Bores dos porta (parti 3)

Marcha di karnaval na Bándabou

Un par di dia promé ku karnaval na Bándabou mi brò Bores -ku ya tabata poko mas rùsteg despues ku Lulu a dun’é su retiro inkondishonal i sam sam ku esei a dun’é di konosé ku e no ta bonbiní mas aya pabou- a lagami sa ku e tin planiá bai marcha di karnaval na Bándabou i ku si mi ke djòin. ‘Ok’, m’a bai di akuerdo. Nunka promé m’a bai e evento akí i esei tabata nèt un bon chèns pa nos ban trep un ratu den mi Z28, V8, 350 HP, luluis luluis ku un siman promé a yega bon paketá den un konteiner prosedente di Miami.
Riba e dia di karnaval m’a pasa buska e hòmbu bon tempran na kas, manera palabrá, pero ora m’a puntra Shon Mi p’e, esaki a informami ku Bores a gèt basta ratu kaba. M’a haña e notisia ei poko straño pero anyway, mi no a sigui puntra i mesora m’a supla bai pabou.
Un tráfiko mal pegá hopi promé ku Barber a forsami kue direkshon di Soto. Mi di den mi mes: ai, no ta problema, via Soto tambe mi ta yega mi destinashon.
Djis promé ku Soto m’a lora na man drechi pa kore stret bai Leliënberg pasobra m’a komprondé di Bores ku t’aya e marcha ta ranka sali. Pero una bes riba e kaminda ei m’a shòk pisá ora ku diripente mi bista a bai kai riba un hende ku parse Bores sintá su so na un parada di bùs ku asina un kara largu di tristesa i ku wowo pèrdí den bashi. Atami ta lastra un brek anto bèk e outo pa mi dòbelchèk si ta Bores mes m’a wak. Sí, t’e mes. M’a basha pitu pa tres’é bèk for di un otro dimenshon ku e tabata aden. Despues m’a baha e bentana i mi di kuné: ‘Hòmbu Bores, ki mishibu sintá eibou bo so asina?’ E ora ei numa el a reakshoná. El a kana bini outo, habri porta i kai sinta ketu ketu sin papia un palabra. ‘Problema bo tin Bores? Ki falta bo? Nos a keda di bin huntu tòg? M’a pasa buskabu. Di kon bo no a chèk ku mi? Kontami.’
Porfin e lenga a los: ‘M’a disidí na último momento bini abou mi so pa mi regla un kuenta pendiente serio ku Lulu. M’a komprondé ku e ta bai tei ku su frei nobo. Mi ke tende di dje personalmente ki intenshon e tin ku e karaho sinbèrgwensa ei. Mi no a bini te aki bou pa buska broyo. Loke mi ke ta un splikashon klaritu di parti di Lulu pa mi sa kuant’or tin. Nada mas. Pa mi sa kon mi ta pará kuné. Nada mas. Esei so mi ke pidié. Nada mas.’
‘Awel ban anto Bores’, m’a kontest’é. El a keda ketu ketu atrobe ta wak leu su dilanti sin bisa nada mas. Pero na su kara mi por a nota kla kla ku su krísis amoroso tabata traha kuné mahos. M’a ripará ku e kibramentu ku Lulu tabata un sla duru p’e hòmber. M’a sintié tambe mal nervioso. Su mannan tabata tembla pisá.
Yegando na e lugá, m’a wak un multitut di karnavalista basta grandi pará kant’i kaminda wardando riba e marcha. M’a slow down pa wak un buraku pa mi hinka mi Camaro. Na un distansha no muchu leu m’a logra haña un lugá’i parker. Nos a baha i den silensio nos a kana bai rùsteg den direkshon dje públiko.
Pero na dado momento, m’a bolbe freak ora m’a wak Bores sali na kareda anto bai lagami mi so pará sin dunami un seña. M’a wanta un sekonde pa mi purba komprondé e hòmbu su reakshon hopi straño. E ora ei m’a dal e un gritu. ‘Bores! Unda bo ta bai?’ E no a kontestá. Bai el a sigui bai den direkshon dje bòsh’i hende su dilanti. Djei mi por a wak kla kla kon Bores diripente a bula ataká un hòmber di patras, push’é ku tur su forsa pa despues dal e un kònòpi bestial den su kustia anto su tras lemb’é un skòp devastador den su atras. E hòmbu no a haña ni chèns pa reakshoná. Dònder el a dònder abou manera papaya hechu i a keda bentá na suela sin por a muf. Ata Bores na kareda despues di su akto hostil.
Lulu ku tabata felis i kontentu i bon brasá ku su frei nobo a dal un gritu di spantu ora el a wak kon Bores a ataká su hòmbu ku violensha, manera hende niun tiki bon na kabes. Morto spantá el a sak abou pa chèk e hòmbu su situashon. Ku yudansa di algun hende den banda el a logra buté bèk riba pia. Djei den un mal hansha el a para wak rònt ku wow’i falki buskando Bores tanten ku e tabata manda poko palabra sumamente ofensivo i humiliante den laira. El a koba Bores su mama sin fin, tra’i otro anto despues el a bombardié ku tur sorto di insulto mashá baho mes. El a yam’é kobarde, habusadó, burdugu, mariku stinki sanka sushi, yugu di patu, degasiado, ets, ets. Ora ku porfin el a logra spòt Bores, el a supla bin bela yen den su direkshon anto ku niun tiki bon intenshon.
Manera Bores a wak Lulu den un deskontrol total, el a spanta i a hala bin para den mi banda pa pidimi nervioso nervioso pa nos hala kita mesora for djeibou. Bayendo direkshon dje outo, ora m’a bira tira un bista patras m’a wak kon shon Lulu a wanta un brek anto sak abou pa piki un demoño baranka di piedra. Ya nos tabata pará net dilanti di mi outo ora m’a wak e muhé ku un kar’i baka brabu biniendo ful spit den nos direkshon anto ku e aparente mal intenshon di kibra Bores su K… ku e baranka. Ei m’a spanta mes mes. M’a sinti un miedu barbaro pa nada no pasa ni Bores ni mi Z28. Pa nada di mundu mi kera imaginami mi ruman Bores mal heridá bentá abou na suela of mi outo su winshil di spat na wèrki!
Pero gloria na Dios i tambe na Bores ku su reakshon impreshonante di ultimo sekonde. Na momento ku Lulu a lansa su fèstbòl kargá ku veneno, Bores ku un tremendo stunt akrobatiko a bula fangu ku dos man e piedra mortal ku tabata biniendo manera un bala di kañon den nos direkshon. Un kos nunka bisto i duru pa kere pasobra Lulu den su rabia kruel a hasi un lansamentu ku presishon i velosidat haltu a la Sandy Koufax, un dje grandi grandinan di Dodgers.
Ei mes m’a gara Bores tene duru na su brasa, m’a habri porta i m’a push’é den outo. Ami a kore bula trai stür, start outo i sin pèrdè pa gana m’a buta pia riba tròt pa ranka sali mané sputnik for djeibou. Skuer m’a keda skuer e outo robes pa drechi i vise versa pa asina lanta un nubia diki di stof ku tera ku piedra ku tur karaho pa baña Lulunan kuné. Ya e ora ei su hòmbu a kana bin para den su banda. Atrobe, mi wòri grandi tabata pa nada no a pasa Bores ni mi Z28. Den spil mi por a wak patras kon e dos maloranan ei tabata zuai moketa den laira pa loko i nos por a tende tambe poko kobá’i mama koñal na nos adrès. Pero anyway, fòk! Dios grasia ku nos por a skapa na wow’i angua di un desgrasia serio i esei ta grandi. Ko’i gradisí shelu.

