Bores dos porta (parti 1)

Introdukshon

Bida tin su reglanan strikto. E ta lagabo dal bai ku bo moveshonnan parotin i di bon bida, tanten ku e ta dunabo tambe tur chèns pa bo para ketu un ratu i pensa ku kabes friu pa asina bo tuma e desishon korekto pa logra kambia bo rumbo robes p’esun na drechi. Ma si na dado momento bida sinti ku bo no ta hasi un intento serio pa un kambio radikal den bo estilo di bida foi sla i na final e yega na e konklushon definitivo ku bo ta un kaso pèrdí, e ta straik. Anto mahos!
Ma tòg den e kaso partikular akí di Bores, bida a hasi un eksepshon úniko na su fabor dunand’é un di dos chèns p’e legumai su kosnan di mala mucha i duna su matrimonio, su kasá ku su yunan e lugá hustu ku kada un di nan meresé. Chèns ku na final di kuenta e no a laga bai asina asina. Sin pens’é demasiado i komo promé kos el a kore djòin un grupo karismátiko p’e ta mas serka di Dios. 
Ku un konfiansa intenso den Dios Tata i ku hopi orashon den union ku e grupo di misa e por a libra su mes di su tentashonnan karnal i di su pensamentunan ménos puru ku tabata lastr’é anto bent’é riba e kaminda di piká. Huntu ku su fe den Dios i su orashonnan intenso el a buska i a logra haña su liberashon milagroso via di spiritismo. Un bon alma den purgatorio a sali dun’é un man firme pa e por a skapa di su sufrimentu largu. Djei bai dilanti porfin e hòmbu por a biba un bida trankil den pas i harmonia respetando semper, manera e mes tabata bisa tur tempu, Dios su mandamentunan sagrado.
E ponensianan filosofiko di bida akiriba ta salí foi Win su boka, Bores su amigu bon di tur tempu. Di tempunan bon pero tambe di tempunan ménos bon. Dje manera akiriba Win a formulá su pensamentu pa asina e por a purba komprondé Bores ku su stail di bida hopi otro fo’i loke den nos medio ta wòrdu definí komo normal i aseptabel, spesialmente pa kreyentenan den Dios. 

Bores ta kana prònk ku Lulu

Na kontinuashon, ata Win na palabra tokante Bores su bida di hòmber kasá ku Shon Mi sam sam k’esun klandestino ku Lulu, su di dos porta.
Un tramèrdia den siman Bores tabata kana trankil ta prònk na grandi ku asina un kara harí ku djente afó aya den kaya grandi di Otrobanda bon brasá ku Lulu, su amor skondí ku ya n’e momento ei tabata karga barika dje hòmbu. Nèt bou dje viadukto lata lata di peaton, di repente, Bores ta spòt Shon Mi, su kasá, tende bon: na estado tambe, biniendo stret den nan direkshon. Pa kualke hende hòmber kasá, un situashon pertá asina lo tabata kestion di pániko i un kore kore mal nervioso pariba pabou en buska di kualke un pida buraku p’e hinka su kabes aden, na mod’i avestrus. Pero pa Bores dal den Shon Mi dje manera dramátiko akí no tabata un kos di pèrdè kabes. Sin mustra niun sorto di deskontrol pero ku un kara di kachó brabu el a kore bai reis riba Shon Mi, gar’é tene duru duru na su brasa anto skual e pober muhé gritá dilanti di bòshi di mirones sin dun’é un chèns p’e por a habri su boka. Ku dede menasante den su kara i di un forma intimidante el a atendé ku Shon Mi: “Skucha bon ki mi ta bisabu shon. Bira bo bai kas awór! Ban mira, move bo atras pa kaba. Aya na kas na bon of na malu, nos ta regla e asuntu akí.”
Shon Mi sin por a bisa nèt nèt nada pero ku wowo yen di rabia a bira bai kue direkshon di bushalte tur ariba abou despues dje humiyashon bergonsoso den publiko ku su kasá a but’é pasa aden. Manera el a wak Shon Mi subi su konvoi pa kas, Bores a sakudí trankil di dje e konfrontashon mahos akí fo’i su kurpa pa djei lora bai bèk mesora serka su Lulu stimá, kara harí ku djente afó, manera nada no a sosodé.  

