Bo sonrisa

Bo sonrisa a plama un wairu di flor
te spièrta arko íris na bentana di mi bida,
kaminda ya sombra di atardi a bira un amigu konosí.

Lo mi sigui e invitashon ku ta lombra
den e kòrá kimá dje pétalo di rosa
ku b’a pinta pa deleitá mi dianan?

Ainda mi por waya mi konfó
bai kore buska rekuerdo di mi hubentut
den dushi sumpiña di emoshon.

Mi ke sinti mardugá baña mi atrobe
ku fragansia di amor ora nos yama ayó
i bo keda floho-muhá riba kama di nos pashon
ku promesa di mañan na nos boka.

Esta un lokura tristu-dushi pa soña riba pia
di tantu deseo skondí tras di kortina di tempu
ora ya sukuritu a slep drenta, kai drumi na mi kustia.

Òf kisas, tòg tin un podisé
den e chispa di bo wowo, ku ta invitá mi
bin keiru den intimidat di bo anhelo?
Kisas …?

Joseph ‘Jopi’ Hart