Ta mi mes su falta

Ya na kaminda pa kas ata Bores atrobe boka kayao. Henter e ruta el a keda steif steif sintá sin move un spir i ku un kara sin ekspreshon. Ami no a hasi mashá tampoko pa bai den kombersashon kuné. M’a lagé trankil den su doló. Ora m’a parker dilanti di su kurá’i kas, porfin el a slèk un konfeshon spontaneo. ‘Hòmbu Win, tòg ta duel mi di kurason ku m’a perde mi di dos porta dje manera chòmbòn ei. Sintá aki den huntu ku bo mi ta realisá ku ainda mi stimashon p’e muhé ei ta grandi. Su bon su malu, tòg mi tin ku bisa ku tur tempu el a tratami ku un kariño bon i sinsero. Ku un beis eksplosivo ratu ratu pero di otr’un banda e tabata mustrami detayenan bunita. Esei ta Lulu sin kita ni pone. Anto ruman, mi ta bisabo, a ni mi kasá na kas. Hamas i nunka lo mi bolbe haña un pal’i muhé asina. Hesta un sota brò! Kibrami mes mes. Anto sòmwèr sòmhòw mi tin ku baha kabes i atmití ku ta mi mes su falta. T’ami a faya chòmbòn. T’ami no a wak mi kaya. T’ami mes a duna e miserabel habusadó, korá stinki, kabé limpi ei tur chèns di mundu p’e bin probechá na grandi di mi muhé anto pa kolmo den mí flèt riba nos kama kingsize luho luho ku m’a regalá Lulu último ei ku el a hasi aña. E flèt ku m’a traha ku sodó’i mi frenta pa mi ku Lulu hinkando basta un par di mil heldu aden, awor e desgrasiado ei ta bati pechu anto kana drenta na grandi di porta dilanti. Manera nos grandinan sa bisa. Hende no sa pa ken nan ta traha. Na bida bo ta hul bo atras pa laga un kos reglá pa bo kasá anto mañan ora bo n’ tei mas, otr’un sinbèrgwensa sin hevul ta pasa piki kasá, ku plaka ku propiedat ku tur demoño bai kuné. Anto mi kaso ta mas tristu ainda. Ami bibitu bibitu ainda anto un karaho pia tera ta pasa bin buta beslag riba mi propiedatnan. Tin kastigu pió ku esei, Win? Ruman, mi n’ ta kansabu mas. Den un werewere formal m’a hinkabu awe. Mil despensa p’esei i mil danki pa tei ku mi. Den momentonan di fèrdrit tòg ta un alivio personal grandi ora bo sa ku bo tin un bròder di bèrde mes den bo banda.
Nos a yama ayó i m’a hala kita un pasá bai kas pa mi por a sosegá e bòdi ku e mente. Despues dje bululú mahos ei, m’a sinti un mester grandi pa lèg un ratu i bin bei poko.

(ta kontinuá)