Dos porta, dos bida

Shon Mi su mama, esta madam manera Bores a batis’é, no tabata gusta Bores niun tiki. Fo’i den salida e señora akí ku su mal karakter i un deskonfiansa total den hende no a haña niun tiki bon impreshon di Bores. Tur bia despues ku e tabata haña un chèns ku Bores pa hinka dede, e tabata kana riba su tenchinan bai flùister den e yu su orea p’e kore pa kaba ku e hòmbu bainá ei yen di mal ehèmpel. Pa kolmo Bores -Dios so sa si ta pa vengansa òf no kontra madam- a kore saka Shon Mi na estado fo’i kuminsamentu di nan relashon, kos ku a buta madam su rabia para bira un odio mortal. Pero poko despues Bores a sòru na un manera hustu i responsabel pa regla un kasamentu manera debe i meresé siguí pa un resepshon anochi den un dushi ambiente. Un kos di kita sombré manera hopi invitado a yam’é.
Ya den lat promé ku fiesta a kaba Bores a sinta un banda ku Shon Mi p’e palabrá kuné pa tanten e keda biba serka su mayornan i e mes lo sigui biba na kas di su mama. E di kuné ku ta un medida temporal i a primintié ku palabr’i hòmber ku e ta kaba e pida pida kosnan ku falta ne kasita den kurá dje mayornan. T’asina ku Shon Mi ku e rumannan hòmber a kuminsá ku konstrukshon dje kasita pero na kaminda pa falta di plaka mester a laga para e trabounan. Y el a kontinuá ku su palabrashon: “Manera e kasita ta kla nos dos ta bai biba aden den tur trankilidat. Asina nos ta sòru tambe pa keda na un distansha prudente fo’i mamai ku pa nad’i mundu ke wak mi, a ni pintá na muraya.”
A bin resultá awor ku banda dje bida nobo i resien di hende hòmber kasá serio, trahadó i responsabel, Bores a start -di un dia pa otro i sin midi posibel konsekuensianan funesto p’e ni pa su matrimonio- un relashon ekstramarital kasi ful taim ku Lulu, anto pa kolmo te aya den choka mata, tra’i lomb’i Dios na Leliënberg, djis serka di Barber.
Durante e periodo inisial den kual e relashon pashonal ku Lulu a alkansá su intensidat máksimo, Bores tabata mas aya pabou ku aki pariba serka Shon Mi. Aya na su di dos porta e tabata kore yega atardi despues di trabou bon kontentu di dje pa bin topa su Lulu ku un kara di mucha chikí felis i ku brasa hanchu habrí pa duné un kaluroso bonbiní. Aya e tabata dal su dushi kuminda di anochi prepará pa Lulu ku mil kariño. Aya e tabata spierta mainta tempran ku su bon desayuno kla butá riba mesa. I aya e tabata sali bai su trabou di kontratista den konstrukshon ku un kurason kontentu.
Sèks tabata un nesesidat vital pa Bores i p’esei Lulu tabata komplasé e hòmbu shen porshento den esaki, sin niun klase di restrikshon di su banda. Ma den kuminsamentu di nan afèr intenso, nan no tabatin un lugá di nan mes ku e intimidat total ku nan tabata deseá. Lulu tabatin un kamber den kas dje mayornan ku e tabata kompartí ku un ruman muhé. Fap fap Bores a start den kurá mes ku konstrukshon di un flèt ku e privasidat nesesario. Lulu su papa tabatin un tereno basta grandi ku asta un pida reimu tur plantá na pal’i maishi chikí. Foi den start Bores a sinti ku Lulu tabata “too hot to handle”. Un muhé ku tambe tabata stima su sèks sin fin. Ku sodó’i su frenta i basta un par mil heldu di invershon, e hòmbu a logra su meta den algun siman di trabou duru te asta anochi lat. Pero su satisfakshon tabata te aya i Lulu su atmirashon pa Bores su sakrifisio i dedikashon tabata grandi tambe. Despues dje gran logro aki, kaminda tabata hanchu habrí pa nan fantasianan seksual. Kada minut di den dia i di anochi nan tabata probechá tur ku tin.
Skucha Bores mes na palabra: “Win mi brò keremi, nos tabata hasi nos kosnan di mala mucha mèrdia, atardi, anochi i asta promé ku solo sali. Nos imaginashon no tabatin límite ora di skohe e momento i e lugá pa hisa kita paña i zuai nan benta un banda pa hasi loke karni tabata pidi. Den kamber, den baño, den kushina, den sala pero tambe anochi lat afó den kurá bou di luna yen, mei mei dje pal’i maishinan di Lulu su papa. Sangura mané raton djanochi tabata kou nos atras sin miserikordia i poko raton ku sapu tabata bula bai bin riba nos na nan antoho, anto nos no sa mes. Nos no tabata wòri ku nan tampoko. Ta pa nos kos so nos tabatin tur tinu. Hòmbu Win, den serio, ku e muhé akí ku su hamber insasiabel pa un hungamentu feros mi tabata sintimi un hòmber felis den un paraiso terenal. Bo sa kon? Manera Adam ku Eva den nos Dios Kreador su paraiso. Nos no tabata sa kiko ta basta. Un eksperiensia úniko!
Ma, Win, manera tur kos den bida, semper tin un pero. E bibá klandestino akí ku Lulu tabata kon ku bo mir’é, kon ku bo bir’é, na final di kuenta un aventura pashonal niun tiki kouteloso, anto riba esaki pa kolmo, ta bini aserka ku loke m’a hasi di saka e shon na estado tabata un muchachada sumamente iresponsabel, nada digno di un kabayero. Te na e momentunan akí Lulu no tabata sa ni sospechá niun ora so ku m’a kaba di kontraé matrimonio ku Shon Mi i ku e tambe tabata karga barika di mi.”

Asina Bores, ku palabranan outokrítiko duru pero realístiko fo’i su mes boka a kalifiká su relashon prohibí ku Lulu despues ku basta asuntu personal i intimo rònt di dje a kuminsá bai di mal en peor. E di dos porta en kestion di repente i sin e mes tabata muchu konsiente di esaki a parti su bida den dos di un forma radikal. Un bida legítimo di hòmbu kasá ku Shon Mi anto na mes momento otr’un bibá ilegítimo i skondí ku Lulu. 

(ta kontinuá)