada’i mundu i a kore deklará e hòmbu tambe komo su enemigu mortal pa un djis despues kuminsá destruí su mente ku su arma sekreto, esta vudu, usando un pòpchi chikí na imagen di Yubi ku e mes a traha ku e kabes, kara ku garganta tur borá ku feneta. Poko poko pero sigur el a hasi e pober Yubi kèns kèns. Mata el a mata su spiritu. Piká hòmbu! Un krímen abominabel sin pordon di Dios. Likidá su mes kasá ku a dediká henter su bida den bon i den malu na madam ku Shon Mi, su yu stimá. Hopi tristu hermano. Ko’i grita yora.’

Wowo pa wowo, djente pa djente

Na dado momento Shon Mi, mal fadá i ku un set grandi pa vengansa pa motibu di Bores su romanse skondí, a disidí sin pens’é muchu ku awor sí ta basta, ku e ta bai all the way ku Bores. Ku otro palabra, kòrta e hòmbu falsu ei su orea meskos. Diferente asuntu ku ya no tabata un sekreto tabata traha ku Shon Mi su mente di dia i anochi sin dun’é sosiegu. Un di nan tabata ku Bores ku su falta di loyalidat no tabata mustra niun klase di rèspèt ni pa Shon Mi ni p’e matrimonio. Otro akto ku e no por a pordoná tabata esun ku Shon Mi a bin haña sa mas tempran ku lat ku Bores a dek shon baisait. Banda di esakinan Bores tabata duna tur prioridat na su agènda skondí dor di keda biba na kas dje mama pa asina e por tabatin tur libertat pe hasi su bagabunderianan sin ku Shon Mi sa. Pa kaba di pompa nan krísis matrimonial, madam tabata pusha palu bou’i kandela konstant pa kima Bores su atras i dje forma ei kaba ku e lastu sentimentunan di kariño ku ainda Shon Mi por tabatin p’e hòmbu.
Na dado momento ora ku Shon Mi su akto di infidelidat tabata mas ku bisto, Bores a reis riba dje pa puntr’é flèt kon karaho e por a hinka den su kabes pa korta su orea. Ta asina ku na mas ku un okashon ora Bores tabata kana yega kas diripiente e tabata topa un hòmbu kurpa grandi, kabé limpi ta sali purá purá di porta patras na un manera mashá sospechoso pa despues krusa kurá anto kana bai drenta madam su kas. Ora Bores a puntra Shon Mi ta ken e fulan ei, ku mal rabia el a laga sa ku ta un lotgitùr ku mamai a buska p’e pa esaki pasa bin drecha un lèk den su baño. Bores di: ‘Ta kuantu lèk tin anto? Tur ora asina?’
‘Mi’n sa Bores! No puntrami un dònder. E asuntu ei ta fo’i bo kuenta’, asina Shon Mi a par’é di gòlpi. Ya mal hostiná, el a probechá mesora pa dal bai k’e broyo akí te na final. El a mustr’é ku na promé lugá fulan ta trat’é mashá nais i ta dun’é tur rèspèt ku e meresé komo hende muhé. I den mesun rosea el a sulfurá su disgustu di basta tempu ku e tabatin den su bok’i stoma ta kansé sin fin: ‘Banda dj’esaki, e ta hasi ku mi loke hamas i nunka bo kera hasi.’
‘Ta ki karaho mi no kera hasi anto?’, Bores a puntr’é tur gritá.
Ku un kurashi i determinashon impreshonante, Shon Mi a skupi su gal kargá ku veneno riba e hòmbu den forma di un revelashon kurú i kruel ku e tabatin kla butá p’e: ‘E ta baha bai eibou di mi tur bia ku nos ta den intimidat pa komplasemi i hasimi bira loko loko! E ta karisiami manera un amante komplasiente, manera un pal’i hòmber, manera un maestro i bon konosedó di hende muhé su deseonan sekreto. T’esei bo kera tende Bores? T’ei bo kera yega ku mi? Pa nos bira enemigu anto klaba kuchú den lomba di otro? Awèl, para skucha anto i asumí bo responsabilidat a la machu. Bisti bo karson, karaho! No bin hunga ròl di yo no fui. No bin hunga kèns. Ku ki derecho bo ta tribi blo riba mi ku e kar’i atras ei pa kuestioná mi desishon? Ki dia ámi a tribi puntrabo dikon ábo ta korta mi orea, ah? Dònder op hòmbu! Bai laba!
Anto pa bo sa, Bores, Dios grasia ku nos ta bibando den un mundu sivilisá kaminda tin derecho igual tantu pa hende hòmber komo pa hende muhé. Aki no ta Medio Oriente kaminda hende muhé ketu bai ta katibu te na morto di hende hòmber. Kaminda hende hòmber por hasi i deshasí den nan matrimonio manera nan haña ta bon. Aya hende hòmber kasá tin e privilegio islámiko di tin mas ku un muhé pareu. Pero Bores, esei t’aya. Aki ta otro. Aki otro gai ta kanta. Anto ata otr’un bèrdat grandi di bida ku sigur sigur bo konosé bon bon, pero bo tin e mal maña di lubidá ora ta kumbiní bo. Den tèstamènt bieu tin un lei di heru ku ta papia palabra kla ora ta trata di sorto di abusunan i inhustisia di marka mayó manera esun akí. E regla infleksibel akí ta un lei di karma tambe. Wowo pa wowo, djente pa djente. B’a traishonami Bores, b’a tumami hasi. Awèl, ata meskos p’abo. Tuma awó. Drechi p’abo. Wowo pa wowo, djente pa djente. B’a hinka den bo kabes egoista ku komo hende hòmber machista te den bo higra, bo so por tin bo di dos porta? B’a kere tambe ku pasobra ami ta hende muhé, mi mester a sera mi snùit, wowo ku orea anto keda sintá chòmbòn chòmbòn den kas sin bisa ni hasi nada? Ban serio, Bores! No lubidá ku esun ku hari delastu ta hari mihó. Hahahahahahahahahaha.’ 
Shon Mi a slèk un harí di alivio i satisfakshon profundo ku a resoná rònt kas. Mesora el a kore bai su kamber anto klap e porta sera duru duru su tras. E konfrontashon dramátiko akí huntu ku Shon Mi su revelashon íntimo kargá ku veneno a krea un bashí i un apatia enorme entre nan dos ku a kontinuá pa hopi tempu den kua nan tabata ignorá otro totalmente i no tabata parti palabra ku otro. 

(ta kontinuá)
Fernando A. Rubiano